The Phnom Penh Post Search

Search form




Logo of Phnom Penh Post newspaper Phnom Penh Post - បណ្ណាល័យ​បញ្ញវន្ត បង្កើត​សេវាកម្ម​ស្វែងរក​សៀវភៅ និង​ប្រមូល​ផ្តុំ​ឯកសារ ប្រើ​ពេល​ខ្លី​អាច​រក​សៀវភៅ​បាន​រាប់​ពាន់​ចំណង​ជើង




បណ្ណាល័យ​បញ្ញវន្ត បង្កើត​សេវាកម្ម​ស្វែងរក​សៀវភៅ និង​ប្រមូល​ផ្តុំ​ឯកសារ ប្រើ​ពេល​ខ្លី​អាច​រក​សៀវភៅ​បាន​រាប់​ពាន់​ចំណង​ជើង

Content image - Phnom Penh Post
ការ​រៀបចំ​បណ្ណាល័យ​ដ៏​មានផាសុកភាព​ របស់​ក្រុម​បណ្ណាល័យ​បញ្ញវន្ត​​​។ រូបថត សហ​ការី

បណ្ណាល័យ​បញ្ញវន្ត បង្កើត​សេវាកម្ម​ស្វែងរក​សៀវភៅ និង​ប្រមូល​ផ្តុំ​ឯកសារ ប្រើ​ពេល​ខ្លី​អាច​រក​សៀវភៅ​បាន​រាប់​ពាន់​ចំណង​ជើង

ភ្នំពេញ៖ ដោយសារ​តែ​មាន​គោល​បំណង និង​គំនិត​ចង់​ចែក​រំលែក​ធនធាន​ចំណេះ​ដឹង​តាមរយៈ​ការ​អាន​សៀវភៅ​ដែល​មាន​ចំណេះ​ដឹង​ផ្សេងៗ ជា​ការ​លើក​ស្ទួយ និង​ផ្សព្វផ្សាយ​ឱ្យ​បាន​ទូលំទូលាយ បំផុស​ស្មារតី​ដល់​សាធារណជន ជាពិសេស​សិស្សានុសិស្ស និស្សិត យុវជន​កម្ពុជា តាម​សាលា ឬ​ស្ថាប័ន​នានា ឱ្យ​មាន​ទម្លាប់​អាន និង​ផ្លាស់ប្ដូរ​នូវ​ បទពិសោធ​រវាង​គ្នា និង​គ្នា ក្រុម​ការងារ​បណ្ណាល័យ​បញ្ញវន្ត​បង្កើត​គម្រោង​សេវាកម្ម​ទិញ​សៀវភៅ​ឱ្យ​បណ្ណាល័យ ឬ​ជា​សេវាកម្ម​ស្វែងរក​សៀវភៅ និង​ប្រមូល​ផ្តុំ​ឯកសារ ប្រើ​រយៈពេល​ខ្លី តែ​អាច​រក​បាន​សៀវភៅ​ដល់​ទៅ​រាប់ពាន់​ចំណង​ជើង និង​មាន​លទ្ធភាព​អាច​រកបាន​ដល់​ទៅ​ចំនួន ម៉ឺន​ចំណង​ជើង​ដែរ ប្រកប​ទៅ​ដោយ​ប្រសិទ្ធភាព​ខ្ពស់។

លោក សុខ ឡាក់ (Sok Lak) គឺ​ជា​សហស្ថាបនិក​នៃ​បណ្ណាល័យ​បញ្ញវន្ត (Scholar Library) មាន​វ័យ​ជាង ៣០ ឆ្នាំ ដែល​មាន​ស្រុក​កំណើត​នៅ​រាជធានី​ភ្នំពេញ បាន​បញ្ចប់​ការ​សិក្សា​ថ្នាក់​បរិញ្ញាបត្រ​ចំនួន ២ គឺ​ផ្នែក​អក្សរសាស្ត្រ​ភាសា​អង់គ្លេស នៅ​សាកលវិទ្យាល័យ​កម្ពុជា និង​បរិញ្ញាបត្រ​ផ្នែក​សេដ្ឋកិច្ច​អភិវឌ្ឍ​នៅ​ឯ​សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច។

