.jpg)
បុរសឥណ្ឌា ចាប់ផ្ដើមចេះប្រើគ្រឿងសម្អាង និងផលិតផលថែរក្សាសម្រស់ រាប់តាងពីការបិទម៉ាស និងប្រេងលាបក្រោយកោររោមមុខ។ រូបថត AFP
ក្រុងម៉ុមបៃ: ក្រោយសម្អាតស្បែកងាប់នៅលើផ្ទៃមុខ និងធ្វើក្រចក លោក ឡាក់សាយ ណារូឡា បន្ដជ្រើសយកសេវាកម្មថែសម្ផស្សផ្សេងៗទៀត ដោយការលាបក្រែមជម្រុះរោមលើដើមទ្រូង ជាទង្វើដែលប៉ះពាល់ដល់ភាពជាបុរសក្នុងសង្គមឥណ្ឌា។
យកលំនាំតាមតារាភាពយន្ដបូលីវូដ និងកំពូលកីឡាករគ្រីឃីត បុរសឥណ្ឌាពេញនិយមផលិតផលសម្អិតសម្អាងកាយ និងព្យាយាមបំបែករនាំងប្រពៃណី ដែលតែងតែយល់ឃើញថា ប្រទេសត្រូវគ្រប់គ្រងដោយបុរស។
ពិធីករទូរទស្សន៍នៅក្រុងម៉ុមបៃ ណារូឡា បានប្រាប់ AFP ថា៖ «ខ្ញុំចំណាយពេល ១៥ នាទីលើតែសក់ និងរៀបចំមួយថ្ងៃមុនពេលថត ខ្ញុំសម្អាតស្បែកងាប់លើផ្ទៃមុខ និងប្រើកញ្ចប់ឱសថបុរាណ»។
ប្រពៃណីឥណ្ឌា មានទស្សនៈថា បុរសជាអ្កកដឹកនាំត្រូវតែរឹងមាំ ដូចជារោមខ្លួនប្រាណ និងបែកញើសកក្លាក់តាមធម្មជាតិបុរស។ រូបថត AFP
បុរសវ័យ ២៩ ឆ្នាំ បានប្រាប់ទីភ្នាក់ងារ AFP ថា៖ «វាធ្វើឲ្យយើងមានអារម្មណ៍ស្រស់សង្ហារ។ ខ្ញុំជាបុរសម្នាក់ ហើយខ្ញុំធ្វើបែបនេះសម្រាប់ជីវិតខ្ញុំ ដែលមានភាពជឿជាក់លើខ្លួនឯង»។
លោកបន្ថែមថា វាជាវេលាត្រូវទម្លាក់ទស្សនៈថា «បុរសគ្របឥទ្ធិពលលើស្ដ្រី» ចោលហើយ។
ចាប់ពីការបិទម៉ាសធ្យូងលើផ្ទៃមុខ រហូតដល់លាបប្រេងពុកចង្កា ដើម្បីរំលេចនូវពណ៌ព្រឿងៗ បុរសឥណ្ឌា ចាប់ផ្ដើមគិតគូរពីការសម្អិតសម្អាងកាយ ខុសពីទម្លាប់អតីតកាល។
បណ្ដាញសង្គមគឺជាសមរភូមិសំខាន់សម្រាប់ជំរុញទស្សនៈថ្មី ដោយបុរសក៏ត្រូវចេះសម្អិតសម្អាងកាយ ដូចតារាបូលីវូដសម័យថ្មី។ រូបថត AFP
ជាមួយទំនោរថែទាំសម្រស់បុរសសម័យថ្មីនេះ ក្រុមហ៊ុនឥណ្ឌារំពឹងថា នឹងទាក់ទាញចំណាប់អារម្មណ៍ប្រុសឥណ្ឌាកាន់តែច្រើនឲ្យងាកមកគិតគូររឿងរូបរាង និងសម្ផស្ស ដូចជា រូបលោក ណារូឡាដែរ។
ដោយជនជាតិឥណ្ឌាម្នាក់ចំណោម ៤ នាក់មានស្មានហ្វូន ហើយភាគច្រើនជាបុរស។
បណ្ដាញសង្គមគឺជាសមរភូមិសំខាន់សម្រាប់ជំរុញទស្សនៈថ្មី គ្របដណ្ដប់លើវប្បធម៌បុរសជាធំ ដូចជា ភាពយន្ដវីរបុរសបូលីវូដ ទសវត្សរ៍ឆ្នាំ១៩៩០ ដែលសុទ្ធតែពោរពេញដោយញើស និងភាពកខ្វក់លើរាងកាយ។
