សៀមរាប: សាកគិតមើលថា បើអ្នកស្ថិតក្នុងល្អាងងងឹតឈឹង ស្រាប់តែអ្នកជំនាញខាងចក្ខុអវិញ្ញាណបាននាំយកអាហារ និងភេសជ្ជៈជាច្រើនមុខឲ្យអ្នកទទួលទានក្រោមបរិយាកាសដែលពុំធ្លាប់ជួបទាល់តែសោះ។
តើអ្នកមានអារម្មណ៍យ៉ាងដូចម្ដេច ដែលឃានវិញ្ញាណរបស់អ្នកស្រង់ក្លិន ហើយជីវហាវិញ្ញាណប្រាប់ពីរសជាតិ ធ្វើឲ្យអ្នកនឹកស្រមៃពីមុខម្ហូបនោះជាអ្វី?
ចង់ទទួលបានបទពិសោធមួយនេះ មិនចាំបាច់ទៅណាឆ្ងាយនោះទេ។ ក្រោយពីបើកសម្ពោធសាខាទី ២ នៅរាជធានីភ្នំពេញ កាលពីប៉ុន្មានឆ្នាំមុន និងសាខាទី ១ នៅក្រុងបាងកក ពេលនេះ ភោជនីយដ្ឋានបម្រើម្ហូបក្នុងទីងងឹតឈឹង ឬ Dine in the Dark បានមកដល់ក្រុងសៀមរាបហើយ។
Dine in the Dark បានសម្ពោធភោជនីយដ្ឋានទី ៣ របស់ខ្លួនក្នុងទឹកដីអង្គរ ជាតំបន់បេតិកភណ្ឌដ៏សម្បូរវប្បធម៌អាហារក្នុងស្រុក ដែលអាចផ្សព្វផ្សាយដល់អម្បូរជាតិសាសន៍មកពីជុំវិញពិភពលោក។
អ្នកនាង សូហ្វី ក្លេមិនសិន (Sophie Clemenson) ប្រធានផ្នែកទំនាក់ទំនងសាធារណៈ បានឲ្យដឹងថា៖ «ភាពងងឹតនេះគឺជាបទពិសោធថ្មីមួយសម្រាប់អ្នក ដែលត្រូវបាត់បង់វិញ្ញាណមួយ ដែលអ្នកធ្លាប់ពឹងអាស្រ័យច្រើនបំផុត។ ដូច្នេះ អ្នកត្រូវពឹងលើវិញ្ញាណរបស់អ្នកដទៃ»។
ភ្ញៀវត្រូវបានជូនទៅកាន់បន្ទប់ងងឹតដោយបុគ្គលិករត់តុ ឬហៅថា «មគ្គុទេសក៍»។ វត្ថុមានពន្លឺ និង ឧបករណ៍អេឡិចត្រូនិក ត្រូវរក្សាទុកផ្សេង។
មគ្គុទេ្ទសក៍ជាអ្នកគ្រប់គ្រងបន្ទប់ងងឹតទាំងស្រុង រួមទាំង ការជូនភ្ញៀវចូលតុ បម្រើអាហារ និងភេសជ្ជៈ ប្រាស្រ័យទាក់ទងជាមួយភ្ញៀវពេលផ្ដល់សេវាកម្ម ព្រមទាំង សម្អាតតុ និងរៀបចំតុឡើងវិញ។ ដូច្នេះ បុគ្គលិកពិការភ្នែក ដែលមានចំនួន ២ នាក់ក្នុងបន្ទប់សម្រាប់ភ្ញៀវ ៣០ នាក់ មិនត្រឹមតែអាចផ្សព្វផ្សាយចំណេះដឹងអំពីជីវិតប្រចាំថ្ងៃរបស់ពួកគេប៉ុណ្ណោះទេ ប៉ុន្ដែបង្ហាញពីជំនាញ ដែលមនុស្សភ្នែកភ្លឺធ្វើមិនបានផងដែរ។
ការប្រាស្រ័យទាក់ទងជាមួយជនពិការទាំងនេះ ជាគោលដៅចម្បងនៃការសម្ពោធភោជនីយដ្ឋាន (DID)។
អ្នកនាងបានបន្ដថា៖ «បទពិសោធនេះមិនត្រឹមតែអាហារដ៏វិសេសប៉ុណ្ណោះទេ ប៉ុន្ដែថែមទាំងជួយពង្រឹងសមត្ថភាពអចក្ខុវិញ្ញាណដែរ។ លើសពីនេះ ភ្ញៀវក៏បានចូលរួមជាមួយយើងក្នុងការជួយដល់សង្គមផងដែរ ដោយការកសាងជំនឿចិត្ដក្រុមបុគ្គលិករត់តុដែលសុទ្ធតែអ្នកខ្វះចក្ខុវិញ្ញាណ»។
ម្ហូប ២ ឈុត តម្លៃ ២៧ ដុល្លារ រួមមាន មុខម្ហូបបែបខ្មែរ និងម្ហូបសម្រាប់អ្នកតមសាច់ ដែលមេចុងភៅនឹងធ្វើការផ្លាស់ប្ដូរ ដើម្បីផ្គាប់ចិត្ដភ្ញៀវ។
ប្រធានផ្នែកទំនាក់ទំនងសាធារណៈ អ្នកនាង សូហ្វី បានលើកឡើងថា៖ «បញ្ជីមុខម្ហូប ដែលរៀបចំឡើងដោយមេចុងភៅបងប្អូនភ្លោះ គីមសាន បានរចនាមុខម្ហូបទាំង ២ ប្រភេទ ដែលមួយឈុតមាន ៥ មុខ លក់ក្នុងតម្លៃ ២៧ ដុល្លារ។ មុខម្ហូបពញ្ញាក់អារម្មណ៍បង្កើតបទពិសោធប្លែកបំផុតសម្រាប់ភ្ញៀវ។ អតិថិជនអាចពង្រឹងសមត្ថភាពអចក្ខុវិញ្ញាណ និងព្យាយាមទស្សន៍ទាយមុខម្ហូបនៅលើចាន ដែលនឹងត្រូវជម្រាបប្រាប់ពេលក្រោយ»។
គ្រប់មុខម្ហូប និងភេសជ្ជៈត្រូវបានបម្រើក្នុងសីតុណ្ហភាពសមល្មម មិនក្ដៅពេក ចៀសវាងការរលាកដល់ភ្ញៀវ។ ភោជនីយដ្ឋានងងឹតឈឹង ដែលទើបសម្ពោធកាលពីថ្ងៃទី ១២ ខែធ្នូ ស្វាគមន៍ភ្ញៀវរៀងរាល់ថ្ងៃ ចាប់ពីម៉ោង ៦ ល្ងាចដល់ម៉ោង ១១ យប់ ស្ថិតនៅលើវិថី ៧ មករា ក្រុងសៀមរាប។ ព័ត៌មានលម្អិតសូមទាក់ទងតាមទូរស័ព្ទលេខ ០៧៧ ៥៥ ០០ ២០៕