The Phnom Penh Post Search

Search form




Logo of Phnom Penh Post newspaper Phnom Penh Post - បុណ្យ​ព្រឹល​​ឆ្នាំ​នេះ​ ជប៉ុន​ត្រូវ​ដឹក​ទឹកកក​ច្រើន​សន្ធឹក

បុណ្យ​ព្រឹល​​ឆ្នាំ​នេះ​ ជប៉ុន​ត្រូវ​ដឹក​ទឹកកក​ច្រើន​សន្ធឹក

Content image - Phnom Penh Post
ទិដ្ឋភាព​ចម្លាក់ទឹកកក ក្នុងពិធីបុណ្យ​ព្រឹលទឹកកក នៅជប៉ុន​កាលពីប៉ុន្មានឆ្នាំមុន។ រូបថត AFP

បុណ្យ​ព្រឹល​​ឆ្នាំ​នេះ​ ជប៉ុន​ត្រូវ​ដឹក​ទឹកកក​ច្រើន​សន្ធឹក

ក្រុង​តូក្យូ៖ ក្រុម​អ្នក​រៀបចំ​ពិធី​បុណ្យ​ព្រឹល​ទឹកកក​សាបប៉ូរ៉ូ ដ៏​ល្បីល្បាញ​របស់​ជប៉ុន​ត្រូវ​បាន​បង្ខំ​ដឹក​យក​ព្រឹល​ទឹកកក​​​ច្រើន​សន្ធឹក​សន្ធាប់​ ដើម្បី​កសាង​ចម្លាក់​និម្មិត​រូប​ក្រោយ​ពី​រដូវ​រងា​ប្រែ​ជា​ក្ដៅ​ខុស​ទម្លាប់​។

ពិធី​បុណ្យ ដែល​បើក​ទ្វារ​ទទួល​ភ្ញៀវ​ ៣ សប្ដាហ៍ ​ក្នុង​ទីក្រុង​ហុកកៃដូ ភាគ​ខាង​ជើង​ប្រទេស ​ជប៉ុន គឺ​ជា​ភាព​ទាក់ទាញ​ចម្បង​មួយ​ប្រចាំ​តំបន់ ដោយ​បាន​ទទួល​ភ្ញៀវ​ទេសចរ​ជាង ២,៧ លាន​នាក់​ កាល​ពី​ឆ្នាំ​មុន​។

គោលដៅ​ចម្បង ​គឺ​ការ​តាំង​បង្ហាញ​ចម្លាក់​ទឹកកក និង​ព្រឹល​ប្រមាណ ២០០ ដែល​កសាង​ឡើង​ដោយ​ពលរដ្ឋ ក្រុម​មន្ដ្រី និង​អ្នក​ស្ម័គ្រ​ចិត្ដ​ ដោយ​មាន​ជំនួយ​ពី​កង​កម្លាំង​ប្រដាប់​អាវុធ​ផង​ដែរ​។

ប៉ុន្ដែ​ក្រុម​អ្នក​រៀបចំ​ព្រឹត្ដិការណ៍​ត្រូវ​បាន​បង្ខំ​ចិត្ដ​ឲ្យ​ដឹក​យក​ព្រឹល​ទឹកកក​ពី​ជាយ​​ក្រុង​សាបប៉ូរ៉ូ ហើយ​ក៏​ពី​ទីក្រុង​នានា​ចម្ងាយ​ប្រមាណ ៣០ គីឡូម៉ែត្រ​ពី​គ្នា​។ នេះ​បើ​យោង​តាម​ Fumiya Onoue ជា​មន្ដ្រី​មក​ពី​ការិយាល័យ​ទេសចរណ៍​សាបប៉ូរ៉ូ​ បាន​ប្រាប់ AFP កាល​ពី​ថ្ងៃ​សុក្រ​។

Content image - Phnom Penh Post
ទឹកកក​ដែលយក​មក​ឆ្លាក់ ​ត្រូវ​តែ​ស្អាត​គ្មាន​ធូលីដី​។ រូបថត AFP

លោក Onoue​ បាន​និយាយ​ថា​៖ «​យើង​​កំពុង​តែ​ធ្វើ​ការងារ​ដ៏​លំបាក​។ នេះ​ជា​ក្បួន​រថយន្ដ​ដឹក​ទឹកកក​យ៉ាង​ច្រើន​សន្ធឹក​មក​​បំពេញ​តម្រូវ​ការ​បុណ្យ»។

