The Phnom Penh Post Search

Search form




Logo of Phnom Penh Post newspaper Phnom Penh Post - បុស្បា ប៉ាន់ វិល​មក​កាន់​មហោ​ស្រព​តន្ដ្រី​ជាមួយ​នឹង​និស្សិត​បរទេស ១៤ រូប​

បុស្បា ប៉ាន់ វិល​មក​កាន់​មហោ​ស្រព​តន្ដ្រី​ជាមួយ​នឹង​និស្សិត​បរទេស ១៤ រូប​

Content image - Phnom Penh Post
​យុវតី​មាន​ដុង​សិល្បៈ​ពី​កុមារ​ភាព បុស្បា ប៉ាន់​។ រូប សហការី

បុស្បា ប៉ាន់ វិល​មក​កាន់​មហោ​ស្រព​តន្ដ្រី​ជាមួយ​នឹង​និស្សិត​បរទេស ១៤ រូប​

ភ្នំពេញៈ យុវតី​ដែល​មាន​ដុង​សិល្បៈ​តាំងពី​កុមារ​ភាព​ដោយ​ចេះ​និពន្ធ​បទ​ចម្រៀង​ច្រៀង​ខ្លួន​ឯង និងអាច​លេង​ឧប​ករណ៍​តន្រ្តី​ដូចជា វីយូឡុង និង​ព្យ៉ាណូ​ នៅ​ចន្លោះ​វ័យ​ ៩ ឆ្នាំទៅ ១៣ ឆ្នាំ​ បុស្បា ប៉ាន់ នឹង​ត្រឡប់​មកកាន់​ស្រុកខ្មែរ​នៅ​ព្រឹក​ថ្ងៃនេះ [ទី១២ ខែ​កក្កដា] ជាមួយ​នឹងក្រុម​និស្សិត​សិក្សា​ផ្នែក​សិល្បៈ​បរទេស​ចំនួន​ ១៤ រូបមក​ពី ៥ ប្រទេស​ផ្សេងៗ​គ្នា ក្រោម​ការ​ដឹក​នាំដោយ​លោក​បណ្ឌិត​ អ៊ុង ឈី​ណារី (Ung Chinary)​ ជាអ្នក​និពន្ធ​ចម្រៀង​ខ្មែរ​ជំនាន់​ចាស់​មួយរូប នៅក្នុង​កម្មវិធី​ឈ្មោះ​ថា «Nimita Composition Institute»។ ​

គេនៅ​ចាំមិន​ភ្លេច​ទេ​ថា យុវតី​រូបនេះ ធ្លាប់​បាន​ធ្វើឲ្យ​ក្រុម​អ្នក​ផ្នែក​តូរ្យតន្ត្រី​មកពី​បស្ចិម​​ប្រទេស​កោត​សរសើរ​មិនដាច់​ពីមាត់​ពីស្នាដៃ​និពន្ធបទ​ពណ៌នា​ពី​មន្តស្នេហ៍​ទេសភាព​នៃផ្ទះ​ឈើ​នៅក្នុង​តំបន់​ជនបទ​មាន​ចំណង​ជើងថា ​«The Enchanted Pavilion​» និងបាន​ចាក​ចេញ​ពីកម្ពុជា​ទៅ​សិក្សា​សាលា​សិល្បៈ​ដ៏ល្បី​នៅ​អាមេរិក Walnut Hill School for the Arts (WHS)​ លើជំនាញ​ច្រៀង និង​និពន្ធ​ចម្រៀង ពីខែ​មេសា ឆ្នាំ ២០១៣។

បុស្បា ប៉ាន់ ទើបតែ​មានរូប​ឆោម​លោមល្អ​ក្នុងវ័យ ១៧ ឆ្នាំ​​ខណៈ​នាងទើប​សិក្សា​បញ្ចប់​ឆ្នាំទី ១ នៅ​សាកល​វិទ្យា​ល័យ​សិល្បៈ​ New England Conservatory​ នៅ​ទីក្រុង​បូស្តុន​ សហ​រដ្ឋ​អាមេរិក​។

