.jpg)
តារាចម្រៀងស្រីសម្បូរក្បាច់រាំប្លែកៗ និងកាន់តែសិចស៊ី កញ្ញា ទេព បូព្រឹក្ស និង ងួន ចាន់ដេវីត បង្ហើបរឿងពួកគេត្រៀមថត Pre-Wedding។ រូបថត ហ្វេសប៊ុក
ភ្នំពេញៈ ខណៈសម្ព័ន្ធស្នេហ៍ដំណើរការយ៉ាងរលូនល្អចាស់ទុំទាំងសងខាងដឹងឮថែមទាំងប្រើពាក្យហៅគ្នាថា បង និងអូន ពេញៗមាត់ប្រៀបដូចប្តីប្រពន្ធរៀបការថ្មីថ្មោងទៅហើយ តារាចម្រៀងដែលកាន់តែសិចស៊ី និងកែខៃរាងកាយកាន់តែប្លែកកញ្ញា ទេព បូព្រឹក្ស និងតារាចម្រៀងប្រុសរាងខ្ពស់ស្រឡះដែលចេះនិពន្ធទាំងទំនុកច្រៀង និងទំនុកភ្លេងលោក ងួន ចាន់ដេវីត ត្រៀមនាំគ្នាទៅថត Pre-Wedding នៅប្រទេសម៉ាឌីវដើមសប្តាហ៍ក្រោយនេះ។
ដំណឹងនេះលេចចេញខណៈពេលតារាចម្រៀងស្រីវ័យ ២៤ ឆ្នាំដែលជ្រកក្រោមទ្រនំហង្សមាសរួមកញ្ញា ទេព បូព្រឹក្ស បង្ហើរសារតាមបណ្តាញសង្គមថា៖ «អើយ ជិតដល់ថ្ងៃថត Pre-Wedding ហើយមានអារម្មណ៍ស្រឡាញ់ណាស់!យ៉ាងម៉េចដែរ Idol កំហូច G-Devith!»។
ថ្លែងទាំងមានសម្តីម៉ឺងម៉ាត់ តារាចម្រៀងស្រីពូកែខាងចាក់ក្បាច់រាំសមជាងបង្ហើរសំនៀងដែលរងគ្រោះដោយសារការជះស្រាបៀរពីភ្ញៀវនៅហាងបៀរហ្គាឌិនកាលចុងឆ្នាំមុន និងទើបតែឮដំណឹងចចាមអារ៉ាមថាក៏ឈប់ពីផលិតកម្មហង្សមាសនាដើមឆ្នាំនោះបង្ហើបប្រាប់ភ្នំពេញប៉ុស្តិ៍ថា៖ «ចាសបង! គ្រាន់តែជាគម្រោងថតទុកខណៈពួកយើងជិតទៅដើរលេងក្រៅប្រទេសគឺប្រទេសម៉ាឌីវនៅថ្ងៃទី ១៨ ខែមីនា ឆ្នាំ ២០១៩ ខាងមុខនេះដែលត្រូវសម្រាកដើរលេងនៅទីនោះប្រមាណជា ៣-៤ ថ្ងៃ។ គិតថាឆ្លៀតពេលទៅដើរលេងក៏ថតរូប ឬវីដេអូ ដើម្បីសន្សំទុក Pre-Wedding តែម្តងទៅព្រោះថាជាវេលាល្អ ហើយក៏កម្រនឹងបានទៅទៀត»។
តាមការសង្កេតឃើញថាមានភាពចុះសម្រុងគ្នាគឺចាប់តាំងពីផលិតកម្មហង្សមាសផ្តល់ឱកាសឲ្យអ្នកទាំង ២ ផលិតបទចម្រៀងរួមគ្នាមកកញ្ញា ទេព បូព្រឹក្ស និង ងួន ចាន់ដេវីត មិនត្រឹមតែជាដៃគូចម្រៀងស៊ីចង្វាក់គ្នាប៉ុណ្ណោះទេ ថែមទាំងហួសទៅផ្សារភ្ជាប់បេះដូងយ៉ាងស៊ីជម្រៅរហូតក្លាយជាគូស្នេហ៍ដ៏ស្អិតល្មួតទៀតផង។ តែដោយសារនៅវ័យក្មេងៗនៅឡើយ ទើបចង់បន្តសម្ព័ន្ធភាពត្រឹមជាគូស្នេហ៍នេះសិន មិនទាន់ចង់កំណត់វេលាចូលរោងជ័យនៅឡើយ។
កញ្ញា ទេព បូព្រឹក្ស ក៏បានបញ្ជាក់ថា៖ «ក្រោយពីពួកយើងបានស្រឡាញ់គ្នានារយៈពេលប៉ុន្មានឆ្នាំនេះមានចាស់ទុំដឹងឮទាំងសងខាងហើយឈានមកក្លាយជាគូសង្សារយល់ចិត្តគ្នាមក យើងសុខចិត្តរក្សានៅត្រឹមជាគូស្នេហ៍សិនគឺមិនទាន់ចង់រហ័សទៅរៀបការនោះទេ។ ម្យ៉ាងទៀតយើងទាំង ២ សុទ្ធតែនៅមានវ័យក្មេងៗផងគឺត្រឹមជាង ២០ ឆ្នាំ ដែរនោះគិតថាចង់ទុកពេលស្វែងយល់គ្នាច្រើនឆ្នាំសិនចាំសម្រេចរឿងរៀបការ»។
កញ្ញា ទេព បូព្រឹក្ស ក៏មន្ទិលថានាងចេញពីហង្សមាសដែរថា៖ «ខ្ញុំនៅមានកុងត្រាយូរទៀតជាមួយហង្សមាសមិនបានឈប់ទេ។ មានតែ Devith ទេដែលឈប់ ខណៈពេលនេះគាត់ច្រៀង និងធ្វើបទឲ្យក្រុមហ៊ុនស្មាត»៕