កិច្ចការ​នេះ​ ជា​ភារកិច្ច​ដ៏​លំបាក​​ ដើម្បី​កសាង​ចម្លាក់​ដ៏​ល្អ​ឥត​ខ្ចោះ​។

លោក​បាន​បន្ដ​ថា​៖ «​ព្រឹល​ទឹកកក​គួរ​តែ​អត់​មាន​ប្រឡាក់​ដី ជាប់​កម្ទេច​ថ្ម ឬ​អាច​រលាយ​ឡើយ​ ដោយសារ​វា​អាច​បង្ក​ឲ្យ​ដួល​រលំ​នៃ​សំណង់​ចម្លាក់​»។

ការ​ធ្លាក់​ព្រឹល​​ទឹកកក​​ក្នុង​ទីក្រុង​ដោយ​ផ្ដើម​​តាំង​ពី​ខែ​វិច្ឆិកា​បាន​ធ្លាក់​បរិមាណ​មធ្យម​ជាង​ពាក់​កណ្ដាល​។ នេះ​បើ​យោង​តាម​ការ​ត្រួត​ពិនិត្យ​របស់​ទីភ្នាក់ងារ​ឧតុនិយម​ជប៉ុន​។

មន្ដ្រី​នៅ​ទី​នោះ​បាន​និយាយ​ថា​ ព្រឹល​ទឹកកក​បាន​រលាយ​ក្នុង​សីតុណ្ហភាព​ខ្ពស់​នៅ​ពាក់​កណ្ដាល​ខែ​ធ្នូ និង​សម្ពាធ​ទាប​នៅ​ចុង​ឆ្នាំ​បាន​នាំ​យក​ខ្យល់​អាកាស​ក្ដៅ​​ធ្វើ​ឲ្យ​វា​រលាយ​។

Content image - Phnom Penh Post
កង្វះខាត​ទឹកកក ធ្វើឲ្យអាជ្ញាធរ​ត្រូវ​ដឹក​ជញ្ជូន​ពីចម្ងាយ។ រូបថត AFP

លោក​និយាយ​ថា​៖ «​បម្រែបម្រួល​អាកាសធាតុ​សកល​លោក​បាន​បន្ដ​កើត​ឡើង​ជា​ច្រើន​ឆ្នាំ ហើយ​វា​លែង​ជា​អភូត​ហេតុ​កើត​ឡើង​ម្ដងម្កាល​ទៀត​ហើយ​។ ប៉ុន្ដែ​យើង​មិន​អាច​ឲ្យ​នរណា​ម្នាក់​មក​ទទួល​ខុស​ត្រូវ​ចំពោះ​បញ្ហា​ខ្វះ​ព្រឹល​ទឹកកក​នា​ឆ្នាំ​នេះ​បាន​ឡើយ​»។

លោក​បាន​បន្ថែម​ថា​៖ «​រដូវ​រងា​មិន​ទាន់​កន្លង​ផុត​នៅ​ឡើយ​ទេ​ ទោះ​ការ​ព្យាករ​បាន​ទស្សន៍ទាយ​​ថា តែ ១ ​ថ្ងៃ​គត់​នៅ​សប្ដាហ៍​ក្រោយ ​ដែល​រំពឹង​ថា​នឹង​មាន​ព្រឹល​ធ្លាក់​ក្នុង​ទីក្រុង​សាបប៉ូរ៉ូ​»។

លោក​បន្ត​ថា៖ «យើង​ត្រូវ​បន្ដ​តាម​ដាន​ដើម្បី​ឲ្យ​ប្រាកដ​ថា​នឹង​មាន​រឿង​អ្វី​កើត​ឡើង​ចំពោះ​រដូវ​រងា​ឆ្នាំ​នេះ​»។

ពិធី​បុណ្យ​ព្រឹល​ទឹកកក​លើក​ទី ៧១ ចាប់​ផ្ដើម​នៅ​ថ្ងៃទី ៣១ ខែ​មករា​ នឹង​បន្ដ​រហូត​ដល់​ថ្ងៃ​ទី ១១ ខែ​កុម្ភៈ​ ជាមួយ​ព្រឹត្ដិការណ៍​ចម្លាក់​ទឹកកក​ប្លែកៗ​ត្រៀម​បើក​​ស្វាគមន៍​ភ្ញៀវ​នៅ​ថ្ងៃទី ៤ ខែ​កុម្ភៈ ​ខាង​មុខ​នេះ​ហើយ​៕ AFP/HR

អត្ថបទគួរចាប់អារម្មណ៍

  • ជនជាតិ​ភាគតិច និង​សង្គម​ស៊ីវិល​ប្ដឹង​ជំទប់​ឃុំ និង​អភិបាលរង​ខេត្ត ​រឿង​ចេញ​បណ្ណ​សម្គាល់​ដី​ជាន់​លើ​ដី​ព្រៃ

