ភ្នំពេញ៖ តារាសម្ដែងកំពូលទឹកភ្នែក កញ្ញា នី មុនីនាថ បានលាតត្រដាងបទពិសោធជីវិតស្នេហាឥតលាក់លៀម តែអ្វីដែលធ្វើឲ្យអ្នកគាំទ្រចាប់អារម្មណ៍បំផុត គឺតារាស្រីប្រែសម្ផស្សផូរផង់ស្អាតប្លែករូបនេះ បានបញ្ជាក់ប្រាប់ថា រូបនាងសព្វថ្ងៃកំពុងជោគជ័យនឹងស្នេហាហើយ ទោះថ្ងៃមុខមិនដឹងថាវានឹងវិវឌ្ឍយ៉ាងណាក្ដី។
ក្នុងវីដេអូបទសម្ភាស Star Talk របស់ Sastra Film តារាស្រីល្បីតួកម្សត់ស្រគត់ស្រគំ កញ្ញា នី មុនីនាថ បានរៀបរាប់ពីប្រវត្តិស្នេហារបស់កញ្ញាថា៖ «បើនិយាយទៅ គឺបរាជ័យ ២ ដងហើយ លើកទី១ និងលើកទី២ ទី៣ ទើបជួបស្នេហាស្មោះ ស្មោះនាពេលបច្ចុប្បន្ន តែអត់ដឹងថាថ្ងៃអនាគតទៅយ៉ាងណាទេ។ មិនដឹងថាគេស្មោះ ឬក៏យើងមិនស្មោះ»។
តារាស្រីដែលមមាញឹកនឹងការងារសិល្បៈ ក៏ដូចជាជំនួញផលិតផលថែរក្សាស្បែក Bersinar Skin បានអះអាងថា រូបនាងជាស្ត្រីខ្មែរ គឺត្រូវតែគិតពីកិត្តិយស ហើយនាងមិនប្រាថ្នាមានដៃគូច្រើនទាល់តែសោះ។
តារាសម្ដែង នី មុនីនាថ បានរៀបរាប់ថា៖ «មិនមានន័យថាមនុស្សស្រីចង់បានស្នេហាច្រើននោះទេ ប៉ុន្តែពេលវេលាមួយធ្វើឲ្យយើងហ្នឹងត្រូវតែដល់ផ្លូវបែក»។
កញ្ញាក៏បានទម្លាយទៀតថា៖ «ស្នេហាលើកទី១ ដូចជាឆ្នាំ ២០១៣ របៀបលក្ខណៈ First Love ស្នេហាដំបូងបំផុតរបស់បង។ មានស្នេហាតែក៏បរាជ័យ ដោយយើងអត់អាចបន្តទៅអនាគតបាន ក៏បែកគ្នា»។
កញ្ញា នី មុនីនាថ បានលាតត្រដាងទៀតថា ស្នេហាដំបូងរបស់នាង នាងឃើញភាពក្បត់នៅនឹងមុខ តែកញ្ញានៅតែទ្រាំ ទោះគេមានអ្នកថ្មី ហើយធ្វើបាបផ្លូវចិត្ត ក៏មិនចង់បាត់បង់ការស្រឡាញ់។
ក្រោយពីចែកផ្លូវគ្នា ហើយសម្រក់ទឹកភ្នែក ដើរលេងស្ដាប់ភ្លេងរំសាយទុក្ខ រួចជូតទឹកភ្នែករៀងរាល់មុនពេលចូលផ្ទះ ស្ទើរតែពេញ ១ ឆ្នាំ កញ្ញាក៏ទទួលបាននូវចំណងស្នេហ៍ទី២។
តារាសម្ដែងកំពូលទឹកភ្នែករូបនេះក៏បានលើកឡើងពីចំណងស្នេហ៍ទី ២ ថា៖ «គូដណ្ដឹង ម្ដាយគាត់ស្រឡាញ់ខ្លាំងពេក ទៅជាគូដណ្ដឹងគាត់បានចិត្ត លែងឲ្យតម្លៃយើង យំអាណិតម្ដាយ យំអាណិតខ្លួនឯង»
ហែលឆ្លងព្យុះមនោសញ្ចេតនា ២ លើកមកហើយ នី មុនីនាថ ក៏បានជួបម្ចាស់បេះដូងបច្ចុប្បន្ន ដែលនាងរៀបរាប់ប្រាប់ថា៖ «ឥឡូវនេះ គឺស្នេហារបស់បងជោគជ័យ គឺពួកបងស្រឡាញ់គ្នា ផ្ដល់តម្លៃឲ្យគ្នាទៅវិញទៅមក។ តែមិនប្រាកដថា ថ្ងៃអនាគតពួកយើងទទួលបានជោគជ័យ តែក៏មិនប្រាកដថាយើងបរាជ័យដែរ។ អាស្រ័យទៅលើមនុស្ស ២ នាក់ ថាតើពួកគាត់អាចតស៊ូជាមួយគ្នាបានដល់កម្រិតណា»៕