ភ្នំពេញ៖ បង្កង ប៉េងប៉ោះ ការ៉ុត ម្ទេសប្លោក ផ្សិតស ខ្ទឹមស ខ្ទឹមក្រហម រំដេង ស្លឹកក្រូច គល់ស្លឹកគ្រៃ ម្ទេសឆា និងជីរវ៉ាន់ស៊ុយ គឺជាគ្រឿងផ្សំមុខម្ហូបតុមយ៉ាំបង្កង ដែលត្រូវបានរៀបចំ ១ ឈុតជាស្រេចតម្រូវអ្នកមានបំណងចង់ស្ល តែមិនចង់ទិញគ្រឿងគ្រៅច្រើនមុខដាច់ដោយឡែកពីគ្នា។
សម្រាប់ស្ដ្រីមេផ្ទះខ្ជិលឡើងផ្សារដោយជាប់រវល់ធ្វើការ មើលថែកូន ឬបារម្ភពីការជួបជុំមនុស្សច្រើននៅក្នុងផ្សារ បន្លែស្រុកជាផ្សារបន្លែ ត្រីសាច់អនឡាញទើបបង្កើតឡើងប្រមាណ ២ សប្ដាហ៍ ក្នុងការដឹកជញ្ជូនឈុតម្ហូបអាហារបន្លែស្រស់ៗ ត្រី សាច់មាន់ សាច់គោ សាច់ជ្រូក និងគ្រឿងសមុទ្រទៅដល់មុខទ្វារផ្ទះអតិថិជន។
អ្នកស្រី នារី រតនៈ ជាម្ចាស់ហាងបន្លែស្រុកបានប្រាប់ ភ្នំពេញ ប៉ុស្ដិ៍ ថា៖ «ខ្ញុំចង់ឲ្យស្ដ្រីមេផ្ទះគ្រប់រូបងាយស្រួលចំពោះជម្រើសមុខម្ហូបប្រចាំថ្ងៃ ដោយមិនចាំបាច់គិតគូរច្រើនថា ត្រូវស្លអ្វីជាពិសេស ពួកគាត់មិនចាំបាច់ធ្វើដំណើរទៅផ្សារផ្ទាល់ ដើម្បីបញ្ចៀសការជួបជុំអ៊ូអរ ដែលគួរឲ្យព្រួយបារម្ភចំពោះគម្លាតសុវត្ថិភាព»។
ក្រៅពីឈុតម្ហូបតុមយ៉ាំបង្កងតម្លៃ ២៣ ០០០ រៀល នៅមានតុមយ៉ាំគ្រឿងសមុទ្រតម្លៃ ២៣ ០០០ រៀល ម្ជូរយួនបង្កង តម្លៃ ២៣ ០០០ រៀល ម្ជូរយួនត្រីប្រា តម្លៃ ១៣ ០០០ រៀល ឆាម្ទេសប្លោកតម្លៃ ១០ ០០០ រៀល ឆាដើមខាត់ណាតម្លៃ ១០ ០០០ រៀល ឈុតស្ងោរត្រឡាចតម្លៃ ១០ ០០០ រៀល និងឈុតម្ជូរគ្រឿងសាច់គោ តម្លៃ ១៣ ០០០ រៀលជាដើម។
ស្ដ្រីវ័យ ៣០ ឆ្នាំ ជាម្ចាស់ហាងបន្លែស្រុកបានឲ្យដឹងថា៖ «ឈុតមុខម្ហូបរៀបចំស្រេច មានទាំងបន្លែ ត្រីឬសាច់ជាមួយគ្រឿងទេសផ្សេងៗ ទទួលបានក្នុងសមាជិកគ្រួសារតូច ដែលមានសមាជិកពី ៣ ទៅ ៤ នាក់។ ទៅដល់ផ្ទះគ្រាន់តែលាង រួចហាន់ស្លតែម្ដង ដោយមិនចាំបាច់រកគ្រឿងគ្រៅឲ្យគ្រប់មុខនោះទេ»។
អ្នកស្រី រតនៈ បានឲ្យដឹងថា៖ «ខ្ញុំគិតឃើញយូរហើយ តែអត់ទាន់មានពេល។ ដល់ពេលមានជំងឺកូវីដ ខ្ញុំក៏ចាប់ផ្ដើមដំណើរការផ្សារបន្លែស្រុក ដើម្បីដឹកជញ្ជូនឲ្យអតិថិជនដែលអត់ចង់ទៅផ្សារ»។
ផ្ដើមពីអ្នកដឹកជញ្ជូនចំនួន ២ នាក់ ពួកគេវិលកង់ម៉ូតូជាប់ ដោយបុគ្គលិកនីមួយៗអាចដឹកគ្រឿងបន្លែ ត្រីសាច់ និងមុខម្ហូបឈុតបាន ៤ ទៅ ៥ ផ្ទះ ដែលភាគច្រើនជាអតិថិជនក្រុងភ្នំពេញ។