    មណ្ឌលគិរី: ពលរដ្ឋ​សហគមន៍​ជនជាតិ​ដើម​ភាគតិច និង​សង្គម​ស៊ីវិល​ចំនួន ៦ ​នាក់​ បាន​ដាក់​ពាក្យបណ្ដឹង​ចំនួន ២ ​ដាច់​ ដោយឡែក​ពី​គ្នា​ប្ដឹង​មនុស្ស ៤ ​នាក់ ​ទៅ​តុលាការខេត្ត​ក្នុង​នោះ​មាន​ជំទប់​ទី​ ១ ​ឃុំ​ប៊ូស្រា​ម្នាក់ និង​អភិបាលរង​ខេត្តមណ្ឌលគិរី​ម្នាក់​ដោយ​ចោទ​ពាក់ព័ន្ធ​ការចេញ​បណ្ណ​សម្គាល់​ម្ចាស់​ដីធ្លី​ជាន់​លើដី​គម្រប​ព្រៃឈើ និង​បទ​ចោទ​ពាក់ព័ន្ធ​លួច​គាស់​យក​ថ្ម​ធម្មជាតិ​

  • កាណាដា​ពិន័យ VW ១៥០ ​លាន​ដុល្លារ

    ក្រុងតូរ៉ុនតូៈ តុលាការ​ក្នុង​ទីក្រុង​តូរ៉ុនតូ​កាលពី​ថ្ងៃ​ពុធ​បាន​បញ្ជា​ឲ្យ​ក្រុមហ៊ុន Volkswagen (VW) បង់ប្រាក់​ពិន័យ ១៩៦,៥ លាន​ដុល្លារ​កាណាដា (១៥០ ​លាន​ដុល្លារ​អាមេរិក​) បន្ទាប់ពី​ក្រុមហ៊ុន​ផលិត​រថយន្ត​មួយ​នេះ​បាន​សារភាព​កំហុស​ចំពោះ​ការរំលោភច្បាប់​បរិស្ថាន​ក្នុង​រឿងអាស្រូវ​បោក​បន្លំ​ការបញ្ចេញ​កាបូន​។

  • សហជីព​បារាំង​​ព្យាយាម​បន្ត​ការ​តវ៉ា​ប្រឆាំង​ការ​កែ​ទម្រង់​ប្រាក់​សោធននិវត្តន៍​​ ដើម្បី​ដាក់​សម្ពាធ​លើ​រដ្ឋាភិបាល​​

    ក្រុង​ប៉ារីស៖ ក្រុម​សហជីព​បារាំង​កាល​ពី​ថ្ងៃ​ពុធ​ បាន​បន្ត​ធ្វើ​​កូដកម្ម​ជា​ច្រើន​ ដោយ​​មាន​​បំណង​បង្កើន​សម្ពាធ​​​​ទៅ​លើ​រដ្ឋាភិបាល​មុន​នឹង​រដ្ឋាភិបាល​នេះ​ ធ្វើ​ការ​បង្ហាញ​ការ​កែ​ទម្រង់​ប្រាក់​សោធននិវត្តន៍​ចុង​ក្រោយ ​ដែល​បាន​​​ជំរុញ​ឲ្យ​មាន​ការ​តវ៉ា​ពី​បញ្ហា​ការងារ​ធំ​បំផុត​នៅ​បារាំង​ជា​ច្រើន​ទសវត្សរ៍​នោះ​​។ ​

  • លាភ ​រដ្ឋា ​និង ​ផាន់ ​គ្រាន់ ​ប៉ះ​ថៃ​ចំណូល​ថ្មី​

    ភ្នំពេញ៖ ​អ្នក​លេង​កណ្តាប់​ដៃ​របស់​កម្ពុជា​ចំនួន ​២ ​នាក់ គឺ ​លាភ ​រដ្ឋា និង​ ផាន់ ​គ្រាន់​ ​នឹង​​ត្រូវ​បង្ហាញ​ខ្លួន​រួមគ្នា នៅ​​លើ​សង្វៀន​ SEATV នា​រសៀល​ថ្ងៃ​សៅរ៍​ស្អែក​នេះ ​ដោយ​ពួក​គេ​ត្រូវ​ជួប​ជាមួយ​​កីឡាករ​ថៃ​​ចំណូល​ថ្មី​ មិន​ធ្លាប់​មក​ប្រកួត​ក្នុង​សង្វៀន​នៅ​​ប្រទេស ​កម្ពុជា ​នោះ​ទេ​​។