.jpg)
ក្រុងវ៉ាស៊ីងតោន: វាជាលើកទី ៣ ហើយដែលបុរសកំពូលស៊យមកពីរដ្ឋកូឡូរ៉ាដូ ត្រូវបានឆ្លាមវាយប្រហារនៅដែនកោះហាវៃ ខណៈយុវជនរូបនេះ ធ្លាប់ត្រូវបានហែក និងពស់ពិសចឹក ដែលបានកើតឡើងក្នុងរយៈពេលជាង ៣ ឆ្នាំ។ នេះបើយោងតាមបណ្ដាញផ្សព្វផ្សាយក្នុងស្រុក។
លោក ឌីឡាន ម៉ាកវីលៀមស៍ អាយុ ២០ ឆ្នាំ កំពុងជិះក្ដារលកក្បែរកោះ Kauai កាលពីថ្ងៃព្រហស្បតិ៍ ពេលអ្វីដែលលោកជឿថា វាជាឆ្លាមខ្លាប្រវែង ២ ម៉ែត្រហែលមកខាំត្របាក់ជើងលោក។ នេះបើយោងតាមHonolulu Star Advertiser រាយការណ៍។
បុរសដែលអះអាងថា ខ្លួនជាអ្នកបង្វឹកក្រុមសង្គ្រោះ អាចហែលទឹកបានប្រវែងជិត ៣០ ម៉ែត្រមកកាន់ច្រាំង ខណៈដែលអ្នកឈរមើលបានពេទ្យសង្គ្រោះ។ លោកនិយាយថា៖ «ខ្ញុំមិនច្បាស់ថា តើខ្ញុំបានបាត់បង់ជើងពាក់កណ្ដាលឬយ៉ាងណានោះទេ»។
លោក ម៉ាកវីលៀមស៍ ត្រូវដេរ ៧ ថ្នេរ តែប៉ុន្មានខែក្រោយពីលោកត្រូវបានខ្លាឃ្មុំខ្មៅខ្វាច ៩ ក្រចកលើក្បាលនៅពេលបោះជំរំរដូវក្ដៅកាលពីខែកក្កដា ឆ្នាំមុន។ យុវជនកំពូលស៊យនិយាយថា៖ «ខ្ញុំគិតថា ខ្ញុំបានទៅខុសកន្លែង និងខុសវេលា»។
យ៉ាងណាមិញ ឧប្បត្ដិហេតុទាំងនេះបានកើតឡើងតាមក្រោយការវាយប្រហារពីសំណាក់ពស់ពិសមួយក្បាលអំឡុងពេលឡើងភ្នំអ៊ូតា។ យ៉ាងណាមិញ លោកបានប្រាប់ Star Advertiser ថា ពេលពស់ចឹកនោះ មិនសូវធ្ងន់ធ្ងរទេ ហើយលោកគ្រាន់តែដេកពេទ្យប៉ុន្មានថ្ងៃប៉ុណ្ណោះ។ លោកបញ្ជាក់ថា៖ «ឪពុកម្ដាយខ្ញុំពិតជារីករាយណាស់ ដែលខ្ញុំនៅមានជីវិត
រស់»៕ AFP/HR
