សៀមរាប៖ ពេលមកដល់កម្ពុជាដំបូងក្នុងឆ្នាំ ២០១៤ លោក កៃ គូរ៉ាម៉ូតុ បានឃើញផ្ទាល់ភ្នែក និងឮពេញត្រចៀកថា កម្ពុជាគឺជាដែនដីដ៏ស្រស់ស្អាតទាំងសម្រស់ធម្មជាតិ និងស្នាមញញឹមរបស់ពលរដ្ឋខ្មែរ។ ប៉ុន្ដែអ្វីដែលធ្វើឲ្យលោកទើសចិត្ដនោះ គឺបញ្ហាសំរាមប្លាស្ទិករាយប៉ាយនៅលើដងវិថី។
លោក កៃ បានឲ្យដឹងថា៖ «សម្ដីទូទៅដែលខ្ញុំបានឮពីភ្ញៀវទេសចរមកកាន់កម្ពុជាគឺថា វាជាប្រទេសដ៏ស្រស់ស្អាត តែជួបបញ្ហាកខ្វក់ចំពោះសំរាម និងប្លាស្ទិក។ ខ្ញុំចង់ស្វែងរកវិធីឲ្យភ្ញៀវទេសចររីករាយការទស្សនាប្រាង្គប្រាសាទ វាលស្រែ វាលស្រូវ ទន្លេបឹងបួ ទំនាក់ទំនងជាមួយអ្នកស្រុក និងអ្វីៗគ្រប់យ៉ាងដែលកម្ពុជាមាន ដោយមិនមានមតិអវិជ្ជមានភ្ជាប់មកជាមួយ»។
លោកបន្តទៀតថា៖ «ថង់ប្លាស្ទិកទំនងជាដើមចមបង្កផលប៉ះពាល់ចំពោះបរិស្ថានធំបំផុតក្នុងព្រះរាជាណាចក្រកម្ពុជា។ ដូច្នេះ យើងព្យាយាមស្វែងរកដំណោះស្រាយចីរភាពចំពោះបញ្ហានេះ»។
ការលុបបំបាត់ប្លាស្ទិកតែម្ដង គឺជាគោលដៅចុងក្រោយ តែវាមិនទាន់អាចអនុវត្ដភ្លាមៗទាំងស្រុងនាពេលបច្ចុប្បន្ននេះឡើយ ពីព្រោះវានឹងប៉ះពាល់ដល់ជំនួញខ្នាតតូចរបស់ពលរដ្ឋខ្មែរ។ ដូច្នេះ ដំណោះស្រាយជម្រើសមួយទៀត គឺថង់ដែលងាយរលាយ ត្រូវបានផ្ដួចផ្ដើមក្រុមហ៊ុន Cleanbodia។
កូនកាត់ជប៉ុន-អាមេរិក វ័យ ៣៩ ឆ្នាំ បានប្រាប់ភ្នំពេញ ប៉ុស្ដិ៍ ថា៖ «Cleanbodia ត្រូវបានបង្កើតឡើងឆ្នាំ ២០១៥ ជាគម្រោងតូចមួយបំណងស្ទាបស្ទង់ថា តើថង់ងាយរលាយនេះអាចដើរក្នុងទីផ្សារកម្ពុជាឬក៏អត់? យើងបានស្រាវជ្រាវ ឌីហ្សាញ សិក្សាទីផ្សារ និងចែកចាយលក់ថង់ងាយរលាយនៅទូទាំងប្រទេស កម្ពុជា ព្រមទាំងពិភពលោក»។
Cleanbodia គឺជាក្រុមហ៊ុនដែលកំពុងព្យាយាមនាំយកដំណោះស្រាយស្ទួយបរិស្ថានដល់ប្រជាជនខ្មែរ និងពិភពលោកទាំងមូល។
លោក កៃ គូរ៉ាម៉ូតុ កូនកាត់ជប៉ុន-អាមេរិក រស់នៅក្បែរទីក្រុងឈីកាហ្គោ សហរដ្ឋអាមេរិក។ លោកសិក្សាផ្នែកសេដ្ឋកិច្ចនៅសាកលវិទ្យាល័យ University of Richmond- Robins School of Business ហើយការងារចុងក្រោយរបស់លោកមុនពេលហោះមកកាន់ទឹកដីកម្ពុជា លោក គឺជានាយកគ្រប់គ្រងផ្នែកបច្ចេកទេសនៃការរៀបចំសន្និសីទ និងសន្និបាតនៅទូទាំងសហរដ្ឋអាមេរិក។
ដំបូងឡើយ លោកក៏មិនដឹងថាត្រូវប្រើដំឡូងមី ដើម្បីផលិតថង់នោះទេ ដោយសារប្លាស្ទិករលាយ (Bioplastics) អាចត្រូវបានផលិតឡើងពីរុក្ខជាតិខុសៗគ្នា។ តែគ្រឿងផ្សំសំខាន់គឺ ម្សៅដែលដំឡូងមីសម្បូរសារធាតុនេះច្រើន។
ជាមួយរូបរាងថង់ស្ដើង និងទម្ងន់ស្រាល មិនខុសពីថង់ប្លាស្ទិកធម្មតា តែងាយរលាយ ម្ចាស់យីហោ «ថង់ផលិតពីរុក្ខជាតិ» រូបនេះ បានអះអាងថា៖ «មិនមែនដោយសារវាងាយរលាយ វាងាយផុយរហែកនោះទេ។ ចំពោះការដាក់ទឹកស៊ុប និងផលិតផលក្ដៅ ថង់ស្ទួយបរិស្ថាននេះមានភាពរឹងមាំដូចថង់ប្លាស្ទិកទូទៅអ៊ីចឹង»។
