ភ្នំពេញ៖ បើទោះបីជាមានទាំងការគាំទ្រ និងការរិះគន់មែនក្តី ក្រោយពីបានបង្កើតឧបករណ៍បំពងសំឡេង ច្នៃជាមួយនឹងឆ្នាំងដីបង្កឲ្យមានការចាប់អារម្មណ៍អ្នកលេងបណ្តាញសង្គម របស់និស្សិតស្រី រៀនមហាវិទ្យាល័យផ្នែកវិស្វកម្ម នៃដេប៉ាតឺម៉ង់វិស្វកម្មទូរគមនាគមន៍ និងអេឡិចត្រូនិក នៅសាកលវិទ្យាល័យភូមិន្ទភ្នំពេញ និងមានឆន្ទៈចង់សម្រេចក្តីសុបិនធំសម្រាប់ការច្នៃនេះទៀតផងទៅថ្ងៃអនាគត។
និស្សិតស្រីមកពីខេត្តកំពង់ឆ្នាំង កញ្ញា ដាំ សុស្រីនាង មានស្រុកកំណើតនៅភូមិថ្មរាប ឃុំពង្រា ស្រុករលាប្អៀរ ខេត្តកំពង់ឆ្នាំង មានវ័យ ១៨ ឆ្នាំ ជាកូនស្រីពៅក្នុងគ្រួសារ មានបងប្រុសម្នាក់ និងកំព្រាឪពុកតាំងពីកំណើត រស់នៅជាមួយម្តាយក្នុងជីវភាពក្រីក្រ ដែលម្តាយប្រកបរបរធ្វើនំជើងជ្រូក (នំកំប៉ុង) ដើម្បីចិញ្ចឹមកូនឲ្យបានរៀនសូត្រ និងអតីតជាក្រុមយុវជនកាកបាទក្រហមរបស់វិទ្យាល័យហ៊ុនសែនរលាប្អៀរ បាននិទ្ទេស C ពីការប្រឡងបាក់ឌុបឆ្នាំ ២០១៨ និងជានិស្សិតជាប់អាហារូបករណ៍នៅសាកលវិទ្យាល័យភូមិន្ទភ្នំពេញ។
ការច្នៃនេះ ធ្វើនៅក្នុងរយៈពេលសិក្សាឆ្នាំទី ១ ឆមាសទី ២ ខណៈពេលលោកគ្រូផ្នែកដេប៉ាតឺម៉ង់វិស្វកម្មទូរគមនាគមន៍ និងអេឡិចត្រូនិក បានដាក់កិច្ចការគម្រោងច្នៃប្រឌិត ដែលមានលក្ខណៈបញ្ជាក់ពីអត្តសញ្ញាណកំណើតរបស់ខ្លួននៃទ្រឹស្តី «Design Thinking»។
កញ្ញា ដាំ សុស្រីនាង បន្តឲ្យដឹងថា៖ «ខ្ញុំបាននឹកឃើញគំនិតច្នៃនូវឧបករណ៍មួយ ដែលលេចចេញជារូបរាងឡើងបង្ហាញពីអត្តសញ្ញាណនៃតំបន់ស្រុកកំណើតរបស់ខ្លួននោះ ទើបសម្រេចយកឆ្នាំងដី ដែលជាផលិតផលសិប្បកម្មបញ្ជាក់អំពីអត្តសញ្ញាណនៃខេត្តខ្លួនតាំងពីដូនតាតរៀងមក។ នាងខ្ញុំបានយកមកចោះច្នៃបំពាក់គ្រឿងអេឡិចត្រូនិកបាសសំឡេង ២ តូចៗ ដែលមានតម្លៃថោក គឺមិនដល់ ២ ម៉ឺនរៀលផងទេ ខ្ញុំមិនសូវមានប្រាក់។ ហើយគុណភាពនៃសំឡេងរបស់ក៏អាស្រ័យតាមគ្រឿងរបស់វាដែរ»។
