ក្រុងហ្សាការតា៖ ចរាចរណ៍ណែនណាន់តាន់តាប់នៅឥណ្ឌូនេស៊ី ល្បីធ្វើឲ្យអ្នកដំណើរកាន់តែឈឺក្បាល។ តែបុរសម្នាក់បានសម្រេចចិត្ដហោះហើរឲ្យផុតបញ្ហាកកស្ទះចរាចរណ៍ ដោយការផលិតឧទ្ធម្ភាគចក្រផ្ទាល់ខ្លួន។
លោក ជូជុន ជូណែឌី បានចំណាយពេលទំនេរនៅទីធ្លាក្រោយផ្ទះសម្ងំផលិតឧទ្ធម្ភាគចក្រផ្ទាល់ខ្លួន ដោយមើលវីដេអូណែនាំ ខណៈលោកសុបិនចង់ហោះហើរលើដងវិថីជន់ដោយយានជំនិះនៃក្រុងកំណើតស៊ូកាប៊ូមី។
បុរសអាយុ ៤២ ឆ្នាំ និយាយពីបញ្ហាការកកស្ទះចរាចរណ៍ចម្ងាយប្រមាណ ១១០ គីឡូម៉ែត្រភាគខាងត្បូង ក្រុងហ្សាការតាថា៖ «វាធ្វើឲ្យយើងធុញថប់អារម្មណ៍ខ្លាំងណាស់។ ទីបំផុត យើងមានការខឹងសម្បាចំពោះការចំណាយលើកំណាត់ផ្លូវដ៏សែនជិត»។
ការទិញគ្រឿងបន្លាស់ និងការប្រើប្រាស់តួដែកពីរោងជាងជួសជុលរថយន្ដរបស់ខ្លួន លោក ជូណែឌី បាននិយាយថា លោកបានចំណាយប្រាក់ប្រមាណ ៣០ លានរូពី (២ ១០០ ដុល្លារ) លើការផលិតយន្ដហោះ តាំងពីចាប់ផ្ដើមដំបូង ១៨ ខែមុន។
កូនប្រុសរបស់លោក ជូណែឌី និងអ្នកជិតខាងបានស្រាក់ដៃគ្នាជួយផលិតឧទ្ធម្ភាគចក្រប្រើសាំងប្រវែង ៨ ម៉ែត្រ ដែលយាននេះមិនទាន់បានហោះសាកល្បងម្ដងនៅឡើយទេ។
លោកបាននិយាយថា៖ «ដរាបណាឧទ្ធម្ភាគចក្រអាចហោះហើរបាន ទើបខ្ញុំពេញចិត្ដមែនទែន»។
ការខិតខំរបស់លោកទំនងជាអាចសម្រេចលទ្ធផលល្អ តែលោក ជូណែឌី មិនមែនជាបុគ្គលដំបូងដែលបានព្យាយាម និងផលិតយន្ដហោះធុនតូចនេះ។ កាលពី ២ ឆ្នាំមុន បុរសអាហ្វ្រិកខាងត្បូងម្នាក់ បានប្រើដែកស័ង្កសី និងដែកចាស់ៗដទៃទៀតផលិតឧទ្ធម្ភាគចក្រប៉ូលិសចម្លង។ នេះបើយោងតាមរបាយការណ៍ផ្សព្វផ្សាយក្នុងស្រុក។
កសិករម្នាក់ក្នុងប្រទេស ចិន ក៏បានបង្កការភ្ញាក់ផ្អើលនៅឆ្នាំ ២០១៦ ក្រោយពីលោកចំណាយពេល ៣ ឆ្នាំ ព្យាយាម និងបរាជ័យក្នុងការផលិតឧទ្ធម្ភាគចក្រផ្ទាល់ខ្លួនដែរ។
មិនថាគម្រោងរបស់លោក ជូណែឌី អាចទទួលជោគជ័យ សុវត្ថិភាពនៃការហោះហើរហាក់មិនសូវពិបាកដូចបន្ទុកការចំណាយឡើយ។
ភរិយាលោកឈ្មោះ យេទី បានត្អូញថា៖ «គាត់ចាយប្រាក់ច្រើនសន្ធឹកទិញម៉ាស៊ីន និងស្លាប ហើយបើប្រាក់ទាំងអម្បាលម៉ានយកទៅចាយលើឧទ្ធម្ភាគចក្រនេះ យើងមុខជាដាច់បាយមិនខាន»៕ AFP/HR