The Phnom Penh Post Search

Search form




Logo of Phnom Penh Post newspaper Phnom Penh Post - ប៉ូលីណា វេហ្គា ជា​បវរកញ្ញា​ទី២​នាំ​មកុដ​រាជិនី​ឲ្យ​កូឡុំប៊ី

ប៉ូលីណា វេហ្គា ជា​បវរកញ្ញា​ទី២​នាំ​មកុដ​រាជិនី​ឲ្យ​កូឡុំប៊ី

បវរកញ្ញា​កូឡុំប៊ី ប៉ូលីណា វេហ្គា នៅពេល​គ្រង​មកុដ​បវរកញ្ញា​ចក្កវាឡ​​​​។
បវរកញ្ញា​កូឡុំប៊ី ប៉ូលីណា វេហ្គា នៅពេល​គ្រង​មកុដ​បវរកញ្ញា​ចក្កវាឡ​​​​។ រូបថត AFP

ប៉ូលីណា វេហ្គា ជា​បវរកញ្ញា​ទី២​នាំ​មកុដ​រាជិនី​ឲ្យ​កូឡុំប៊ី

ក្រុង​ដូរ៉ាល: កញ្ញា ប៉ូលីណា វេហ្គា មក​ពី​កូឡុំប៊ី​ត្រូវ​បាន​បំពាក់​មកុដ​បវរកញ្ញា​ចក្កវាឡ​កាល​ពី​ថ្ងៃ​អាទិត្យ ដោយ​បាន​ផ្ដួល​កញ្ញា​ឯក​មក​ពី​សហរដ្ឋ​អាមេរិក អ៊ុយ​ក្រែន ហ្សាម៉ាអ៊ីក និង​ហូឡង់​នៅ​ឯការ​ប្រកួត​បវរកញ្ញា​របស់​ពិភពលោក​មួយ​នេះ​ក្នុង​រដ្ឋ​ហ្វ្ល័ររីដា។

តារា​ម៉ូដែល និង​ជានិស្សិត​វ័យ​២២​ឆ្នាំ ​បាន​ទទួល​ជ័យ​ជម្នះ​លើ​កញ្ញា​មក​ពី​៨៧​ប្រទេស​ផ្សេង​ទៀត​ ហើយ​នាង​គឺជា​រាជិនី​សម្រស់​កូឡុំប៊ីទី​២ ហើយ​ដែល​បាន​នាំ​មកុដ​ត្រឡប់​ទៅ​ផ្ទះ​វិញ​។

កញ្ញា វេហ្គា ដែល​ស្លៀក​រ៉ូប​វែង​ពណ៌​ទឹក​ប្រាក់ មាន​អារម្មណ៍​រំភើប​រីករាយ​លាយ​ឡំ​នឹង​ទឹក​ភ្នែក​រលីង​រលោង​ ពេល​ពាក់​ពានា​ និង​មកុដ​ពី​បវរកញ្ញា​វ៉េណេស៊ុយអេឡា​ប្ដូរ​តំណែង ​ហ្គាប្រៀឡា អ៊ីស្ល័រ។

កញ្ញា បាន​ឲ្យ​ដឹង​ថា​៖ «​យើង​ខិតខំ​ពុះពារ​គ្រប់​ឧបសគ្គ​ ហើយ​យើង​ព្យាយាម​ជម្នះ​ដើម្បី​សម្រេច​គោល​ដៅ​។ ក្រោយ​ពី​ជួប​ការ​លំបាក​ជា​ច្រើន​ឆ្នាំ យើង​នឹង​ឆ្ពោះ​ទៅកាន់​តំបន់​នានា​នៅ​លើ​វេទិកា​ពិភពលោក​»។

សកម្មភាព​រាជិនីសម្រស់​ចក្កវាឡ​​​នៅ​លើ​វេទិកា និង​ខាង​ក្រៅ​ឆាក​មុន​ការ​ប្រកួត​។
សកម្មភាព​រាជិនីសម្រស់​ចក្កវាឡ​​​នៅ​លើ​វេទិកា និង​ខាង​ក្រៅ​ឆាក​មុន​ការ​ប្រកួត​។ រូបថត AFP

