.jpg)
ស្រាក្រឡុក Singapore Sling រក្សារូបមន្តចាស់ប្រើគ្រឿងផ្សំច្រើនៗ។ រូបថត AFP ហុង មិនា
សិង្ហបុរី: ស៊ីងហ្គាពួរស្លីង (Singapore Sling) ជាស្រាក្រឡុកដ៏ល្បីល្បាញក្នុងទីក្រុងត្រូវបានអ្នកក្រឡុកស្រាប្រើគ្រឿងផ្សំថ្មីក្នុងគ្រារូបមន្ដចាស់លែងក្លាយជារសជាតិពេញនិយមសម្រាប់ទេសចរជំនាន់ថ្មី។
ភេសជ្ជៈពណ៌ផ្កាឈូក និងប្រើស្រាជីនច្រើនធ្លាប់ជាស្រាក្រឡុកដ៏ពេញនិយមសម្រាប់ភ្ញៀវមកស្នាក់អាស្រ័យសណ្ឋាគារសម័យអាណានិគម Raffles Hotel ជាទីដែលបម្រើភេសជ្ជៈនេះនៅបារ៍ប្រវត្ដិសាស្ដ្ររបស់ខ្លួន Long Bar។
លោក គ្រីស្ទៀន វ៉េសបេល ជានាយកគ្រប់គ្រងទូទៅសណ្ឋាគារបានប្រាប់ AFP ថា៖ «យើងលែងប្រើគ្រឿងផ្អែម ហើយយើងរក្សាតុល្យភាពរសជាតិកាន់តែប្រសើរ»។
វានៅតែក្រឡុកឡើងពីស្រាជីន ស្រាឈើរី ទឹកម្នាស់ និងស្រាល្វីង តែប្រើគ្រឿងផ្សំច្រើនៗដែលអ្នកជំនាញរូបមន្ដអះអាងថា រសជាតិកាន់តែគាប់ចិត្តមនុស្សសម័យថ្មី។
ស្រាក្រឡុកស៊ីងហ្គាពួរស្លីងនេះមានប្រវត្តិកកើតតាំងពីឆ្នាំ ១៩១៥។ រូបថត AFP
បារ៍ Long Bar ថ្មីៗនេះបានបើកទ្វារស្វាគមន៍ភ្ញៀវក្រោយពីជួសជុល កែលម្អ ហើយក៏ជាវេលាត្រូវប្រកាសថា ស៊ីងហ្គាពួរស្លីង បានផ្លាស់ប្ដូរដែរ។ ស្រាក្រឡុកនេះត្រូវបានបង្កើតឡើងដំបូងក្នុងឆ្នាំ ១៩១៥ នៅបារ៍នេះដែលជាទីឋានពេញនិយមសម្រាប់ក្រុមអាណានិគមអង់គ្លេស និងម្ចាស់ចម្ការកៅស៊ូមកពីម៉ាឡាយ៉ា។
ពេលនោះវាជាស្រាក្រឡុកមិនសម្រាប់ស្ដ្រីភេទផឹកនៅទីសាធារណៈទេ តែស៊ីងហ្គាពួរស្លីង ដែលមានរូបឆោមស្រស់ស្អាតរហូតដល់គេជឿថា វាជាទឹកផ្លែឈើថែមទៀតនោះ កាន់តែទទួលបានប្រជាប្រិយភាពខ្លាំងក្លា។
ក្រុមអ្នកផលិតសង្ឃឹមថា រូបមន្ដកែកុនថ្មីនឹងនៅតែអាចផ្គាប់ចិត្ដភ្ញៀវទាំងជាតិ និងអន្ដរជាតិ។ ជាក់ស្ដែង បារ៍បុរាណនេះនៅតែទទួលភ្ញៀវច្រើនសន្ធឹកដែលភាគច្រើនរីករាយនឹងរសជាតិ ស៊ីងហ្គាពួរស្លីង បែបថ្មី។
ភ្ញៀវទេសចរអង់គ្លេសអ្នកនាង Bridget Stevenson បាននិយាយថា៖ «ការផ្សំគ្រឿងដ៏ស្រស់ស្អាត និងរសជាតិឆ្ងាញ់ពិសា ហើយខ្ញុំចូលចិត្ដមកទីនេះ»៕ HR
