ក្រុងតៃប៉ិក៖ តួអក្សរចិន និងគំនូររចនាប័ទ្មកុលសម្ព័ន្ធត្រូវបានសិល្បករចំណាស់ វូ រ៉ុងប៊ី រចនាលើដុំថ្មលក់ជាវត្ថុអនុស្សាវរីយ៍នៅតាមដងវិថីនៃក្រុងតៃប៉ិអស់រយៈពេលជាង ៤០ ឆ្នាំមកហើយ។
ជាមួយរហស្សនាម «ពូដុំថ្ម» បុរសតៃវ៉ាន់វ័យ ៦៤ ឆ្នាំរូបនេះបានចាប់ផ្ដើមគូរគំនូរលើដុំថ្មតូចៗ ជាវត្ថុអនុស្សាវរីយ៍ជូនកូនសិស្សរបស់លោកក្នុងថ្ងៃបុណ្យគ្រិស្តស្មាស់ គ្រាដែលលោកធ្វើជាគ្រូបង្រៀន។
គំនិតលក់វត្ថុសិល្បៈនេះបានផុសឡើងនៅពេលដែលលោកទទួលបានការអនុញ្ញាតឲ្យដាក់តាំងស្នាដៃតាមដងវិថីក្រុងតៃប៉ិ។ លោក វ៉ូ បានចាត់ទុក គំនូរលើដុំថ្មរបស់លោកថាជាវត្ថុនាំពរជ័យដល់អ្នកទិញយកទៅរក្សាទុក ឬធ្វើជាអំណោយជូនមនុស្សជាទីស្រឡាញ់។
លោក វូ បានរៀបរាប់ប្រាប់ទីភ្នាក់ងារ AFP ថា «ខ្ញុំតែងតែរៀបរាប់ប្រាប់អតិថិជនពីភាពវិជ្ជមាននៃគំនូរចម្រុះពណ៌នីមួយៗនៅលើដុំថ្មដ៏រលោងទាំងនេះ។ ខ្ញុំសង្ឃឹមថា ពួកគេនឹងទទួលបានអំណោយនាំសំណាង និងរឿងល្អៗដល់ជីវិតរបស់ពួកគេ»។
ក្នុងចំណោមគំនូរលើដុំថ្មទាំងនោះ រូបស្លឹកត្រចៀកក្រាញ់ ទទួលបានការពេញនិយមជាងគេពីអតិថិជន ជាមួយជំនឿថាវានាំលាភសុភមង្គល។
ដុំថ្មដទៃទៀតមានរូបត្រី ជានិមិត្តរូបនៃភាពសម្បូររុងរឿងតាមវប្បធម៌ចិន។ រីឯគំនូរបែបកុលសម្ព័ន្ធ ក៏ពេញនិយមសម្រាប់អ្នកដែលស្វែងរកអំណោយចម្រុះវប្បធម៌។
លោក វូ បាននិយាយថា៖ «វប្បធម៌កុលសម្ព័ន្ធនៅជុំវិញពិភពលោកវាមានលក្ខណៈស្រដៀងគ្នា ហើយខ្ញុំប្រើប្រាស់គំនូរនេះតំណាងឲ្យសារៈសំខាន់នៃជីវិតលើផែនដី»។
ប្រជាជនសរុបនៅតៃវ៉ាន់ ភាគច្រើនជាជនជាតិចិន ដើមកំណើតហាន ដោយក្នុងនោះមានតែ ២ ភាគរយជាកុលសម្ព័ន្ធជនជាតិដើម។
អ្នកប្រាជ្ញជាច្រើនបានចាត់ទុកតៃវ៉ាន់ និងផ្នែកមួយចំនួននៃអាស៊ីអាគ្នេយ៍ថា ជាប្រភពដើមកំណើតរបស់ប្រជាជនអូស្ត្រូណេស៊ី ដោយរាប់បញ្ចូលអាស៊ីប៉ាស៊ីហ្វិក អាស៊ីអាគ្នេយ៍ នូវែលសេឡង់ ម៉ៅរីស និងប៉ូលីណេស៊ី នៅហាវ៉ៃ។
មិនខុសពីសហគមន៍ជនជាតិដើមនៅជុំវិញពិភពលោកនោះទេ កុលសម្ព័ន្ធនៅកោះតៃវ៉ាន់បានប្រឈមនឹងបញ្ហាវប្បធម៌ និងសេដ្ឋកិច្ចចាប់តាំងពីការមកដល់នៃជនជាតិហាននៅសតវត្សរ៍ទី ១៧៕ AFP