ភ្នំពេញ៖ ទោះបីទើបតែឈានជើងចូលជ្រកទ្រនំថ្មីផលិតកម្មហ្គាឡាក់ស៊ីណាវ៉ាត្រាមិនបានប៉ុន្មានឆ្នាំផងនោះ ប្រជាប្រិយភាពរបស់តារាចម្រៀងស្រីតូចច្រឡឹងសំឡេងធ្ងន់កញ្ញា តន់ ចន្ទសីម៉ា មានសម្ទុះយ៉ាងខ្លាំងនៅលើវិថីសិល្បៈចម្រៀង ខណៈបទ «ដណ្តឹងអូនទៅ» ស្រូបបានអ្នកគាំទ្រដល់ទៅ 5.6M Viewers ក្នុងរយៈពេលតែជាង ៣ សប្តាហ៍នៅតាមយូធូប។
អតីតធ្លាប់ជាបេក្ខនារីបរាជ័យក្នុងការប្រជែងកម្មវិធីប្រឡងលំដាប់ពិភពលោក The Voice Cambodia រដូវកាលទី ២ នៅហង្សមាសដោយបានចូលត្រឹមវគ្គ Live Show នៃសប្តាហ៍ទី៣ កញ្ញា តន់ ចន្ទសីម៉ា កំពុងតែឡើងកូដខ្លាំងនៅដើមឆ្នាំ ២០២០ នេះ ដោយឃើញផលិតកម្មបានចេញបទចម្រៀងថ្មីៗជាច្រើន សម្រាប់កញ្ញាក្នុងនោះ ឃើញមានដូចជាបទដែលលេចធ្លោខ្លាំង «ដណ្តឹងអូនទៅ» បទ «ស្រីៗគ្នាយើង» បទ «ជំងឺដាច់លុយ» បទ «មិត្តប្រុសចេះ Marketing» បទ «កាកសង្សារ» បទ «ឡានសារ៉ែន» និងបទ «អរគុណធនាគារ» ជាដើម ដោយភាគច្រើនជាការនិពន្ធ Melody និងទំនុកច្រៀង ដោយកវីឆ្នើមលោក យឹម តាស្រង់ និងមានការនិពន្ធភ្លេងដោយ Thomeet។
តារាចម្រៀងស្រីវ័យ ២២ ឆ្នាំ ដែលមានស្រុកកំណើតនៅខេត្តតាកែវ និងមករស់នៅភ្នំពេញបន្តការសិក្សានៅឧត្តមសិក្សាជានិស្សិតបរិញ្ញាបត្រឆ្នាំទី ៤ ផ្នែកធនាគារនៅសាកលវិទ្យាល័យ Rule រួមទាំងសម្រេចបំណងសិល្បៈផងដែរ។
បន្ទាប់ពីបានបញ្ចប់ការប្រឡងកម្មវិធី The Voice Cambodia រដូវកាលទី ២ មកក៏ផ្តើមអាជីពសិល្បៈមកជាហូរហែ។
ពាក់ព័ន្ទនឹងបទចម្រៀងថ្មី ដែលផ្ទុះការគាំទ្រពីស្រទាប់យុវ័យ គឺបទ «ដណ្តឹងអូនទៅ» នេះ លោក យឹម តាស្រង់ ដែលជាអ្នកនិពន្ធ Melody និងទំនុកច្រៀងនោះក៏បានចេញសារថ្លែងអំណរគុណដល់ប្រិយមិត្តផងដែរថា៖ «អរគុណ! បងប្អូនទាំងអស់ដែលតែងគាំទ្រស្នាដៃនិពន្ធ Melody និងទំនុកច្រៀង របស់ខ្ញុំបាទចាប់តាំងពីដើមរហូតដល់ពេលនេះ សូមបងប្អូនចុច Subscript និងចុចសញ្ញាកណ្តឹងលើ Youtube ផ្លូវការរបស់ខ្ញុំនេះ ដើម្បីទទួលនូវការចែករំលែកថ្មីៗអំពីខ្ញុំ នាពេលឆាប់ៗខាងមុខនេះ នូវវីដេអូដែលនឹងត្រៀមចេញជាច្រើន។ សូមអរគុណ»។
កញ្ញា តន់ ច័ន្ទសីម៉ា ក៏ធ្លាប់បញ្ជាក់ពីភាពខុសគ្នារវាងជាតារាឯករាជ្យ និងជ្រកផលិតកម្មដែរថា៖ «តាមពិតទៅជាតារាឯករាជ្យ ខ្ញុំក៏មានការគាំទ្រច្រើនដែរ ប៉ុន្តែមិនសូវមានអ្នកស្គាល់មុខទេ ភាគច្រើនស្គាល់តែបទចម្រៀង និងឈ្មោះព្រោះគ្មាន MV។ ច្រៀងនៅផលិតកម្មវិញ ខ្ញុំគិតថា ការផ្សព្វផ្សាយគឺមានស្តង់ដា ជាងចេញ MV ផ្ទាល់ខ្លួន ខណៈអ្នកគាំទ្រក៏មានគេស្គាល់ច្រើនជាងមុន ហើយយើងមានភាពកក់ក្តៅ ដោយសារតែមានបទចម្រៀងរហូតមិនពិបាកនោះទេ»៕