ក្រុងចនណេសប៊ឺក: ក្រុមអ្នកស្រាវជ្រាវបាននិយាយថា ស្ដ្រីដែលទទួលកម្ដៅសីតុណ្ហភាព និងរលកកម្ដៅខ្លាំងអំឡុងពេលមានគភ៌ទំនងជាប្រសូតកូនមិនគ្រប់ខែ ឬស្លាប់ទារកក្នុងផ្ទៃ។
ពួកគេបានរាយការណ៍ក្នុងព្រឹត្ដិបត្រវេជ្ជសាស្ដ្រ BMJ ថា លទ្ធផលនេះ ដែលមានទំនាក់ទំនងស្និទ្ធនឹងភាពក្រីក្រ និងស្ដ្រីរស់នៅក្នុងតំបន់ត្រូពិក អាចជះឥទ្ធិពលកាន់តែអវិជ្ជមានពីបញ្ហាបម្រែបម្រួលអាកាសធាតុ ជាពិសេស អំឡុងពេលប៉ះផ្ទាល់នឹងរលកកម្ដៅញឹកញយ។
ការសិក្សាបានធ្វើការសន្និដ្ឋានថា៖ «សូម្បីតែមានការកើនឡើងតិចតួចក៏អាចជះឥទ្ធិពលធំដល់សុខភាពសាធារណៈ ខណៈការស្រូបកម្ដៅសីតុណ្ហភាពក្ដៅខ្លាំង កាន់តែជាបញ្ហាសាមញ្ញ និងកាន់តែច្រើនឡើងៗដែលចៀសមិនផុត»។
យោងតាមអង្គការសុខភាពពិភពលោក បានបង្ហាញថា រៀងរាល់ឆ្នាំ ទារកប្រមាណ ១៥ លាននាក់ បានប្រសូតមិនគ្រប់ខែ ដែលនាំឲ្យជួបបញ្ហាស្លាប់ចន្លោះអាយុក្រោម ៥ ឆ្នាំ។
អត្រាមរណៈនេះត្រូវបានផ្ដោតសំខាន់នៅលើបណ្ដាប្រទេសកំពុងអភិវឌ្ឍ ជាពិសេសតំបន់អាហ្វ្រិក។
ដើម្បីកំណត់ផលប៉ះពាល់នៃកម្ដៅខ្លាំងលើដំណើរមានគភ៌ ក្រុមអ្នកស្រាវជ្រាវអន្ដរជាតិ ដែលដឹកនាំដោយ Matthew Chersich មកពីវិទ្យាស្ថានសុខភាពបន្ដពូជ និងហ៊ីវ Wits ក្នុងទីក្រុងចនណេសប៊ឺក បានតាមដានការសិក្សាចំនួន ៧០ លើក នៅតាមប្រទេសអភិវឌ្ឍ ប្រទេសក្រីក្រ និងប្រទេសដែលសម្បូរប្រជាជនមានចំណូលមធ្យម។
ក្នុងការសិក្សាចំនួន ៤៧ ដែលផ្ដោតលើការប្រសូតមិនគ្រប់ខែ ៤០ បានរាយការណ៍ថា ស្ដ្រីរមែងប៉ះពាល់ទៅនឹងកម្ដៅសីតុណ្ហភាពខ្លាំង។
បើយោងតាមការរកឃើញថ្មីៗ អត្រាកំណើតមិនគ្រប់ខែបានកើនឡើងជាមធ្យម ៥ភាគរយក្នុងកម្រិតសីតុណ្ហភាពកើនឡើង ១ អង្សាសេ និងដល់ ១៦ ភាគរយ អំឡុងពេលប៉ះពាល់នឹងរលកកម្ដៅ។
ការបម្រែបម្រួលសីតុណ្ហភាពសកល ត្រូវបានមើលឃើញថា បានធ្វើឲ្យសីតុណ្ហភាពកើនឡើង ១ អង្សាសេ ជាមធ្យមក្នុងរយៈពេលមួយសតវត្សរ៍ចុងក្រោយ និងកាន់តែក្ដៅនៅតំបន់វាលគ្មានទឹក៕ AFP/HR