យ៉ាងណាមិញ លោក កៃ មិនមានមហិច្ឆតាចូលខ្លួនមកជំនួសថង់ជ័រប្លាស្ទិកទូទៅទាំងស្រុងនោះទេ ដោយលោកប្រាថ្នាចង់កាត់បន្ថយការប្រើប្រាស់ប្លាស្ទិកដ៏គ្រោះថ្នាក់ដល់បរិស្ថានបន្តិចម្ដងៗ។
លោកបានពន្យល់ថា៖ «ថង់ងាយរលាយរបស់យើងមានភាពល្អប្រសើរជាងដោយសារវាផលិតឡើងពីរុក្ខជាតិ មិនដូចជាការប្រើប្រេង និងឧស្ម័នធម្មជាតិឡើយ។ ថង់ទាំងនេះនឹងរលាយក្នុងរយៈពេល ៦ ឆ្នាំ ដែលយ៉ាងហោចណាស់លឿនជាងថង់ប្លាស្ទិកទូទៅ ២០០ ឆ្នាំឯណោះ»។
ដោយសារតែការផលិតថង់ងាយរលាយមានភាពស្មុគស្មាញ និងតម្រូវឲ្យប្រើប្រាស់គ្រឿងម៉ាស៊ីនមានតម្លៃថ្លៃ ព្រមទាំងទាមទារសមត្ថភាពជំនាញពីក្រុមវិស្វករ លោក គូរ៉ាម៉ូតុ មិនបានប្រាប់ប្រទេសផលិតថង់រុក្ខជាតិនេះឡើយ ដោយគ្រាន់តែបង្ហើបថា វានៅមិនឆ្ងាយពីប្រទេសក្នុងតំបន់អាស៊ីអាគ្នេយ៍នោះទេ។
លោកបានបង្ហើបប្រាប់ថា៖ «ថង់រុក្ខជាតិទាំងនេះមិនត្រូវបានផលិតឡើងក្នុងប្រទេស កម្ពុជា ឡើយ តែពីប្រទេសក្នុងតំបន់អាស៊ីអាគ្នេយ៍នេះឯង»។
លោកបញ្ជាក់ដែរថា៖ «យើងបានសិក្សាជ្រាវជ្រាវពីលទ្ធភាពកសាងរោងចក្រក្នុងព្រះរាជាណាចក្រកម្ពុជា និងកំពុងសិក្សាស្វែងរកវិធីសាស្ដ្រល្អបំផុតជាមួយដៃដ៏ត្រឹមត្រូវ»។
លោករំពឹងថា ចង្វាក់ផលិតកម្មនៅក្នុងស្រុកនឹងធ្វើឲ្យតម្លៃធ្លាក់ចុះ ហើយមិនបាច់ខ្វល់ពីការផ្គត់ផ្គង់ផលិតផលដំឡូងមី ដែលមានភាពសម្បូរបែបស្រាប់នៅទីនេះ។
លោក កៃ បន្តថា៖ «វាអាចជាផលិតផលនាំចេញដ៏ល្អសម្រាប់កម្ពុជា ពេលយើងទទួលការកុម្ម៉ង់ពីជុំវិញពិភពលោកដែលត្រូវការប្រើថង់ស្ទួយបរិស្ថាននេះ។ ខ្ញុំគិតថា នេះជាអ្វីដែលប្រជាជនកម្ពុជាគួរតែមានមោទនភាព»។
ថង់ Cleanbodia មាន ៣ ទំហំ និងគ្រោងបន្ថែម ២ ទំហំ ព្រមទាំងរចនាទៅតាមការកុម្ម៉ង់របស់អតិថិជន ដែលបញ្ជាទិញចាប់ពី ៥០០ គីឡូក្រាមឡើង។ បច្ចុប្បន្ន លោកក៏បានផលិតថង់ ២ ប្រភេទ គឺថង់ biodegradable លាយប្លាស្ទិក រលាយរយៈពេល ៦ឆ្នាំ និង compostable អត់ផ្ទុកប្លាស្ទិក រលាយរយៈពេល ២ ឆ្នាំ។
លោក កៃ បាននិយាយថា៖ «យើងត្រូវតែផ្លាស់ប្ដូរទម្លាប់ចំពោះការប្រើប្រាស់ប្លាស្ទិក។ វាមិនស្ថិតស្ថេរនោះទេ ដោយសារវាជាធនធានមិនអាចប្រើប្រាស់ជាថ្មីបាន ហើយវាកំពុងតែបំផ្លាញសមុទ្រហើយ។ ប៉ុន្ដែការផ្លាស់ប្ដូរធ្វើទៅលឿន ឬក៏យឺត វាអាស្រ័យលើយើងទាំងអស់គ្នា»។
លោកបន្ដទៀតថា៖ «ពេលនេះ យើងកំពុងស្វែងរកដៃគូក្នុងការកសាងរោងចក្រផលិតនៅក្នុងស្រុក»។
សម្រាប់ព័ត៌មានលម្អិត សូមចូលទៅកាន់វេបសាយ https://www.cleanbodia.com ឬទំព័រហ្វេសប៊ុក @cleanbodia៕