ភ្នំពេញៈ ថ្មីៗនេះបង្កការភ្ញាក់ផ្អើល ខណៈតារាកំប្លែងស្រីប្រចាំទូរទស្សន៍ CTN & CNC ដែលជាកូនស្រីសំណព្វចិត្តលោក សុវណ្ណ ឬទ្ធី ហៅតាវ៉ិចទ័រ កញ្ញា នីឡា បាននាំអនាគតឪពុកម្តាយក្មេកឲ្យមកស្គាល់ផ្ទះខ្លួន ហាក់ដូចជាការប្រាប់នូវតម្រុយថា ជិតទទួលបានដំណឹងល្អសម្រាប់សម្ព័ន្ធគូស្នេហ៍វ័យក្មេងផងដែរ។
បន្ថែមពីលើបណ្តុំរូបថតដ៏ស្និទ្ធស្នាលទាំងឡាយនៃគ្រួសារទាំង ២ មហាជនក៏ចាប់អារម្មណ៍ខ្លាំងណាស់ដែរទៅលើពាក្យពេចន៍របស់តារាកំប្លែងស្រីកញ្ញា នីឡា ដោយនាងបានហាត់ហៅម្ដាយរបស់គូស្នេហ៍ថ្មីខ្លួនដែរថា «ម៉ាក់ក្មេក» ពេញៗមាត់រួចទៅហើយ ដើម្បីបង្កើនភាពស្និទ្ធស្នាល ឬឲ្យទម្លាប់មាត់ទុកមុន។
ខណៈគូស្នេហ៍របស់នាងគឺលោក សូត្រ សក្ការៈ ក៏បានបង្ហោះរូបថតជុំគ្រួសារទាំងសងខាងមួយសន្លឹកអមដោយសារយ៉ាងខ្លីផងដែរថា «ឆ្នាំក្រោយ» ដែលនេះគឺជាពាក្យពេចន៍អាចធ្វើឲ្យមហាជនយល់ និងមានការសន្មតបានថា កំលោះរូបសង្ហារូបនេះទំនងជារំអុក ឬស្នើសុំឲ្យស្រីស្រស់សោភាកញ្ញា នីឡា ព្រមរៀបការជាមួយខ្លួននៅឆ្នាំក្រោយនេះហើយមើលទៅ។
តារាកំប្លែងស្រី ក្រមិចក្រមើមសម្រស់កាន់តែស្អាតសាច់សខ្ចីត្រូវនឹងភាពកាក់កបជាមួយរបរលក់ផលិតផលឡេថែសម្ផស្សអនឡាញ កញ្ញា នីឡា ដែលមិនត្រឹមតែបានបណ្តើរគូស្នេហ៍បង្អួតក្រសែភ្នែកមហាជនស្ទើរតែគ្រប់កម្មវិធីសិល្បៈនោះទេ នាងថែមទាំងបង្ហាញពីអារម្មណ៍ស្រឡាញ់ទៅលើដៃគូស្នេហ៍ខ្លួនខ្លាំងទៀតផងនាពេលកន្លងមក។
តែចំពោះការឆ្លើយតបនឹងរឿងដែលនាងបាននាំគ្រួសារបណ្តូលចិត្តថ្មីមកជួបជុំគ្នាជាលើកដំបូង ក្រោយពីសាមីខ្លួនទាំង ២ បានយល់ចិត្តថ្លើមគ្នាមកនោះ កញ្ញា នីឡា ប្រាប់ថា៖ «អូ!តាមពិតទៅនោះគ្រាន់តែជាការជួបជុំគ្រួសារទាំង ២ ជាលក្ខណៈធម្មតាទេបង!មិនទាន់មានរឿងដូចជាបងសួរនោះឡើយ។ ដោយសារតែពួកយើងស្គាល់ចិត្តថ្លើមគ្នា និងមានទំនាក់ទំនងល្អច្រើនហើយនោះ ចង់ឲ្យមានការជួបជុំចាស់ទុំទាំងសងខាងជាលើកដំបូងតែម្តងទៅ»។
កញ្ញា នីឡា តារាកំប្លែងស្រីវ័យ ១៩ ឆ្នាំដែលមានទំនាក់ទំនងស្នេហាជាមួយគូស្នេហ៍ថ្មីអស់រយៈពេលជិត ២ ឆ្នាំនេះ និងត្រូវបានឪពុកម្តាយទាំងសងខាងបានដឹងឮ និងយល់ស្របអស់ហើយ តែក្នុងខណៈពេលនេះគ្រួសារទាំង ២ ក៏នៅមិនទាន់បានគិតរឿងភ្ជាប់ពាក្យ ឬមួយក៏រៀបការនោះឡើយ។
តារាកំប្លែងស្រីដែលមានដុងតាំងពីកំណើតខាងសម្តែងសិល្បៈកំប្លែងបានបន្តទៀតថា៖ «ការជួបជុំនេះមិនមែនជាការជុំដើម្បីគិតគូររឿងរកវេលារៀបចំមង្គលការអ្វីនោះទេ គឺគ្រាន់តែជាការនាំចាស់ទុំទាំងសងខាងដើម្បីបានមកស្គាល់គ្នាតែប៉ុណ្ណោះ។ យើងពុំទាន់គិតគូររឿងរៀបការនោះទេ។ សម្រាប់នាងខ្ញុំគិតថាចាំមើលចិត្តថ្លើមគ្នា ២-៣ ឆ្នាំទើបគិតរឿងមង្គលការនេះ»៕