សហស្ថាបនិក​នៃ​បណ្ណាល័យ​បញ្ញវន្ត លោក សុខ ឡាក់ បង្ហើប​ឱ្យ​ដឹង​ពី​សេវាកម្ម ស្វែងរក​សៀវភៅ និង​ប្រមូលផ្តុំ​ឯកសារ (Acquisitions or Library Acquisitions) របស់​ក្រុម​ការងារ​បណ្ណាល័យ​បញ្ញវន្ត​ថា៖ «សម្រាប់​សេវាកម្ម​មួយ​នេះ យើង​ទើប​តែ​បាន​ដំណើរការ​កាល​ពី​ឆ្នាំ ២០១៩ ដោយ​យើង​អាច​មាន​លទ្ធភាព​ស្វែងរក​សៀវភៅ​សម្រាប់​ការ​អាន ឬ​រៀបចំ​សៀវភៅ​នៅ​ក្នុង​បណ្ណាល័យ​នៃ​សាលារៀន​នានា​ទាំង​រដ្ឋ និង​ឯកជន ឬ​តាម​ស្ថាប័ន​ផ្សេងៗ ដោយ​អាច​រក​បាន​ចំនួន​រាប់រយ​ចំណង​ជើង​តែ​ប៉ុណ្ណោះ។ តែ​សព្វ​ថ្ងៃ​នេះ យើង​អាច​ស្វែងរក​សៀវភៅ​បាន​រាប់ពាន់​ចំណង​ជើង​បាន ក្នុង​រយៈពេល​ខ្លី និង​អាច​រកបាន​ដល់ ម៉ឺន​ចំណង​ជើង​នៃ​សៀវភៅ​ផង​ដែរ»។

Content image - Phnom Penh Post
បណ្តុំ​សៀវភៅ​​រាប់ពាន់​ចំណងជើង ដែល​ក្រុម​បណ្ណាល័យ​បញ្ញវន្ត​អាចប្រើពេលខ្លីរក​បាន​។ រូបថត សហ​ការី

លោក សុខ ឡាក់ ក៏​បាន​ឱ្យ​ដឹង​ពី​សេវាកម្ម​នៃ​ការ​រៀបចំ​បណ្ណាល័យ​ដែរ​ថា៖ «ខ្ញុំ និង​ក្រុម​សហស្ថានិក ៣ រូប​ផ្សេង​ទៀត ព្យាយាម​ខិតខំ រក​វិធីសាស្ត្រ​ក្នុង​ការ​ទាក់ទាញ​ដល់​អ្នក​អាន​គ្រប់ៗ​រូប ទៅ​តាម​មធ្យោបាយ​ដូចជា ប្រើប្រាស់​ចំណេះ​ជំនាញ​ស្ថាបត្យកម្ម​របស់​ស្ថាបនិក​ក្នុង​ការ​រចនា​បណ្ណាល័យ​ឱ្យ​មាន​ភាព​ស្រស់​ស្អាត ច្នៃប្រឌិត និង​មាន​ផាសុកភាព​នៅ​ពេល​បាន​ចូល​ក្នុង​បណ្ណាល័យ​មាន​អារម្មណ៍​កក់ក្ដៅ​អារម្មណ៍​ចង់​សិក្សា ដែល​ធនធាន ប្រកប​ទៅ​ដោយ​បរិយាកាស​វិជ្ជមាន និង​ភាព​ធម្មជាតិ និង​ធនធាន​សម​ស្រប​តាម​បទដ្ឋាន​នៃ​បណ្ណាល័យ​រួមមាន​សម្ភារ​សិក្សា តុ កន្លែង​អាន ទូ​សៀវភៅ គ្រប់គ្រាន់ ក៏​ដូចជា​ការ​រៀបចំ​បែង​ចែក​តាម​ប្រភេទ​មុខវិជ្ជា​សៀវភៅ សំណៅ​ឯកសារ​នានា ប្រកប​ដោយ​ភាព​ងាយ​ស្រួល»។

លោក​បាន​បន្ត​ថា៖ «លើស​ពី​នេះ ក៏​ជា​ការ​បណ្ដុះ​ស្មារតី​អ្នក​អាន​ជំនាន់​ថ្មី ក៏​ជា​វិធីសាស្ត្រ​មួយ​សំខាន់​គួរ​ឱ្យ​កត់​សម្គាល់​មួយ​ផង​ដែរ ​ព្រោះ​យុវជន​មួយ​ចំនួន​គួរ​សិក្សា​ស្វែង​យល់​ឱ្យ​បាន​ច្រើន​ឡើង ដើម្បី​បណ្ដុះ​ចំណេះដឹង​ក្នុង​ការ​អាន​សៀវភៅ​ប្រកប​ដោយ​ប្រសិទ្ធភាព ដោយ​បណ្ដុះ​គំនិត បណ្ដុះ​ស្មារតី​ឱ្យ​មាន​លក្ខណៈ​ពេញ​លេញ ហើយ​ក៏​ជួយ​ធ្វើ​ឱ្យ​សេវាកម្ម​អាន​កាន់​តែ​មាន​ភាព​ទូលំទូលាយ​ច្រើន​ឡើង»។

