ភ្នំពេញ: ប្រភេទ​នំប៉័ង​ដូណឺរកេបាប់ (Doner kebab) ឬ​ប្រជាជន​ខ្មែរ​ហៅថា នំប៉័ង​តួកគី មាន​សណ្ឋាន​ដូចជា​ប៊ឺហ្គើរ ឬ​សាំងវ៉ិច​ដែរ​។ វា​ជា​នំប៉័ង​បន្ទះ​ស្រួយៗ​ញាត់​សាច់​ក្តៅៗ​លាយ​ជាមួយ​បន្លែ​ដូចជា ខ្ទឹម​បារាំង ជ្រក់​ត្រសក់​ជា​ស្នូល និង​ត្រូវ​បាន​គេ​ញ៉ាំ​ជ្រលក់​ជាមួយ​ទឹកម្ទេស ឬ​ម៉ាយូណេ។ ដូណឺរកេបាប់​ពេញ​និយម​ណាស់​ពី​សំណាក់​អ្នក​ញ៉ាំ​នៅ​ប្រទេស​តួកគី តំបន់​មជ្ឈិមបូព៌ា អឺរ៉ុប និង​អូស្ត្រាលី ខណៈ​វា​ទើបតែ​សាយភាយ​រសជាតិ​នៅ​ប្រទេស​កម្ពុជា​។ នំប៉័ង​តួកគី​នេះ​ច្រើន​ប្រើ​សាច់​ចៀម សាច់គោ ឬ​សាច់​មាន់ ដែល​គេ​ដាក់​ដោត​សាច់​ចម្អិន​នៅលើ​ចង្ក្រាន​ហ្គាស​អេឡិចត្រូ អាច​រក្សា​កម្ដៅ​ក្ដៅ​ជាប់​ជានិច្ច។