បច្ចុប្បន្ន ភាពយន្ដឥណ្ឌាតែងតែបង្ហាញរូបភាពតារា អត់មានរំលេចរោមដូចស្វា សូម្បីតែពួកគេត្រូវវាយតប់ជាមួយតួអង្គអាក្រក់យ៉ាងណាក៏ដោយ។
បុរសឥណ្ឌាបិទម៉ាសមុខ ថែរក្សាសម្រស់ ដែលផ្ទុយពីទម្លាប់បុរសកាលពីអតីតកាល។ រូបថត AFP
ជែលលាបសម្រាប់លេងម៉ូដសក់ ដែលធ្វើការផ្សព្វផ្សាយពាណិជ្ជកម្ម ដូចតារាបូលីវូដ Ranveer Singh គឺជាជំហាននាំឲ្យបុរសចេះតាក់តែងកាយខុសពីមុន។
យោងតាមក្រុមហ៊ុនស្រាវជ្រាវ Euro Monitor International ឧស្សាហកម្មសម្អាងកាយបុរសនៅឥណ្ឌាបានកើនឡើង ១០ ភាគរយ រវាងឆ្នាំ២០១៧ និង ២០១៨ ជាមួយការលក់ឡើងដល់តម្លៃ ១,៤ ពាន់លានដុល្លារ។
នាយកប្រតិបត្ដិផ្នែកទំនាក់ទំនងនៅក្រុងម៉ុមបៃ លោក ស៊ូរ៉ាក បាឡាគ្រីស្នាន់ អាយុ ៣០ ឆ្នាំ ដែលមានរបៀបរបបថែរក្សាសម្រស់ រួមមានការលាបប្រេងលើពុកចង្កា រាងកាយ និងសក់ បានប្រាប់ទីភ្នាក់ងារ AFP ថា៖ «ការសម្អិតសម្អាងកាយជួយបុរសៗទទួលបានការងារល្អ មានភាពរ៉ូមេនទិក ឬគាប់ភ្នែកនារីៗក្នុងក្លិបរាត្រី»។
ឧស្សាហកម្មគ្រឿងសម្អាងបុរសនៅឥណ្ឌាបានកើនឡើង ១០ ភាគរយ រវាងឆ្នាំ២០១៧ និង ២០១៨ ជាមួយការលក់ឡើងដល់តម្លៃ ១,៤ ពាន់លានដុល្លារ។ រូបថត AFP
បុរសដែលចេះតាក់តែងកាយស្អាតភ្លឹងរូបនេះ បានលើកឡើងទៀតថា៖ «នៅពេលមានរាងកាយស្អាត យើងក៏មានអារម្មណ៍ស្រស់ស្រាយ ដោយរូបរាងសម្អិតសម្អាងសមសួន រួមជាមួយការស្លៀកពាក់បែបទាន់សម័យ»។
មិនខុសពីកូរ៉េខាងត្បូង និងជប៉ុន ដែលជំរុញទីផ្សារសម្រាប់ផលិតផលថែសម្ផស្សបុរស ឧស្សាហកម្មសម្អិតសម្អាងកាយនៅឥណ្ឌាស្ថិតក្នុងកម្រិតពុះពាររនាំងប្រពៃណីដ៏អាសោចចំពោះទំនៀមទម្លាប់បុរសជាធំ។
លោក បាឡា គ្រីស្នាន់ បាននិយាយថា៖ «យើងកំពុងស្ថិតក្នុងដំណាក់កាលផ្លាស់ប្ដូរ។ ការសម្អិតសម្អាងកាយមិនមែនមានន័យថា យើងផ្លាស់ប្ដូរអត្ដចរិកទាំងស្រុងឯណា។ អន្ដរកាលត្រូវការពេលវេលា»៕ AFP/HR
បុរសឥណ្ឌាសម័យថ្មី លែងសូវមានរោមមុខ និងរាងកាយ ដូចកាលពីអតីតកាល។ រូបថត AFP
ទម្លាប់ប្រចាំថ្ងៃ មានការកក់ និងអប់សក់ រួចផ្ដុំលាបជែល លេងម៉ូដយ៉ាងមានសណ្ដាប់ធ្នាប់។ រូបថត AFP
