ភ្នំពេញៈ ដើម្បីស្វែងយល់ពីបទពិសោធវប្បធម៌ប្រពៃណីដ៏ផូរផង់នៃប្រទេសជប៉ុន-កម្ពុជា ក្នុងកម្មវិធីបុណ្យផ្កាយតាណាបាតា សាធារណជនអាចនឹងចូលរួមទស្សនាដោយសេរីមានចំនួន ២ ថ្ងៃ គឺចាប់ផ្តើមពីថ្ងៃទី ៥ រហូតដល់ថ្ងៃទី ៦ ខែកក្កដា ឆ្នាំ ២០១៨ ដែលនឹងប្រារព្ធធ្វើនៅមជ្ឈមណ្ឌលសហប្រតិបត្តិការកម្ពុជា-ជប៉ុន។
ការស្វែងយល់អំពីអ្វីដែលជាទំនៀមទម្លាប់ប្រពៃណីវប្បធម៌នៃជាតិសាសន៍នីមួយៗ ដែលមានភាពផ្សេងគ្នានោះគឺពិតជាទទួលបាននូវអត្ថប្រយោជន៍សំខាន់ណាស់នៃបរិបទរស់នៅក្នុងសង្គមសកលភាវូបនីយកម្មព្រោះថានេះជាការស្គាល់ពីវប្បធម៌បរទេស ក៏នឹងអាចជួយដល់ការផ្លាស់ប្តូរផ្នែកចំណេះដឹង ទៅវិញទៅមកបានរវាងប្រទេសផ្សេងៗគ្នា។
យោងតាមសន្និសីទនៃសារព័ត៌មាន នារសៀលថ្ងៃទី ២ ខែ កក្កដា ឆ្នាំ ២០១៨ កន្លងមកនេះ ឲ្យដឹងពីការរៀបចំពិធីបុណ្យផ្កាយ ដែលធ្វើប្រចាំឆ្នាំនេះថា៖ «មានស្ថាប័ន ៣ សហការគ្នាគឺស្ថានទូតជប៉ុន មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) និងមជ្ឈមណ្ឌលអាស៊ីនៃមូលនិធិជប៉ុន (JFAC) បានរៀបចំនូវពិធីបុណ្យផ្កាយ ដែលមានលក្ខណៈចម្រុះវប្បធម៌នេះ ក៏មានបំណងមួយចូលរួមអបអរសាទរដល់ខួបអនុស្សាវរីយ៍ទី ៦៥ ឆ្នាំនៃចំណងមិត្តភាពរវាងជប៉ុន និងកម្ពុជាផងដែរ ខណៈពិធីបុណ្យនេះ បានប្រារព្ធធ្វើជារៀងរាល់ឆ្នាំនៅក្នុងខែកក្កដា ដោយបានចាប់ផ្តើមតាំងពីឆ្នាំ ២០០៤ មក។ ក៏មានការសម្តែងពិសេសផងដែរគឺស្ត្រីជប៉ុនកញ្ញា Yamanaka Hitomi នឹងសម្តែងរបាំខ្មែរ នៅថ្ងៃបើកកម្មវិធីបុណ្យផ្កាយតាណាបាតាឆ្នាំ ២០១៨ នេះ។ ចំណែកនៅថ្ងៃទី ២ មានកម្មវិធីប្រឡងចម្រៀងណូដូជីម៉ាន់នៃឆ្នាំ ២០១៨ និងការប្រគំតន្ត្រីជប៉ុនប្រូ ម្ញូស៊ីកានីប៉ូនៀ (Pro Musica Nipponia)»។
សម្រាប់កម្មវិធីសំខាន់ៗមានដូចជា ការពណ៌នាអំពីប្រវត្តិពិធីបុណ្យផ្កាយ ការច្រៀងរួមគ្នាបទតាណាបាតា រៀនសិល្បៈបត់ក្រដាសជប៉ុន «អូរីហ្គាមី» កាត់ក្រដាស «គីរិហ្គាមី» និងសរសេរបំណងប្រាថ្នាចងព្យួរនឹងដើមឫស្សី ការសរសេរអក្សរជប៉ុន «ស្យូដូ» ជក់ទឹកខ្មៅ ការស្លៀកសម្លៀកបំពាក់ប្រពៃណីជប៉ុន សាកល្បងភ្លក្សរសជាតិតែជប៉ុនឆុងដោយអ្នកជំនាញជប៉ុន សាកល្បងចម្អិននំជប៉ុន «ដូរ៉ាយ៉ាគី» ភ្លក្សរសជាតិមីបង្ហូរបំពង់ប្ញស្សីជប៉ុន «ណាហ្គាស៊ិ សូមេន» ពិធីបណ្តែតប្រទីបពេលរាត្រី ទស្សនាខ្សែភាពយន្តគំនូរជីវចលដ៏ល្បីរឿង «One Piece» ការទស្សនាកម្សាន្តការសម្តែងរបាំវប្បធម៌កម្ពុជា-ជប៉ុន និងការស្លៀកសម្លៀកបំពាក់ខ្មែរនាសម័យកាលលង្វែកផងដែរ៕