The Phnom Penh Post Search

Search form




Logo of Phnom Penh Post newspaper Phnom Penh Post - បាឋក​ថា​ស្ដីពី​សមធម៌​សង្គម ការ​ចងចាំ និង​ភាព​ភ័យ​ខ្លាច​




បាឋក​ថា​ស្ដីពី​សមធម៌​សង្គម ការ​ចងចាំ និង​ភាព​ភ័យ​ខ្លាច​

Content image - Phnom Penh Post
រូប​ថត​ស្រ្តី​ដេក​លើ​គ្រែមាន​ខ្សែ​ចង​ចាក់​ស្រែះ ស្តែង​ចេញ​ពី​សភាព​ភ័យ​ខ្លាច​។ Sa Sa Art Projects

បាឋក​ថា​ស្ដីពី​សមធម៌​សង្គម ការ​ចងចាំ និង​ភាព​ភ័យ​ខ្លាច​

ភ្នំពេញៈ នៅឯ​វិចិត្រ​សាល​ ស-ស​ នឹង​មានការ​ធ្វើ​បាឋក​ថា​មួយ​របស់​វិចិត្រ​ករស្រី​ដ៏ល្បី​ឈ្មោះ នាក់ សុផល ដែល​ជាការ​លើកឡើង​ស្តី​អំពី​ស្ថានភាព «​សមធម៌​សង្គម ការ​ចងចាំ​ និង​ភាពភ័យ​ខ្លាច​»​ ដោយ​ការ​ប្រើរូប​ថតរៀបចំ​ឡើង​ដើម្បី​បង្ហាញ​នូវ​ទិដ្ឋភាព​ទាំង​អស់នោះ​ និងតាម​តួអង្គ​ជាមនុស្ស​ដែល​មាននៅ​ក្នុង​រូបថត​នោះ​តែម្តង។

កម្មវិធី​ធ្វើនៅ​ថ្ងៃសុក្រ​ទី ២៩ ខែ​មេសា ឆ្នាំ ២០១៦ ខាង​មុខ​នេះ​ ចាប់​ពី​វេលា​ម៉ោង ៦ កន្លះ​ល្ងាច​តទៅ។

បាឋក​ថា​នេះនឹង​បង្ហាញ​នូវអ្វី​ដែលជា​កម្រងនៃ​បទពិសោធ​ជីវិត​ និងការ​ខិតខំ​បង្កើត​ស្នាដៃ​ជោគជ័យ​នៅ​ក្នុង​វិស័យ​សិល្បៈ​ទទួល​បាន​ផល​ជា​ផ្លែផ្កា គួរឲ្យ​កត់សម្គាល់​របស់​វិចិត្រករ​ស្រី​ឈ្មោះ កញ្ញា នាក់ សុផល ដែល​មានទី​កំណើត​នៅឯ​ខេត្ត​តាកែវ​ និង​កើត​ឆ្នាំ ១៩៨៩។

Content image - Phnom Penh Post
វិចិត្រករ​ស្រី នាក់ សុផល និង​ស្នាដៃ​វិចិត្រកម្ម​។ Sa Sa Art Projects

បើតាម​ម្ចាស់​ប្លុក​វិចិត្រសាល​ ស-ស​ បាន​បង្ហាញ​នូវកម្រង​ស្នាដៃ​សំខាន់ៗ​របស់​វិចិត្រករស្រី​ឲ្យដឹង​ត្រួសៗថា៖ «ស្នាដៃ​ពិព័រណ៍​ទោល​មួយ​មាន​ឈ្មោះ «អ្នក​ណា?» របស់​កញ្ញា នាក់ សុផល ត្រូវ​បានយក​ទៅដាក់​តាំង​នៅឯវិចិត្រ​សាល​ឈ្មោះ​ Le Douches la Gallery នៅ​ទីក្រុង​ប៉ារីស ប្រទេស​បារាំង​នា​ដើម​ឆ្នាំ ២០១៦ នេះ ខណៈឯ​ស្នាដៃ​ឈ្មោះ «Phnom Penh Renaissance» ត្រូវ​បានយក​ទៅ​ចូលរួម​ក្នុង​កម្មវិធី​មហោស្រព Lille 3000 នៅ​ឯសារ​មន្ទីរ Hospice Comtesse នៅប្រទេស​បារាំង​កាលពី​ឆ្នាំ ២០១៥ ផងដែរ។

