ភ្នំពេញៈ ទើបតែលេចឮព័ត៌មានថាមានគូស្នេហ៍ថ្មី ក្រោយបានផ្តាច់ពាក្យពីគូដណ្តឹងជាកូនថៅកែរោងល្ខោន ភី សុគន្ធី តារាកំប្លែងស្រីវ័យក្មេងមានអាជីពជាអ្នកសិល្បៈតាំងពីវ័យកុមារកញ្ញា នីឡា កូនលោកតាវ៉ិចទ័របានបណ្តើរម្ចាស់បេះដូងយ៉ាងបើកចំហក្នុងថ្ងៃសម្ពោធរឿង «លោកប្តី» របស់ផលិតកម្ម LD Picture កាលពីថ្ងៃទី ៥ ខែមីនាកន្លងទៅនេះដោយរូបនាងថែមទាំងហ៊ានទម្លាយប្រាប់សាវតារបុរសជាសង្សាររូបនេះជាសាធារណៈទៀតផង។
តារាកំប្លែងស្រីក្រមិចក្រមើមសម្រស់កាន់តែស្អាតសាច់សខ្ចីត្រូវនឹងរបរលក់ផលិតផលឡេថែសម្ផស្សអនឡាញ កញ្ញា នីឡា មិនត្រឹមតែបណ្តើរគូស្នេហ៍បង្អួតក្រសែភ្នែកអ្នកចូលរួមក្នុងកម្មវិធីនោះទេ នាងថែមទាំងបង្ហាញពីអារម្មណ៍ដែលស្រលាញ់ទៅលើដៃគូប្រាប់មកអ្នកសារព័ត៌មានថា៖ «តាមពិតទៅគាត់មិនមានអ្វីដែលពិសេសខ្លាំងដល់ថ្នាក់ថាអស្ចារ្យពេកនោះទេ គ្រាន់តែថាទី ១ ខ្ញុំគិតពួកខ្ញុំអាចនៅជាមួយគ្នាបាន ដោយសារឆាប់យល់ពីគ្នាច្រើនហើយទី ២ ពេលនិយាយគ្នាឆាប់យល់គ្នា មិនមែនថានិយាយគ្នាមួយបែកឆ្វេងមួយបែកស្តាំទេនិយាយទៅស្របគ្នាធ្វើអីក៏ស្របគ្នាដែរ ទើបធ្វើឲ្យខ្ញុំដាក់ចិត្តស្រឡាញ់គាត់»។
ខណៈនោះដែរគូកំណាន់ចិត្តរបស់តារាស្រី នីឡា ដែលត្រូវគេបានដឹងថាឈ្មោះ សក្ការៈ មានវ័យទើបតែ ២០ ឆ្នាំនោះក៏បានតបនឹងអារម្មណ៍ស្រលាញ់ទៅ នីឡា វិញថា៖ «ចំពោះខ្ញុំវិញអត់មានហេតុផលអីទាំងអស់ គឺខ្ញុំស្រលាញ់គ្រប់យ៉ាងរបស់គាត់សម្រាប់ខ្ញុំ គាត់គឺ Perfect [ល្អឥតខ្ចោះ]»។
កញ្ញា នីឡា តារាកំប្លែងស្រីវ័យ ១៩ ឆ្នាំរូបនេះក៏បានបញ្ជាក់ថាចំពោះទំនាក់ទំនងស្នេហាជាមួយគូស្នេហ៍ថ្មីអស់រយៈពេលជិត ២ ឆ្នាំនេះត្រូវបានឪពុកម្តាយទាំងសងខាងបានដឹងឮ និងយល់ស្របអស់ហើយ តែក្នុងខណៈពេលនេះអ្នកទាំង ២ មិនទាន់បានគិតរឿងភ្ជាប់ពាក្យ ឬមួយក៏រៀបការឡើយ។ យ៉ាងណាកញ្ញា នីឡា ដែលទើបឡើងកាលីបរថយន្តមែរសឺដេសថ្មីសន្លាងរូបនេះបានប្រាប់ដែរថាប្រហែល ២ ឆ្នាំទៀតទើបគិតគូរ។
តែអ្វីដែលធ្វើឲ្យអ្នកគ្រប់គ្នាចាប់អារម្មណ៍នោះគឺសាវតារគ្រួសារម្ចាស់ចិត្តនាង ដោយ លោក សក្ការៈ ជាគូស្នេហ៍នីឡាបានបង្ហើបពីរបរការងាររបស់ឪពុកម្តាយខ្លួនថា៖ «ប៉ាខ្ញុំគាត់ជាអតីតឯកអគ្គរាជទូត ចំណែកម៉ាក់ខ្ញុំគាត់ជាអ្នកវិនិយោគធំមួយដែលមានច្រើនជំនួញ»។
លោក សក្ការៈ ថែមទាំងបានបង្ហាញនូវគោលជំហរបើកចិត្តទូលាយមិនដែលប្រចណ្ឌស្រីស្រស់ នីឡា ពេលទៅសម្តែងនោះទេ។ លោកថែមទាំងចង់ឲ្យនាងរឹតតែល្បីជាងនេះដោយគ្រាន់តែពេល នីឡា ទៅកម្មវិធី ឬ ទៅសម្តែងត្រូវមានវត្តមានលោកកំដរគ្រប់ទីកន្លែងដោយមិនខ្លាចពាក្យនិន្ទាពីមហាជនឡើយ៕