បើ​តាម​ការ​រៀបរាប់​ឱ្យ​ដឹង​ពី​សហស្ថាបនិក​រូប​នេះ សម្រាប់​រៀបចំ​សៀវភៅ​មាន​ធាតុផ្គុំ ៣ គឺ​ធាតុ​ទី១ ហៅ​ថា​សៀវភៅ​ងាប់ សំដៅ​ទៅ​លើ​សៀវភៅ ដែល​អាច​កាន់​បាន ​អាន​បាន គឺ​ជា​ផ្នែក​មួយ​នៃ​បណ្ណាល័យ យើង​តែងតែ​ហៅ​ថា មជ្ឈមណ្ឌល​ឯកសារ ដែល​ពី​ដើម​រហូត​ដល់​បច្ចុប្បន្ន មាន​សៀវភៅ និង​ឯកសារ ប្រមាណ​ជិត ៤ ពាន់​ក្បាល ដែល​មាន​ជាង ១០០ ប្រភេទ​នៃ​សៀវភៅ សំណៅ​ឯកសារ និង​ចែកចេញ​ជា ៣ ភាសា គឺ​ភាសា​ខ្មែរ ភាសា​អង់គ្លេស និង​ភាសា​ចិន។

Content image - Phnom Penh Post
លោក សុខ ឡាក់ សហស្ថាបនិក​នៃ​បណ្ណាល័យ​បញ្ញវន្ត​។ រូបថត សហ​ការី

ធាតុ​ទី២ សៀវភៅ​ពាក់​កណ្ដាល​សម្រេច គឺ​មិនមែន​ជា​សៀវភៅ​ទេ តែ​សំដៅ​ទៅ​បុគ្គល ឬ​យុវជន​យុវនារី​កម្ពុជា ដែល​គាត់​ស្រេក​ឃ្លាន​ចំណេះដឹង​ចង់​សិក្សា​អភិវឌ្ឍ​សមត្ថភាព​របស់​ខ្លួន ហើយ​បណ្ណាល័យ​បញ្ញវន្ត​នឹង​ចងក្រង​យុវជន​ទាំង​អស់​នោះ ក្លាយ​ជា​ទុន​ក្នុង​ការ​ផ្លាស់​ប្តូរ​ចំណេះដឹង​មក​ជា​សកម្មភាព សិក្សា​ស្វែងយល់ ហើយ​ជំរុញ​លើក​ទឹក​ចិត្ត និង​បណ្ដុះ​បណ្ដាល​ឱ្យ​ពួក​គាត់​អាច​ប្រើប្រាស់​នូវ​ចំណេះដឹង​របស់​ខ្លួន​ឱ្យ​ទូលំទូលាយ ដើម្បី​អភិវឌ្ឍ​ខ្លួន​ឯង និង​សង្គម​ជាតិ។

ចំណែក​ធាតុ​ទី៣ សៀវភៅ​រស់ សំដៅ​ទៅ​លើ​ក្រុម​មនុស្ស​ដែល​មាន​ចំណេះដឹង​ខ្ពស់ មាន​ជំនាញ បទពិសោធ​ច្រើន និង​មាន​ចិត្ត​ចង់​ចែក​រំលែក ផ្ទេរ​ចំណេះដឹង និង​ប្រឹក្សា​យោបល់​អំពី​ការ​សិក្សា ការងារ និង​អាជីវកម្ម​ផ្សេងៗ ទៅ​តាម​មធ្យោបាយ​នានា​ដូចជា សិក្ខាសាលា ព្រឹត្តិការណ៍ផ្សេងៗ និង​សៀវភៅ ដែល​ពួក​គាត់​បាន​ចងក្រង​ទុក​ផង​ដែរ។

សម្រាប់​ព័ត៌មាន​លម្អិត​ស្តីពី​សេវាកម្ម​ស្វែងរក​សៀវភៅ និង​ប្រមូលផ្តុំ​ឯកសារ (Acquisitions or Library Acquisitions) លោក​អ្នក​អាច​ទំនាក់ទំនង​ជា​មួយ​សហស្ថាបនិក​នៃ​បណ្ណាល័យ​បញ្ញវន្ត​របស់​លោក សុខ ឡាក់ ដែល​មាន​ឈ្មោះ​ហ្វេសប៊ុក​ថា Sok Lak (សុខ ឡាក់) ឬ​អាច​សាកសួរ​នាំ​បាន​តាមរយៈ​ប្រព័ន្ធ​ទូរស័ព្ទ​ដែល​មាន​លេខ ០៧៧ ៩៨៨ ៨២៦៕

អត្ថបទគួរចាប់អារម្មណ៍