.jpg)
លោក Vernon Kruger បក់ដៃស្វាគមន៍អ្នកដំណើរពីលើធុងឈើ។ រូបថត AFP
ក្រុងដាល់ស្ត្រុម៖ លោក Vernon Kruger បានអង្គុយក្នុងធុងឈើ ដោតលើបង្គោលកម្ពស់ ២៥ ម៉ែត្រពីដី អស់រយៈពេលជាង ២ ខែមកហើយ។
អង្គុយខ្ពស់សន្លឹម សម្លឹងមើលទីក្រុងដាល់ស្ត្រុមទាំងញញឹម បុរសវ័យ ៥២ ឆ្នាំរូបនេះ បានបំបែកកំណត់ត្រាចាស់របស់ខ្លួនកាលពីឆ្នាំ ១៩៩៧ ដោយសកម្មភាពរស់នៅធុងឈើស្ទើរតែពេញ ១ ខែ។
បុរសដែលមានរបរជាអ្នកបើកបររថយន្តអាជីពរូបនេះបានពោលថា៖ «ដេក ដើរ ឈរ អង្គុយ ក្នុងធុងឈើនេះ វាមិនមែនជារឿងងាយស្រួលនោះទេ»។
លោករៀបរាប់ទៀតថា៖ «វាតូច ហើយពិបាកឲ្យយើងងើបចុះឡើង សូម្បីតែរើខ្លួនឲ្យស្រួលក៏មិនអាចដែរ។ ការគេងក៏ត្រូវគេងដូចទារកក្នុងផ្ទៃ»។
លោក Kruger បានចាត់ទុកធុងឈើជាផ្ទះរបស់លោកនៅលើអាកាសដោយវាមានបំពាក់ប្រព័ន្ធលូ សម្រាប់បង្ហូរកាកសំណល់ផងដែរ។
ធុងឈើកម្ពស់ ២៥ ម៉ែត្រពីដី បីដូចជាផ្ទះបណ្ដោះអាសន្នរបស់លោក។ រូបថត AFP
រយៈពេលជាង ២ ខែមកនេះ លោកបានងូតទឹកតែ ២ ដងគត់ក្នុង ១ សប្ដាហ៍។ ម្ហូបរបស់លោកត្រូវបានក្រុមការងារស្ទូចទម្លាក់ជារៀងរាល់ពេល ដោយប្រើកន្ត្រកយោង។
គំនិតយកធុងឈើធ្វើជាផ្ទះបណ្ដោះអាសន្នលើមេឃានេះ ត្រូវបានលោកនឹកឃើញពេលដែលលោកឡើងដើមដូង នៅកោះមួយក្នុងដំណើរវិស្សមកាលច្រើនឆ្នាំកន្លងមក។
លោក Vernon Kruger បានរំឭកថា៖ «មានគេប្រាប់ខ្ញុំថា ម៉េចក៏មិនសាកបំបែកកំណត់ត្រាអង្គុយលើដើមឈើរាប់សិបថ្ងៃទៅ។ ដំបូងឡើយ ខ្ញុំគិតថា វាដូចជាកំប្លែងពេកទេដឹង តែក្រោយមកខ្ញុំស្រាប់តែចង់ធ្វើរឿងនេះ ដើម្បីយកឈ្នះមិត្តរបស់ខ្ញុំ»។
ក្រោយពីធ្វើការស្រាវជ្រាវបន្តិច លោកបានរកឃើញបុរសឥណ្ឌូនេស៊ីម្នាក់ធ្លាប់បង្កើតឯតទគ្គកម្មអង្គុយលើដើមឈើរយៈពេល ២៨ ថ្ងៃ។
លោកបានសាកល្បងដោយប្ដូរជាធុងឈើវិញ ហើយកាលពីឆ្នាំ ១៩៩៧ លោកជោគជ័យអាចឆ្លងកាត់បានរយៈពេលជាង ៥០ ថ្ងៃ។ បើទោះជាមានបញ្ហាចុករួយបន្តិចមែន ប៉ុន្តែលោកប្រាថ្នាចង់បំបែកឯតទគ្គកម្មខ្លួនឯងនៅជាង ២ ទសវត្សរ៍បន្ទាប់។
គិតត្រឹមថ្ងៃចន្ទដើមសប្ដាហ៍នេះ លោកបានរស់នៅក្នុងធុងឈើចំនួន ៦៧ ថ្ងៃ ក្រោមការផ្ដល់បាយទឹកដោយមិត្តភក្ដិ។
ប៉ន្តែពួកគេកំពុងតែបារម្ភដោយសារលោក Vernon Kruger ពុំទាន់មានគម្រោងបញ្ចប់ការស្នាក់នៅធុងឈើកម្ពស់ ២៥ ម៉ែត្រពីដីនោះនៅឡើយទេ៕ AFP