ក្រៅពី​នេះវិចិត្រករ​ស្រី​ នាក់ សុផល​ ក៏បាន​ចូលរួម​នៅ​ក្នុង​កម្មវិធី​ និវាស​ដ្ឋាន​សិល្បៈ ​ជាមួយនឹង​គម្រោង «​ចងចាំ II» នៅ​ទីក្រុង​ប្រ៊ីសប៊េន​ ប្រទេស​អូស្រ្តាលីនៅ​ឆ្នាំ ២០១៥​ និងជា​មួយ​នឹង​កម្មវិធី​ S-AIR នៅ​ទីក្រុង Sapporo ប្រទេស​ជប៉ុន​នាឆ្នាំ ២០១៦ នេះ​ទៀតផង។

ចំណែក​ឯពិព័រណ៍​ជា​ក្រុម​ឈ្មោះថា «Immeasurable» នៅ​ឯវិចិត្រ​សាលនៃ​សាកលវិទ្យា​ល័យ​ក្រុង​បាងកក​នៅដើម​ឆ្នាំ ២០១៦»។​

ម្ចាស់​ប្លុក​ដដែល​នេះ​បានបន្ត​ទៀត​ថា៖ «កញ្ញា នាក់ សុផល មាន​សមិទ្ធ​ផល​ស្នាដៃ​សិល្បៈ​ល្អច្រើន​នៅ​ឆ្នាំ ២០១៥ ដូចជា​ស្នាដៃ​ឈ្មោះ​ថា «PAUSE» បង្ហាញ​នៅឯ​មហោ​ស្រព​រូបថត​ក្រុង​បាងកក​នៃ​ប្រទេស​ថៃនៅ​មជ្ឈមណ្ឌល​សិល្បៈ និង​វប្បធម៌​បាងកក ខណៈ​កម្រង​ស្នាដៃ​ឈ្មោះ​ថា «ចង​ចាំ II» តាំងនៅ​ទី​ក្រុង​ប្រ៊ីសប៊េន​ ក្នុង​ប្រទេស​អូស្រ្តាលី នៅក្នុង​វិចិត្រ​សាល Logan និង​កម្មវិធិ​មហោ​ស្រព​រូប​ថតភ្នំពេញ​នៅ​សាកល​វិទ្យាល័យ​ភូមិន្ទ​វិចិត្រ​សិល្បៈ»។

​វិចិត្រ​ករស្រី​វ័យ ២៧ ឆ្នាំ នាក់ សុផល បានបញ្ចប់​ការ​សិក្សា​ជំនាញ​វិចិត្រកម្ម​នៅ​ឯ​សាកល​វិទ្យាល័យ​ភូមិន្ទ​វិចិត្រ​សិល្បៈនា​ឆ្នាំ ២០១២​ និង​បាន​បង្កើត​នូវស្នាដៃ​វិចិត្រ​កម្ម​របស់​ខ្លួនជា​ហូរហែត​រៀងមក។

ជាក់​ស្ដែង សម្រាប់​សមិទ្ធផល​ដំបូង​ឆ្នាំ ២០១៣ គឺកម្រង​ស្នាដៃ​ឈ្មោះ​ «សន្លឹក​» ដាក់​តាំង​ពិព័រណ៍​នៅ​វិចិត្រ​សាល​រមៀត​នៅក្នុង​រាជធានី​ភ្នំពេញ​ ហើយ​ស្នាដៃ «Behind» នៅឯ​វិចិត្រ​សាល​ចាវ៉ា ខណៈ​កញ្ញា​ក៏ជា​វិចិត្រករ​ទទួល​បាន​ជយ​លាភី​រូបថត​ពីមហោ​ស្រព​រូបថត​អង្គរឆ្នាំ ២០១៣ ដែរ៕​

អត្ថបទគួរចាប់អារម្មណ៍