ក្រៅពីឈុតមុខម្ហូបរៀបចំស្រេចបន្លែស្រស់ៗ ជាកសិផលរបស់ពលរដ្ឋរស់នៅតាមមាត់ទន្លេនៃស្រុកស្អាង និងព្រៃស្វា រួមទាំងត្រីសាច់គ្រប់ប្រភេទ ត្រូវបានរៀបចំ និងថតឌីហ្សាញយ៉ាងស្រស់ស្អាតអមដោយឈ្មោះជាភាសាខ្មែរ និងអង់គ្លេសក៏ដូចជាតម្លៃដែលត្រូវបានធ្វើបច្ចុប្បន្នភាពរៀងរាល់ថ្ងៃ។
អ្នកស្រី រតនៈ បាននិយាយថា៖ «កុម្ម៉ង់ប៉ុន្មានក៏យើងខ្ញុំដឹកជញ្ជូនឲ្យភ្ញៀវដែរ ចាប់ពីត្រកួន ១ គីឡូក្រាមតម្លៃ ៨ ០០០ រៀល កញ្ឆែត តម្លៃ ១ ម៉ឺនរៀល ស្ពៃក្ដោបតម្លៃ ៦ ០០០ រៀល រហូតដល់បង្កងតម្លៃ ៥ ម៉ឺនរៀល មឹក ៤ ម៉ឺនរៀល ឆ្អឹងជំនីរជ្រូកតម្លៃ ៣៥ ០០០ រៀល ជើងជ្រូក ៣ ម៉ឺនរៀល សាច់គោ (សាច់ស្រួយ) ៥ ម៉ឺនរៀល ទា ១៨ ០០០ រៀល ១ គីឡូក្រាម មាន់ស្រែ ៣១ ០០០ រៀល ១ គីឡូក្រាម ពងទា ១០ គ្រាប់ ៦ ៥០០ រៀល និងត្រីតម្លៃចាប់ពី ១៥ ០០០ រៀល ១ គីឡូក្រាម»។
តម្លៃកសិផលរបស់កសិករក្នុងស្រុករបស់ខ្លួនមានតម្លៃមិនខ្ពស់ជាងទីផ្សារប៉ុន្មានទេ ហើយក៏ថោកជាងតម្លៃទំនិញនៅផ្សារទំនើប ដែលជាជម្រើសដ៏ស័ក្ដិសមសម្រាប់ពលរដ្ឋទូទៅ។
នារី រតនៈ បញ្ជាក់ថា សេវាកម្មដឹកជញ្ជូនរបស់អ្នកស្រីត្រូវបានធ្វើឡើងសម្រាប់រាល់ការកុម្ម៉ង់ទាំងអស់ មិនថាតែ ១ ឬ ២ មុខនោះទេ ដោយតម្លៃដឹកជញ្ជូនមានចន្លោះពី ៤ ០០០ ទៅ ៨ ០០០ រៀល ទៅតាមទីផ្សារភូមិសាស្ដ្រ។
ម្ចាស់ហាង ដែលទទួលលក់តែបន្លែរបស់អ្នកស្រុករូបនេះ បានឲ្យដឹងថា ឈុតមុខម្ហូបរៀបចំស្រស់ទទួលបានការពេញនិយមខ្លាំងចំពោះអតិថិជន ដែលសមល្មមសម្រាប់ក្រុមគ្រួសារតូច។
អ្នកស្រី រតនៈ ជឿជាក់ថា កសិផលរបស់ពលរដ្ឋក្នុងស្រុកទាំងនៅស្អាង និងភូមិព្រៃស្វា ដែលដាំដុះជាលក្ខណៈគ្រួសារ មិនប្រើប្រាស់ជីគីមីហួសកម្រិតដែលអាចទទួលយកបាន ហើយវាជាទង្វើគាំទ្រផលិតផលក្នុងស្រុក និងជួយជ្រោមជ្រែងលើកស្ទួយជីវភាពរបស់ពួកគេផងដែរ។
អ្នកស្រី បាននិយាយថា៖ «ខ្ញុំជឿថា ពួកគាត់មិនប្រើប្រាស់ជីគីមីច្រើននោះទេពីព្រោះពួកគេមិនមានលទ្ធភាពទិញជីមកប្រើច្រើន ហើយពួកគេនៅតែបន្ដប្រើប្រាស់ជីធម្មតាច្រើនជាង។ ខ្ញុំមិនច្បាស់ថា ខ្ញុំអាចជួយលក់កសិផលរបស់ពួកគាត់បានប៉ុន្មានគីឡូក្រាមនោះទេ ប៉ុន្ដែក្នុង ១ ថ្ងៃ ខ្ញុំអាចវ៉ៃចេញបន្លែអស់ ១ រ៉ឺម៉ក»។
ផ្សារអនឡាញ បន្លែស្រុក ស្ថិតនៅទីក្រុងតាខ្មៅ និងបើកទទួលការកុម្ម៉ង់ពីម៉ោង ៩ ព្រឹកដល់ម៉ោង ៥ ល្ងាច។
ព័ត៌មានបន្ថែមមាននៅទំព័រហ្វេសប៊ុក Bonle Srok ឬទូរស័ព្ទ ០៧៨ ៩៧៩ ៨៥៥៕