.jpg)
ថ្មីៗនេះលោកបណ្ឌិត តាកេស៊ី ណាកាហ្គាវ៉ា ដែលរួមចំណែកស្រាវជ្រាវបុរាណប្រាសាទខ្មែរបានទទួលគ្រឿងឥស្សរិយយសពីព្រះចៅអធិរាជជប៉ុនថ្មី។ រូបថត សហការី
ភ្នំពេញៈ ថ្មីៗនេះលោកបណ្ឌិត តាកេស៊ី ណាកាហ្គាវ៉ា ដែលបានរួមចំណែកជំរុញការអប់រំ និងមិត្តភាពរវាងប្រទេសជប៉ុន និងកម្ពុជាតាមរយៈការជួសជុល និងស្តារឡើងវិញនៃអង្គរ ជាពិសេសនៅបុរាណប្រាសាទបាយ័នក្នុងនាមជាតំណាងរបស់ក្រុម JSA និងក្រុម JASA បានទទួលគ្រឿងឥស្សរិយយសពីព្រះចៅអធិរាជជប៉ុនថ្មី ដោយសារមានស្នាដៃឆ្នើមសម្រាប់សង្គមជាតិ។
តាមសេចក្តីប្រកាសព័ត៌មានពីស្ថានទូតជប៉ុនប្រចាំប្រទេសកម្ពុជាបានឲ្យដឹងថា៖ «កាលពីថ្ងៃទី ៣០ ខែឧសភា ឆ្នាំ ២០១៩ បណ្ឌិត តាកេស៊ី ណាកាហ្គាវ៉ា សាស្ត្រាចារ្យកិត្តិយសនៃសាកលវិទ្យាល័យវ៉ាសេដានៅជប៉ុន បានចូលរួមទទួលគ្រឿងឥស្សរិយយសដោយលោកបានចូលបង្គំគាល់ព្រះករុណា ព្រះចៅអធិរាជ នៅព្រះបរមរាជវាំងក្នុងប្រទេសជប៉ុន បន្ទាប់ពីរដ្ឋាភិបាលជប៉ុនបានប្រកាសឈ្មោះអ្នកទទួលគ្រឿងឥស្សរិយយសសម្រាប់និទាឃរដូវឆ្នាំ ២០១៩ កាលពីថ្ងៃទី ២១ ខែឧសភាកន្លងមកដែលប្រគល់ទៅដល់បុគ្គលមានស្នាដៃឆ្នើមសម្រាប់សង្គមផលប្រយោជន៍សាធារណៈ ឬប្រទេសជាតិ»។
លោកបណ្ឌិត តាកេស៊ី ណាកាហ្គាវ៉ា ខណៈពេលរួមចំណែកសកម្មភាពស្រាវជ្រាវបុរាណប្រាសាទខ្មែរ។ រូបថត សហការី
ប្រភពដដែលនេះបានបន្តថា៖ «ដោយសារលោកបណ្ឌិត តាកេស៊ី ណាកាហ្គាវ៉ា បានរួមចំណែកការជួសជុល ការស្តារឡើងវិញ និងសកម្មភាពស្រាវជ្រាវនៅប្រាសាទព្រះវិហារ និងសំបូរព្រៃគុកដែលជាបេតិកភណ្ឌពិភពលោកនៃអង្គការយូណេស្កូរបស់កម្ពុជាក្នុងនាមលោកគឺជាប្រធានក្រុមនៃសាកលវិទ្យាល័យវ៉ាសេដា។ លោកជាប្រធានក្រុមរដ្ឋាភិបាលជប៉ុនសម្រាប់ការថែរក្សាការពារប្រាសាទអង្គរ (JSA) ចាប់តាំងពីបង្កើតឡើងនៅឆ្នាំ ១៩៩៤ និងក្នុងនាមជាសហប្រធាននៃគម្រោងជប៉ុនអប្សរាការពារប្រាសាទអង្គរ (JASA) ចាប់ពីឆ្នាំ ២០០៥ ព្រមទាំងបណ្តុះបណ្តាលអ្នកជំនាញបច្ចេកទេសកម្ពុជាជាច្រើនរូបសម្រាប់គម្រោងអង្គរជាង ២៥ ឆ្នាំមកនេះ»។
គួរបញ្ជាក់ថាលោកបណ្ឌិត តាកេស៊ី ណាកាហ្គាវ៉ា គឺជាសាស្ត្រាចារ្យនៅសាកលវិទ្យាល័យវ៉ាសេដា និងជានាយកនៃសារមន្ទីរ Open Air Museum MEIJI MURA នៅជប៉ុន ខណៈលោកក៏ជាស្ថាបត្យករដ៏ជំនាញមួយរូបត្រូវបានតែងតាំងជាតំណាងក្រុម JSA និងក្រុម JASA ដែលកំពុងរួមចំណែកផ្នែកជួសជុលការស្តារឡើងវិញ និងស្រាវជ្រាវនៅប្រាសាទបាយ័ន ដែលចាប់ផ្តើមតាំងពីឆ្នាំ ២០១៧ មកនោះផងដែរ។ ឯកិច្ចការនៅប្រាសាទព្រះវិហារលោកបានចូលរួមចន្លោះឆ្នាំ ២០១២ ដល់ឆ្នាំ ២០១៦ និងនៅឯប្រាសាទសំបូរព្រៃគុកវិញគឺលោកបានចូលរួមតាំងពីឆ្នាំ ១៩៩៨ មករហូតដល់ឆ្នាំ ២០១៦ ប្រាសាទនេះត្រូវបានបញ្ចូលជាសម្បត្តិបេតិកភណ្ឌរបស់អង្គការយូណេស្កូ៕