ពេល​សាកសួរ​ថា​តើ បុស្បា អាច​ប្រៀបធៀប​អំពីការ​សិក្សា​សិល្បៈ​នៅ​កម្ពុជា និង​សាលា​ WHS បាន​ដែរឬទេ? យុវតីរូប​នេះ​ប្រាប់ភ្នំពេញ ប៉ុស្តិ៍ថា៖ «ការ​អប់រំ​ជំនាញ​សិល្បៈ​បែប​នេះ នៅ​មិនទាន់​មាននៅ​កម្ពុជាទេ។ ដូច្នេះ​ទើប​បានជា​ត្រូវចាក​ចេញ​មក​សិក្សានៅ​សាលា​​ WHS ដែល​មាន​កម្រិត​ស្តង់​ដារ​អន្តរជាតិ​ និង​មាន​ការ​បណ្តុះ​បណ្តាល​ឲ្យក្លាយ​ទៅ​ជាសិល្បករ​លំដាប់​ពិភព​លោក។ ខ្ញុំគិត​ថានៅ​ស្រុកខ្មែរ​ដូច​ជា​ពុំទាន់​មាន​ប្រភព​គ្រប់​គ្រាន់​សម្រាប់​ការអប់រំ​ជំនាញ​សិល្បៈ​តូរ្យ​តន្ដ្រីនេះ​ទេ»។

បុស្បា ប៉ាន់ បន្ត​ថា៖ «បើ​តាម​ការ​សិក្សា​នា​ប៉ុន្មានបួន​ប្រាំ​សត​វត្សរ៍​ចុងក្រោយ​នេះ ​ឯ​បស្ចិម​​ប្រទេស​ គេបាន​អភិវឌ្ឍ​ការតែង​និពន្ធ ស្វែង​យល់ពី​ការ​ស្តាប់និង​វិភាគ​លើ​ប្រវត្តិ​នៃ​តូរ្យតន្រ្តី​ដោយ​ពន្យល់​លម្អិតពី​អ្នក​ជំនាញ​តូរ្យតន្ដ្រី​ទាំងជា​របស់​បស្ចិម​ប្រទេស ឬ​មិនមែន។បើមិន​ទាន់​មាន​លក្ខណៈ​ច្បាស់លាស់​ទេ​ គេនឹង​បន្ត​ការ​ស្រាវជ្រាវ​បន្ថែម​ឲ្យសព្វ​គ្រប់។ ដោយ​ឡែក កម្ពុជា​មាន​វប្បធម៌​ល្អ​ផូរផង់​ណាស់ តែ​មិនទាន់​មានការ​សិក្សា​លម្អិត​ ខណៈ​ការ​ស្រាវជ្រាវ​ក៏ពុំ​ទាន់មាន​គុណភាព​ល្អ​គ្រប់គ្រាន់​ដែរ​និងអាច​បណ្តាល​មកពី​ក្រុម​តន្ដ្រីករ​ខ្មែរ​យើង​នៅ​ពុំទាន់​មាន​ទំនោរ ងាក​រកការ​សរសេរ​ និង​អភិរក្ស​ឧបករណ៍​តន្រ្តី​ខ្លួនទុក​ឲ្យអ្នក​ជំនាន់​ក្រោយ​បាន​ស្វែង​យល់​បន្ត»។

យុវតី​ បុស្បា ប៉ាន់ ហាក់​មាន​គម្រោង​​គោល​ដៅ​សម្រាប់​អនាគត​ខ្លួន​រួចហើយ​ បន្ទាប់​ពីរៀន​ចប់​នោះ។

នាង​ បង្ហើប​ថា៖ «ខ្ញុំមាន​បំណង​ចង់ឲ្យ​ប្រជាជន​ខ្មែរ​ស្គាល់​សិល្បៈ​តូរ្យ​តន្ដ្រី​បស្ចិម​ប្រទេស​តាមរយៈ​សៀវ​ភៅបក​​ប្រែ​ និង​វីដេអូ​អប់រំ​ផ្នែក​តន្រ្តី​សម្រួល​ជាភាសា​ខ្មែរ​ឲ្យ​ពួកគាត់​យល់​ដឹង​ផងដែរ»៕​

អត្ថបទគួរចាប់អារម្មណ៍