កញ្ញា ដាំ សុស្រីនាង និស្សិតស្រីច្នៃឧបករណ៍បំពងសំឡេងឆ្នាំងដី រូបនេះ បន្តឲ្យដឹងថា៖ «ដោយសារនាងខ្ញុំ ជាអ្នកមានស្រុកកំណើតនៅខេត្តកំពង់ឆ្នាំង ហើយគ្រឿងក្អម ឆ្នាំងដី គឺជាអត្តសញ្ញាណមួយបញ្ជាក់ថាជាគ្រឿងសម្គាល់របស់អ្នកខេត្តកំពង់ឆ្នាំងនោះ ទើបធ្វើឲ្យខ្ញុំសម្រេចយកឆ្នាំងដីមកច្នៃ បើទោះបីជាដឹងថា នឹងមិនធន់សម្ពាធសំឡេងពីគ្រឿងអំភ្លីមែនក្តី តែនាងខ្ញុំនៅតែខិតខំច្នៃវាឲ្យកើតបានជាលទ្ធផលដូចដែលបានឃើញនាពេលបង្ហាញនៅក្នុងកម្មវិធីបង្ហាញស្នាដៃនិស្សិតនៃដេប៉ាតឺម៉ង់វិស្វកម្មទូរគមនាគមន៍ និងអេឡិចត្រូនិក កាលពីប៉ុន្មានសប្តាហ៍មុននៅឯសាកលវិទ្យាល័យភ្នំពេញ នៅអគារ STEM ដោយមានលោកគ្រូជនជាតិកូរ៉េជំនាញវិស្វកម្មចូលរួមផងដែរ»។
យ៉ាងណាក្រោយពីឆ្លងកាត់នូវបទពិសោធបង្កើតឧបករណ៍សំឡេងច្នៃជាមួយនឹងឆ្នាំងដីរួចមកនោះ មិនបានធ្វើឲ្យកញ្ញា ស្រីនាង បោះបង់ក្តីសុបិនរបស់ខ្លួនលើការច្នៃនេះឡើយ គឺថែមទាំងជំរុញឲ្យនិស្សិតស្រី ទើបតែបន្តការសិក្សាឆ្នាំទី ២ ឆ្នាំថ្មី (២០១៩-២០២០) ខណៈស្នាដៃរបស់ក្រុមនិស្សិតទាំងអស់ត្រូវបានដេប៉ាតឺម៉ង់វិស្វកម្មទូរគមនាគមន៍ និងអេឡិចត្រូនិក រក្សាទុក។
ស្រីនាង បន្ថែមថា៖ «ក្រោយពីមានការសរសើរផង និងរិះគន់ផងលើការច្នៃរបស់ខ្ញុំ និងបានយោបល់ល្អៗបន្ថែមពីលោកគ្រូ និងមិត្តភក្តិជាច្រើនមក ក៏ជំរុញឲ្យខ្ញុំរឹតតែចង់សម្រេចក្តីស្រមៃរបស់ខ្ញុំនេះ ចង់ធ្វើឲ្យវាបានតែម្តងទៅថ្ងៃអនាគត។ ខ្ញុំទទួលបានយោបល់ពីលោកគ្រូជំនាញគីមីម្នាក់ បានផ្តល់ជាគំនិតថា ប្រសិនចង់ឲ្យឆ្នាំងដីអាចធានានឹងការបុកសំឡេង ដែលយើងតគ្រឿងបំពងសំឡេងនោះ គឺយើងសិក្សា និងដកពិសោធន៍លើឆ្នាំងដីនេះបាន គឺយើងផលិតវាដូចជាប្រភេទព័រសឺឡែន ដែលវាធន់នឹងការបែកបាក់បាន។ ដូច្នេះ នាងខ្ញុំ តាំងចិត្តថា នឹងបន្តគំនិតនោះទុករហូតដល់ពេលនាងខ្ញុំអាចរកឃើញពីវិធីពង្រឹងគុណភាពឆ្នាំងដីនេះ និងបន្តធ្វើវាឲ្យបាននាពេលអនាគត»៕