.jpg)
តារាចម្រៀង និងសម្ដែង លោក បញ្ញា សិទ្ធិ និងតារាខ្មែរជាច្រើនរូបនៅលើឆាកតន្ត្រីឯទឹកដីអូស្ត្រាលី។ រូបថត ហ្វេសប៊ុក និងភ្នំពេញ ប៉ុស្ដិ៍
ភ្នំពេញៈ តារាសម្តែង និងជាតារាចម្រៀងលោក បញ្ញា សិទ្ធិ បាន និងកំពុងស្ថិតនៅឯនាយសមុទ្រចំនួន ៣ ខែដែលការចេញច្រៀងសម្ដែងនៅទឹកដីអូស្ត្រាលី និងនូវែលសេឡង់លើកនេះរួមចំណែកជួយផ្សព្វផ្សាយដល់វប្បធម៌ សាសនាព្រះពុទ្ធ និងវត្តអារាមស្ថិតនៅបរទេសផងដែរ។
តារាប្រុសរូបសង្ហាដែលទើបរងពាក្យចចាមអារ៉ាមស្នេហ៍ភេទដូចគ្នាលោក បញ្ញា សិទ្ធិ បានផ្តល់បទសម្ភាសមកកាន់ភ្នំពេញ ប៉ុស្តិ៍ ពីការធ្វើដំណើរទៅសម្តែងនៅក្រៅប្រទេសថា៖ «ខ្ញុំមកសម្តែងនេះនៅប្រទេសអូស្ត្រាលី ២ ខែ និងសម្តែងនៅប្រទេសនូវែលសេឡង់ចំនួន ១ ខែផងដែរ ដោយមានការអញ្ជើញពីខាងសមាគមសិល្បៈវត្តសិរីជុំស្ថិតក្នុងប្រទេសអូស្ត្រាលី»។
លោក បញ្ញា សិទ្ធិ ក៏បានរៀបរាប់ពីសិល្បករដែលបានរួមដំណើរទៅសម្ដែងលើកនេះថា៖ «នៅមានសិល្បករសិល្បការិនីជាច្រើនទៀតរួមជាមួយបង ឈឿន ឧត្តម ផងដែរ»។
តារាពហុជំនាញមានសាច់សខ្ចីមិនចាញ់តារាស្រីលោក បញ្ញា សិទ្ធិ បរិយាយបន្តពីគោលដៅក្នុងការទៅសម្តែងនៅក្នុងប្រទេសនូវែលសេឡង់ និងប្រទេសអូស្ត្រាលីទៀតថា៖ «ចំពោះថវិកាដែលពួកយើងរកបានពីការសម្តែងពួកយើងបានយកមកដើម្បីផ្សព្វផ្សាយពីវប្បធម៌ដូចជាព្រះពុទ្ធសាសនាយើង និងជួយកសាងវត្តសិរីជុំនៅក្នុងប្រទេសអូស្ត្រាលីក្រុងមែលប៊នហ្នឹងតែម្តង»។
ចំពោះការធ្វើដំណើរទៅសម្តែងក្រៅប្រទេសរយៈពេលជាច្រើនខែលោក បញ្ញា សិទ្ធិ បានបញ្ជាក់ថាមិនខ្លាចក្នុងការបាត់បង់ប្រជាប្រិយភាពនៅក្នុងប្រទេសកំណើតឡើយ ដោយសារមុនពេលឡើងយន្តហោះកាលពីថ្ងៃទី ១៣ ខែមីនា កន្លងទៅនេះលោកបានបញ្ចប់ក្នុងការថតកុនភាគចំនួន ២ រឿងរួចហើយដែរ។
ខ្សែភាពយន្តដែលលោក បញ្ញា សិទ្ធិ បានសម្ដែងរួចថ្មីៗមានរឿង «ឆន្ទា» របស់ទូរទស្សន៍ស៊ីធីអិន សម្តែងជាតួឯក និងរឿង «មន្តស្នេហ៍អនុសេនីយ៍» របស់ទូរទស្សន៍ប៉ុស្តិ៍លេខ ៥ សម្តែងជាតួសំខាន់។ ចំណែកឯការច្រៀងវិញលោកក៏បានបញ្ចប់រួចហើយដែរ។
លោក បញ្ញា សិទ្ធិ មានងារជាអ្នកចម្រៀង និងជាតារាសម្តែងល្បីឈ្មោះក្នុងចង្កោមសិល្បៈបានបង្ហើបពីការគាំទ្រពីសំណាក់អាណិកជនខ្មែររស់នៅប្រទេសអូស្ត្រាលីថា៖ «ចំពោះបងប្អូនខ្មែរដែលគាត់រស់នៅទីនេះ (ប្រទេសអូស្ត្រាលី) គាត់មានការគាំទ្រច្រើនមែនទែន និងមានការស្រឡាញ់ចូលចិត្តយ៉ាងច្រើនដូចគ្នា»។
លោក បញ្ញា សិទ្ធិ បានបន្ថែមទៀតថាបន្ទាប់ពីការសម្តែងនៅក្រៅប្រទេសបានបញ្ចប់លោកនឹងវិលមកបន្តថតភាពយន្ត និងវីដេអូចម្រៀងបម្រើអារម្មណ៍ប្រិយមិត្តខ្មែរក្នុងពេលឆាប់ៗនេះ៕
