.jpg)
នារីរកស៊ីផ្លូវភេទ (ឆ្វេង) នៅផ្ទះបនដ៏ធំបំផុតប្រចាំប្រទេស ទទួលវ៉ាក់សាំងប្រឆាំងកូវីដ។ AFP
ក្រុងដាក្កា៖ បង់ក្លាដែសចាប់ផ្ដើមចាក់វ៉ាក់សាំងដល់អ្នករកស៊ីផ្លូវភេទនៅផ្ទះបនដ៏ធំបំផុតប្រចាំប្រទេស ដែលផ្ទុកនារីបម្រើកាមគុណរហូតដល់ប្រមាណ ១ ៩០០ នាក់។
ប្រទេសនៅអាស៊ីខាងត្បូងនេះបានចាក់វ៉ាក់សាំង AstraZeneca ដល់ពលរដ្ឋជិត ៣ លាននាក់ អាយុចាប់ពី ៤០ ឆ្នាំឡើង តែមិនបានរើសអាយុចំពោះអ្នករកស៊ីផ្លូវភេទនៅទីក្រុងដូឡាតឌៀ ភាគខាងលិចប្រទេសឡើយ។
អាស៊ីហ្វ ម៉ាមូដ ប្រធានផ្នែកសុខាភិបាលក្រុងដូឡាតឌៀ បានប្រាប់ AFP ថា៖ «នារីបម្រើកាមគុណយ៉ាងតិច ១០០ នាក់ បានទទួលវ៉ាក់សាំងប្រឆាំងជំងឺកូវីដ ១៩ រួចហើយ។ វាពិតជាមានសារសំខាន់ណាស់ក្នុងការផ្ដល់វ៉ាក់សាំងឱ្យពួកគេ។ មនុស្សរាប់ពាន់នាក់បានចូលផ្ទះបនរៀងរាល់ថ្ងៃ ហើយនារីរកស៊ីផ្លូវភេទនៅផ្ទះបនដ៏ធំនេះ ពិតជាក្រុមមនុស្សសងាយរងគ្រោះ»។
ស្រ្ដីរកស៊ីផ្លូវភេទដំបូងប្រចាំផ្ទះធំនោះដែលបានទទួលវ៉ាក់សាំង បានធ្វើដំណើរទៅគ្លីនិកមួយកន្លែងចម្ងាយ ៥ គីឡូម៉ែត្រ តែលោក ម៉ាមូដ បាននិយាយថា អាជ្ញាធរក៏គ្រោងបោះទីតាំងនៅក្នុងផ្ទះបននោះដោយផ្ទាល់ផងដែរ។
បង់ក្លាដែស ចាប់ផ្ដើមចាក់វ៉ាក់សាំងដល់អ្នករកស៊ីផ្លូវភេទនៅផ្ទះបនដ៏ធំបំផុតប្រចាំប្រទេស ដែលផ្ទុកនារីបម្រើកាមគុណរហូតដល់ប្រមាណ ១ ៩០០ នាក់។ AFP
សម្ផស្ស អាយុ ៤០ ឆ្នាំ ដែលប្រាប់ត្រឹមឈ្មោះមួយម៉ាត់ បាននិយាយថា នាងមានការស្ទាក់ស្ទើរ ពេលឮពាក្យចចាមអារាមថា មានមនុស្សស្លាប់ក្រោយចាក់វ៉ាក់សាំង។
នាងបាននិយាយថា៖ «មន្ដ្រីសុខាភិបាលផ្ដល់ការធានាឱ្យពួកយើង។ បច្ចុប្បន្ន យើងយល់ថា វាពិតជាសំខាន់ ដោយសារយើងបានជួបមនុស្សជាច្រើនរៀងរាល់ថ្ងៃ»។
បង់ក្លាដែស ជាប្រទេសកាន់លទ្ធិមូស្លីមធំបំផុតមួយ ជាទីដែលពេស្យាកម្មជារបរស្របច្បាប់សម្រាប់អាយុចាប់ពី ១៨ ឆ្នាំ ហើយយ៉ាងតិច ផ្ទះបន ១១ កន្លែង កំពុងប្រតិបត្ដិការនៅទូទាំងប្រទេស ដែលមានប្រជាជនសរុប ១៦៨ លាននាក់។
សម្ផស្ស បាននិយាយថា វ៉ាក់សាំងនឹងជួយបង្កើនចំណូល ខណៈភ្ញៀវជាច្រើនមានការបារម្ភអំពីវីរុសកូរ៉ូណា និងព្យាយាមមិនមកផ្ទះបន ដ៏ណែនតាន់តាប់ ដែលស្ថិតនៅក្បែរស្ថានីយរថយន្ដដ៏មមាញឹក៕ AFP/HR
តំបន់ផ្ទះបនដ៏ធំបំផុតនៅប្រទេសបង់ក្លាដេស ដែលមាននារីរកស៊ីផ្លូវភេទប្រមាណ ១ ៩០០ នាក់ នៅចម្ងាយប្រមាណ ១១០ គីឡូម៉ែត្រ ភាគខាងលិចក្រុងដារកា។ AFP
