.jpg)
រូបត្រីដ៏ធំ ដែលជាការកែច្នៃពីសំរាម និងជាស្នាដៃរបស់លោក រៀម មុនីស៊ីឡុង។ សហការី
ក្រុងសៀមរាបៈ ក្រោយពីបានខិតខំប្រឹងប្រែងយ៉ាងខ្លាំងជាមួយនឹងការងារច្នៃសំរាមរួមមានដូចជាស្រកាត្រី និងថង់ប្លាស្ទិក ឲ្យទៅជាវត្ថុសិល្បៈនានា ប្រើពេលជិត ១០ ឆ្នាំមកហើយ ទើបតែនៅក្នុងឆ្នាំ ២០១៨ នេះ បានសមិទ្ធផលកែច្នៃទៅជាវត្ថុសិល្បៈដែលមានតម្លៃអាចជួយលោក រៀម មុនីស៊ីឡុង បានការចាប់អារម្មណ៍ពីមហាជន និងអាចលក់ដូររកប្រាក់ចំណូលបានគួរសម ដើម្បីចិញ្ចឹមជីវិតគ្រួសារ។
បើទោះបីកើតនៅក្នុងគ្រួសារមានជីវភាពលំបាកខ្លាំងមិនអាចឲ្យខ្លួនបានរៀនសូត្រចេះដឹងជ្រៅជ្រះ និងជំនាញវិចិត្រកម្មមែនក្តី តែទេពកោសល្យដ៏ប៉ិនប្រសប់ ពីកំណើតរបស់លោកអាចប្រើគំនិតច្នៃប្រឌិតខ្ពស់គឺការជ្រើសយកសំរាមមកចៃ្នជាវត្ថុសិល្បៈមានតម្លៃ និងអាចយកទៅប្រើប្រាស់ធ្វើជាគ្រឿងសិល្បៈលម្អ ឬជារូបសត្វ នានាគួរឲ្យសរសើរពីអតិថិជនទាំងខ្មែរ និងបរទេសតែម្តង។
បច្ចុប្បន្ននេះ វត្ថុសិល្បៈទាំងឡាយ ដែលប្រើវត្ថុធាតុដើមពីសំរាមនានារួមមានស្រកាត្រី ថង់ប្លាស្ទិក សម្បកកំប៉ុងភេសជ្ជៈ សម្បកកង់ឡាន និងវត្ថុផ្សេងៗទៀត អាចជួយឲ្យបុរសមានគំនិតស្រឡាញ់សិល្បៈកែច្នៃ នៅខេត្តសៀមរាប លោក រៀម មុនីស៊ីឡុង មានពន្លឺជីវិតហើយដែលជាការតបស្នង ចំពោះការខិតខំតស៊ូជាមួយការបង្កើតស្នាដៃសិល្បៈដ៏កម្រតាំងពីឆ្នាំ ២០០៩ មក។
លោក រៀម មុនីស៊ីឡុង រើសយកថង់ប្លាស្ទិកទៅច្នៃ។ សហការី
លោក រៀម មុនីស៊ីឡុង ដែលបានរៀនតែត្រឹមថ្នាក់ទី ៤ នៅសាលាបឋមសិក្សា ខណៈមានវ័យ ១៤ ឆ្នាំ ទើបចូលរៀនព្រោះតែជីវភាពគ្រួសារក្រីក្រលំបាកពេក ហើយឧស្សាហ៍ផ្លាស់ប្តូរលំនៅឋានទៀតនោះ បានរៀបរាប់ពីដើមទងនៃការកើតគំនិតកែច្នៃសំរាមឲ្យទៅជាគ្រឿងវត្ថុសិល្បៈនានាដោយប្រើពេលរហូតដល់ជិត ១ ទសវត្សរ៍ ទើបគេមើលឃើញអំពីគុណតម្លៃស្នាដៃរបស់លោក ប្រាប់ថា៖ «ការនឹកឃើញច្នៃរបស់ពីសំរាមទៅជាវត្ថុសិល្បៈទាំងនេះ ខ្ញុំចាប់ផ្តើមតាំងពីឆ្នាំ ២០០៩ មក ហើយប៉ុន្មានឆ្នាំកន្លងមកមិនមានអ្នកណាគេចាប់អារម្មណ៍នឹងស្នាដៃនេះគឺទើបតែមកដល់អំឡុងឆ្នាំ ២០១៥-២០១៧ ចុងក្រោយនេះ ទើបមានអ្នកគេស្គាល់ និងចាប់អារម្មណ៍ស្នាដៃកែច្នៃពីសំរាមរបស់ខ្ញុំ»។
លោក បានបន្តថា៖ «ការច្នៃសំរាមជាវត្ថុសិល្បៈនេះ តាំងពីចាប់ផ្តើមមកដល់ឆ្នាំ ២០១៦-២០១៧ គឺមិនបានជួយរកប្រាក់ចំណូលឲ្យខ្ញុំអាចចិញ្ចឹមជីវិតគ្រួសារបានទេ គឺទើបតែនៅឆ្នាំ ២០១៨ នេះ ទើបអាចចូលរួមចំណែកនៅក្នុងជីវភាពគ្រួសារខ្ញុំបាន ដោយខ្ញុំអាចលក់វត្ថុច្នៃតូចតម្លៃទាបបំផុត ចាប់ពី ៥ ដុល្លារ រហូតដល់តម្លៃថ្លៃបំផុតជាង ៣ ០០០ ដុល្លារផងដែរ។ តាមសេចក្តីប្រាថ្នាតទៅថ្ងៃមុខនោះ ខ្ញុំក៏ចង់មានសាលមន្ទីរសម្រាប់តាំងវត្ថុកែច្នៃទាំងនេះ ហើយក៏ចង់មានវិចិត្រសាលផ្ទាល់ខ្លួនដែរ»៕
