ក្រុងហូជីមិញ៖ ឡេបកស្បែក អាពាហ៍ពិពាហ៍កុមារភាព ការអប់រំអន់ខ្សោយ ទាំងនេះជាអ្វីដែលម៉ូដែល និងអ្នកយុទ្ធនាការអក្សរសាស្ដ្រវៀតណាម H''Hen Nie ពុះពារគំនាបប្រពៃណី និងប្ដេជ្ញាបង្ហាញក្មេងជំនាន់ក្រោយនូវបរិបទថ្មី។
រាជនីសម្ផស្ស Miss Universe Vietnam ឆ្នាំ ២០១៧ ដែលមកពីក្រុមកុលសម្ព័ន្ធ Ede ភាគកណ្ដាលខ្ពង់រាប មានអាយុ ១៤ ឆ្នាំ នៅពេលម្ដាយរបស់នាង ដែលជាកសិករទទូចឱ្យនាងរៀបការ។
បវរកញ្ញាវ័យ ២៨ ឆ្នាំរូបនេះប្រាប់ AFP ថា៖ «ខ្ញុំពិតជាភ័យខ្លាចចំពោះការរៀបការណាស់។ ពេលនោះ ខ្ញុំចូលចិត្ដហែលទឹក លេងទោងរំអិល និងដើរលេងព្រៃ»។
បច្ចុប្បន្នក្នុងនាមជាស្ដ្រីជនជាតិភាគតិចដំបូងដែលបានគ្រងមកុដរាជនីវៀតណាម H''Hen ត្រូវបានចាត់ទុកជានិមិត្តរូប ដែលបន្ដតំណាងឱ្យវៀតណាមលើឆាកអន្ដរជាតិនៃពិភព Miss Universe និងបានទទួលចំណាត់ថ្នាក់លេខ ៥។
នាងក្លាយជាអ្នកតំណាងអង្គការពិភពលោក Room to Read ដែលផ្ដោតលើការអប់រំក្មេងស្រីក្នុងបណ្ដាប្រទេសកំពុងអភិវឌ្ឍន៍។ វាជាបញ្ហាកាន់តែរសើប ខណៈវិបត្ដិកូរ៉ូណានៅតែគ្មានសមភាពទូទាំងសកលលោក។
ជាមួយបងប្អូន ៦ នាក់ កញ្ញា H''Hen បានដឹងច្បាស់ថា ខ្លួនជាស្រី និងអម្បូរកុលសម្ព័ន្ធ មិនអាចរើខ្លួនរួចពីសម្ពាធប្រពៃណីឡើយ តែនាងនៅតែបន្ដជម្នះគ្រប់ឧបសគ្គ សូម្បីតែសម្ផស្សក៏ជាប្រធានបទត្រូវតស៊ូផងដែរ។
ពណ៌សម្បុរស្រអែមត្រូវបានចាត់ទុកជាសម្រស់មិនសូវនិយមនៅទូទាំងតំបន់អាស៊ី។ ក្រោយមានការតវ៉ា Black Lives Matter ជាសកល ការរិះគន់ចាប់ផ្ដើមផ្ទុះឡើងប្រឆាំងជំនឿថា សម្បុរស្បែកសជាជម្រើសដ៏ស្រស់ស្អាត។
នាងធ្វើជាអ្នកបម្រើដើម្បីរកប្រាក់បង់ថ្លៃសិក្សា និងផ្គត់ផ្គង់គ្រួសារ។ រយៈពេលប៉ុន្មានឆ្នាំក្រោយនាងរៃអង្គាសប្រាក់រាប់ម៉ឺនដុល្លារកសាងបណ្ណាល័យនៅតាមបណ្ដាខេត្ដដាច់ស្រយាល និងឧបត្ថម្ភក្មេងស្រីនៅទូទាំងតំបន់អាស៊ី និងអាហ្វ្រិកឱ្យរៀនដល់ចប់ថ្នាក់វិទ្យាល័យ។
នាងថា៖ «បើគាត់ជាសិស្ស ខ្ញុំលើកទឹកចិត្ដគាត់ឱ្យសិក្សាបន្ថែម។ បើគាត់ជួបការលំបាក ខ្ញុំជួយបង់ថ្លៃសិក្សាខ្លះ។ ខ្ញុំចែករំលែកសារនេះ និងអាចផ្លាស់ប្ដូរជីវិតមនុស្សខ្លះ»៕ AFP/HR