តារា​ម៉ូដែល​កម្ពស់​១,៨០​ម៉ែត្រ​មក​ពី​ទីក្រុង​បារ៉ានគ្វីឡា គឺជា​ចៅ​ស្រី​អធិរាជ​សំនៀង​មាស ហ្គាស្ដូន វេហ្គា និង​បវរកញ្ញា អាត់ឡង់ទិក អេល​វីរ៉ា កាស្ទីលឡូ។

នាង​បាន​ផ្ដួល​កញ្ញា នីញ៉ា សានចេហ្វ មក​ពី​សហ​រដ្ឋ​អាមេរិក កញ្ញា ដាយអេណា ហាគូស្យា មក​ពី​អ៊ុយ​ក្រែន​ កញ្ញា យ៉ាស្មីន វើហៃជេន មក​ពី​ហូឡង់ និង​កញ្ញា កាស៊ី ហ្វេនណេលល៍ មក​ពី​ហ្ស៊កដានី ​​ដែល​ស្ថិត​ក្នុង​កញ្ញា​ឯក​ទាំង​៥​រូប​។

ការ​ប្រកួត​បវរកញ្ញា​ចក្កវាឡ​លើក​ទី​៦៣​ ដែល​រៀបចំ​នៅ​សាកល​វិទ្យាល័យ​អន្ដរជាតិ​រដ្ឋ​ហ្វ្ល័ររីដា បាន​​បង្ហាញ​ពី​ក្បួន​សម្លៀក​បំពាក់​ប្រពៃណី​ប្រចាំ​ជាតិ​នីមួយៗ​នៅ​ចំពោះ​អ្នក​គាំទ្រ​រាប់​លាន​នាក់។

គណៈកម្មការ​១០​រូប​ មាន​តួនាទី​ជ្រើស​រើស​ម្ចាស់​ជយ​លាភី​ឆ្នាំ​នេះ​ រួម​ទាំង​ស្ដេច​ប្រដាល់​ហ្វីលីពីន​ លោក Bacquiao ផង​ដែរ​។ ​ការ​ប្រកួត​​រៀបចំ​ដោយ Donald Trump ដែល​មាន​ការ​អូស​បន្លាយ​ពេល​នេះ មាន​អ្នក​ទស្សនា​ប្រមាណ​៦០០​លាន​នាក់​ទូទាំង​ពិភពលោក​។

ការ​ប្រជែង​យក​ម្ចាស់​គ្រង​មកុដ​រាជិនី​ចក្កវាឡ​ ចាប់​ផ្ដើម​តាំងពី​ឆ្នាំ​១៩៥២ ខណៈ​ការ​ប្រកួត​កញ្ញា​ឯក​ងូត​ទឹក​ស្អាត​រៀបចំ​ដោយ​ក្រុមហ៊ុន​ផលិត​សម្លៀក​បំពាក់​ហែល​ទឹក​ក្នុង​ទីក្រុង​ឡុង​ប៊ិក រដ្ឋ​កាលីហ្វ័រនីញ៉ា​។

យោង​តាម​គេហទំព័រ​រៀបចំ​ប្រកួត​បវរកញ្ញា បាន​ឲ្យ​ដឹង​ថា បច្ចុប្បន្ន​នេះ ការ​ប្រកួត​លើស​ពី​ការ​​រើស​តែ​រូប​សម្រស់​ស្អាត​ ប៉ុន្ដែ​​ផ្សំ​សមត្ថភាព​ បុគ្គលិក​លក្ខណៈ គោល​ដៅ​មនុស្ស​ធម៌​ និង​ការ​ស្វែងរក​ពន្លឺ​ជីវិត​ឲ្យ​អ្នក​ដទៃ៕ HR

អត្ថបទគួរចាប់អារម្មណ៍