ភ្នំពេញ៖ ជារៀងរាល់ឆ្នាំ ស្ថានទូតជប៉ុនប្រចាំប្រទេសកម្ពុជា រួមសហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន និងមជ្ឈមណ្ឌលអាស៊ីនៃមូលនិធិជប៉ុន (JFAC) នឹងរៀបចំនូវព្រឹត្តិការណ៍ពិធីបុណ្យផ្កាយ តែសម្រាប់ឆ្នាំ ២០២០ នេះ បុណ្យតាណាបាតាជប៉ុន ឬពិធីបុណ្យផ្កាយ នឹងប្រារព្ធពិធីតាមអនឡាញវិញ ដោយសារស្ថានភាពនៃវិបត្តិជំងឺកូវីដ ១៩។
ព្រឹត្តិការណ៍ «ពិធីបុណ្យផ្កាយអនឡាញឆ្នាំ ២០២០» នឹងចាប់ផ្តើមថ្ងៃទី ១១ រហូតដល់ថ្ងៃទី ១២ ខែ កក្កដា ឆ្នាំ ២០២០ ជំនួសឲ្យព្រឹត្តិការណ៍ធ្លាប់ធ្វើរៀងរាល់ឆ្នាំគឺ «ពិធីបុណ្យផ្កាយ» ដែលបានរៀបចំតាំងពីឆ្នាំ ២០០៤ មកក្នុងគោលបំណងបន្តជំរុញ ការផ្លាស់ប្តូរវប្បធម៌ រវាងប្រទេសជប៉ុន និងកម្ពុជា។
បើតាមសេចក្តីប្រកាសព័ត៌មានពីស្ថានទូតជប៉ុនប្រចាំនៅប្រទេសកម្ពុជា បានឲ្យដឹងកាលពីថ្ងៃទី ២៣ ខែ មិថុនា ឆ្នាំ ២០២០ កន្លងមកថា៖ «ក្នុងអំឡុងពេល «ពិធីបុណ្យផ្កាយអនឡាញ ២០២០» នៅក្នុងប្រទេសកម្ពុជា យើង នឹងធ្វើការតុបតែងដើមឫស្សីនៃពិធីបុណ្យផ្កាយ នៅស្ថានទូតជប៉ុន។ យើងសូមអញ្ជើញសាធារណជនចូលរួមកម្មវិធី «ពិធីបុណ្យផ្កាយអនឡាញ ២០២០» ដោយផ្ញើបំណងប្រាថ្នារបស់លោក លោកស្រី ចាប់ពីថ្ងៃទី ២៣ ខែមិថុនា ដល់ថ្ងៃទី ៥ ខែ កក្កដា ឆ្នាំ ២០២០ មកកាន់យើងខ្ញុំ។ រាល់បំណងប្រាថ្នារបស់លោក លោកស្រី នឹងត្រូវព្យួរនៅលើមែក ដើមឫស្សីនៅស្ថានទូតជប៉ុនជាមួយនឹងគ្រឿងតុបតែងលម្អដទៃទៀត ហើយដើមឫស្សីនោះ នឹងត្រូវបានបង្ហាញនៅក្នុងវីដេអូប្រកាសបើកពិធីបុណ្យផ្កាយអនឡាញឆ្នាំ ២០២០។
ចំពោះបំណងប្រាថ្នាមួយចំនួន ក៏នឹងត្រូវបានជ្រើសរើស សម្រាប់ធ្វើជាកម្រងរូបថតនៃបំណងប្រាថ្នា ដែលនឹងដាក់បង្ហាញនៅលើគេហទំព័រនៃពិធីបុណ្យផ្កាយអនឡាញ ឆ្នាំ ២០២០ ផងដែរ។ លោក លោកស្រី អាចសរសេរឈ្មោះផ្ទាល់ខ្លួន ឬរហស្សនាមឈ្មោះហៅក្រៅក៏បាន និងប្រាប់ពីបំណងប្រាថ្នារបស់លោក លោកស្រី ជាភាសាខ្មែរ ឬ ភាសាជប៉ុន ឬ ភាសាអង់គ្លេស។ បំណងប្រាថ្នា និងព័ត៌មាន ដែលលោក លោកស្រីបានសរសេរ នឹងត្រូវបានបង្ហាញជាសាធារណៈ»។
ចំពោះបុណ្យតាណាបាតា ឬពិធីបុណ្យផ្កាយ គឺជាព្រឹត្តិការណ៍ប្រពៃណីមួយរបស់ជប៉ុន ដែលតែងតែប្រារព្ធឡើងនៅថ្ងៃទី ៧ ខែកក្កដា នៅក្នុងប្រទេសជប៉ុន ដែលបានរំឭកដល់រឿងរបស់គូស្នេហ៍ ១ គូ នៅឋានសួគ៌ គឺមាននារីតម្បាញ និងបុរសគង្វាលគោ ដែលអ្នកទាំង ២ ត្រូវបានបំបែកចេញពីគ្នាដោយសារទន្លេ អាម៉ាណូហ្គាវ៉ា ហើយពួកគេ ក៏ត្រូវបានអនុញ្ញាតឲ្យជួបគ្នាវិញតែម្តងគត់ក្នុង ១ ឆ្នាំគឺនៅថ្ងៃទី ៧ ខែកក្កដា។ ហើយនៅថ្ងៃនោះ ប្រជាជនជប៉ុន បានសរសេរពីសេចក្តីបំណងប្រាថ្នារបស់ពួកគេ ហើយយកទៅដាក់ព្យួរនៅលើដើមឫស្សី ដើម្បីទទួលបានដូចបំណងប្រាថ្នានោះ។
គួររំឭកដែរថា បុណ្យតាណាបាតាជប៉ុន ឬពិធីបុណ្យផ្កាយកាលពីឆ្នាំ ២០១៩ បានប្រារព្ធធ្វើចាប់ពីថ្ងៃទី ១៣ ដល់ថ្ងៃទី ១៤ ខែកក្កដា នៅឯសាលមហោស្រពអង្គរគីហ្សូណានៃ មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ដែលមានកម្មវិធីច្រើនដូចជាសិក្ខាសាលា និងបទបង្ហាញទាក់ទងនឹងអានីមេខូសផ្លេ ប្រកួតភាពយន្តខ្លី ការបញ្ចាំងខ្សែភាពយន្តជប៉ុន ថ្នាក់រៀនចម្អិនម្ហូបជប៉ុន សិល្បៈបត់ក្រដាស «អូរីហ្គាមី» រៀនសិល្បៈកាត់ក្រដាស «គីរីហ្គាមី» ការសរសេរអក្សរផ្ចង់ «ស្យូដូ» ការសាកល្បងស្លៀកពាក់ប្រពៃណី «ក្បិនខ្មែរ» និង «យូកាតាជប៉ុន» ការសាកល្បងស្លៀកសម្លៀកបំពាក់ និងការលេងកីឡាជប៉ុន «កេនដូ» និង «អ៊ីអៃដូ» ថ្នាក់រៀនបាញ់ធ្នូមរតកខ្មែរ ព្រមទាំងមានការតាំងពិព័រណ៍ផ្សេងៗ ក្នុងពិធីបុណ្យនេះផងដែរ៕