.jpg)
ក្រុងរ៉ូម: សារសរសេរដៃនៅលើបដាបង្ហាញយ៉ាងច្បាស់ៗថា ការបើកមាត់និយាយអំពីវីរុសកូរ៉ូណា ការបិតប្រទេស ឬប្រធានបទវិទ្យសាស្ដ្រស្ដីពីវីរុសអីគឺត្រូវហាមឃាត់ទាំងអស់។
ក្នុងបារ៍ដ៏តូចនៅជាយក្រុងរ៉ូមនេះ អ្នកគ្រប់គ្រងរំពឹងថានឹងផ្ដល់ឲ្យអតិថិជននូវអារម្មណ៍សាកស្រានមួយភ្លែតពីបញ្ហាវិបត្ដិកូវីដសកល ខណៈពួកគេកំពុងក្រេបកាហ្វេ។
គ្រីស្ទីណា ម៉ាទីអូលី ជាអ្នកគ្រប់គ្រងបារ៍ the Feeling បានប្រាប់ AFP ថា៖ «យើងបានជជែកអំពីប្រធានបទនេះដដែលៗរាប់ខែមកហើយ ដូច្នេះយើងបានជ្រើសរើសបរិយាកាសគ្មានការរំឭកពីជំងឺឆ្លងនេះ»។
ជាប្រទេសនៅអឺរ៉ុបដំបូងដែលរងនូវវិបត្ដិកូវីដ អ៊ីតាលីស្ថិតនៅក្រោមស្រមោលនៃកូវីដលើសគេ និងរងនូវវិធានការរឹតត្បិតខ្លាំងជាងគេនៅអឺរ៉ុប។ ក្រោយពីវិស្សមកាលរដូវក្ដៅប៉ុន្មានសប្ដាហ៍ ដែលជីវិតរស់នៅស្ទើរតែវិលទៅរកសភាពដើម វិបត្ដិកូវីដបានត្រឡប់មកជាថ្មី រួមទាំងសេចក្ដីមរណៈកើនឡើងខ្លាំងផងដែរ។
អ្នកស្រី ម៉ាទីអូលី បាននិយាយថា៖ «មិនមែនយើងមិនដឹង មិនយល់ចំពោះការលំបាកដែលពិភពលោកកំពុងប្រឈមនោះទេ តែយើងត្រូវការសម្រាកបន្ដិចប៉ុណ្ណោះ»។
អ្នកស្រីបានឲ្យដឹងថា អតិថិជនភាគច្រើននៅក្នុងបារ៍មានប្រតិកម្មវិជ្ជមានចំពោះបម្រាមនោះ។ ប្រ៊ូណា ព្យាហ្សា ជាម៉ូយប្រចាំដែលមកទិញសំបុត្រឆ្នោតផ្សងសំណាងគិតថា វាជាគំនិតល្អ។
បុរសវ័យ ៥៨ ឆ្នាំរូបនេះ បាននិយាយថា៖ «យើងពិតជាធុញទ្រាន់នឹងការនិយាយច្រំដែលអំពីរឿងកូវីដ។ សម្រាកខ្លះទៅ ពីព្រោះប្រធានបទមួយនេះតែងតែឮពេញៗត្រចៀកគ្រប់ទីកន្លែង។ ខ្ញុំរីករាយក្នុងការជជែកអំពីប្រធានបទផ្សេងៗ ដូចជា បញ្ហាអាកាសធាតុ ឬតារាល្បីៗជាដើម»។
ដើម្បីបំបែកការជួបជុំរបស់មនុស្សច្រើន អ្នកស្រី ម៉ាទីអូលី បានដាក់ផ្ទាំងបដាមួយផ្សេងទៀតដែលផ្ដល់គំនិតចំពោះការជជែកគ្នា រួមទាំង បញ្ហាប្រវត្ដិសាស្ដ្រ និងវប្បធម៌ផងដែរ។
អ្នកធ្វើសក់ មូរីហ្ស៊ីអូ ស៊ីអូការី ជាម៉ូយម្នាក់ទៀតបានបន្ដថា៖ «វាជាគំនិតដ៏ល្អ ហើយខ្ញុំសុំនិយាយថា វាសំខាន់ណាស់។ យើងត្រូវផ្អាកជជែកពីវាបន្ដិច យើងត្រូវដោះស្រាយបញ្ហារួមគ្នា មិនមែនគ្រាន់តែនិយាយនោះទេ»។
ជាអ្នកគាំទ្រតន្ដ្រីរ៉ុកម្នាក់ បុរសវ័យ ៦៣ ឆ្នាំ និយាយថា លោកមានរឿងរ៉ាវជាច្រើនទៀតដែលត្រូវលើកមកជជែក។ លោកបន្ដថា៖ «យើងជជែកអំពីអ្វីៗគ្រប់យ៉ាង រួមទាំងបញ្ហាផ្ទាល់ខ្លួន និងចំណូលចិត្ដលើតន្ដ្រី»។
ចុះមានរឿងអ្វីកើតឡើងបើអតិថិជនចាប់ផ្ដើមជជែកអំពីរោគរីករាលដាល ឬលទ្ធភាពវ៉ាក់សាំងទើបរកឃើញថ្មីៗ? អ្នកស្រី ម៉ាទីអូលី អាយុ ៣៥ ឆ្នាំ បានបកស្រាយថា៖ «គ្មានបញ្ហា តែខ្ញុំនឹងបង្ហាញស្លាកបដាឲ្យពួកគេមើល»។
អ្នកស្រីបន្ថែមថា៖ «អ្នកគ្រប់គ្រងហាងកាហ្វេមួយទៀតនៅទីក្រុងត្រេនទីណូ ភាគខាងជើងប្រទេសអ៊ីតាលី ក៏បានតម្លើងស្លាកបដាស្រដៀងគ្នានេះ ថ្វីដ្បិតតែគាត់បានស្នើសុំការអនុញ្ញាតពីខ្ញុំជាមុនសិនក៏ដោយ»៕ AFP/HR
