.jpg)
ពិធីការិនីហង្សមាសកញ្ញា ប៉ែន ស្រីពេជ្រ ភ្ជាប់ពាក្យជាមួយពាណិជ្ជករ តែពន្យារពេលរៀបការ។ រូបថត ហ្វេសប៊ុក
ភ្នំពេញ៖ ដោយសារតែការរីករាលដាលរបស់ជំងឺកូវីដ ១៩ ពុំទាន់អាចអំណោយផលល្អនៃការជួបជុំក្នុងពិធីជប់លៀង ឬមង្គលការនៅឡើយនោះ ទើបបានជំរុញឲ្យពិធីការិនី កំពុងតែមានប្រជាប្រិយភាពកញ្ញា ប៉ែន ស្រីពេជ្រ ត្រូវពន្យារចូលរោងជ័យទៅដល់ឆ្នាំ ២០២១ ក្រោយពីបានភ្ជាប់ពាក្យ កាលពីចុងខែមេសា ឆ្នាំ ២០២០ កន្លងមកនេះ។
កាលពីថ្ងៃទី ២៧ ខែ មេសា ឆ្នាំ ២០២០ កន្លងផុតទៅថ្មីៗ តារាសម្ដែង និងជាពិធីការិនីកំពុងតែលេចធ្លោប្រចាំប៉ុស្ត៍ទូរទស្សន៍ហង្សមាស កញ្ញា ប៉ែន ស្រីពេជ្រ បានភ្ជាប់ពាក្យហើយជាមួយបុរសសង្ហាម្នាក់ ក្រោយពីបានស្គាល់គ្នា និងមើលចិត្តមើលថ្លើមអស់រយៈពេល ៥ ឆ្នាំ ដែលមានការចូលរួមពីសំណាក់ភ្ញៀវកិត្តិយសប្រកបដោយភាពរីករាយគ្រប់ៗគ្នា។
ក្រោយពីបានភ្ជាប់ពាក្យរួចភ្លាម ខណៈពេលឡើងឆាកតន្រ្តីម្តងៗ មហាជនសង្កេតឃើញថា ពិធីការិនីដែលឧស្សាហ៍ចាប់ដៃគូជាមួយលោក រ៉ាស៊ី លោក ជា វិបុល និងលោក វិសាល ជាដើមកញ្ញា ប៉ែន ស្រីពេជ្រ ហាក់មានភាពស្រស់ស្រាយ និងមានការដូរស្ទីលតុបតែងខ្លួនកាន់តែស្រស់ស្អាត ដោយមានអ្នកគាំទ្រនាំគ្នាលើកឡើងថា៖ «យ៉ី! ប៉ុន្មានថ្ងៃឃើញ ស្រីពេជ្រ បានម៉ូដសក់មើលទៅពិតជាស្អាតប្លែក និងទាក់ទាញដល់ហើយ រហូតចេះលេងស្ទីលឡើងឃ្យូតៗហ្មង បងពេជ្រ! ស្អាតណាស់ដាក់ម៉ូដសក់អ៊ីចឹងទៅក្មេងជាងមុនទៀត!»។
មិនតែប៉ុណ្ណោះ គេក៏ឃើញពិធីការិនី ពូកែសម្តីញ៉ែតៗរូបនេះសរសេរនៅលើហ្វេសប៊ុកផ្សាយដំណឹងល្អខ្លួនដល់ប្រិយមិត្តបានដឹងដែរថា៖ «ពីធីភ្ជាប់ពាក្យខ្ញុំ ជាមួយ បង នេត្រា ថ្ងៃទី ២៧ ខែ មេសា ឆ្នាំ ២០២០ រយៈពេល ៥ ឆ្នាំ ហើយ ដែលយើងបានស្គាល់គ្នា ហើយថ្ងៃនេះ ហើយដែលយើងក្លាយជាគូដណ្ដឹងនឹងគ្នា។ អរគុណអ្នកមានគុណទាំង ៤ ធ្វើឲ្យកូនទាំង ២ មានថ្ងៃនេះ។ កូនទាំង ២ សូមជូនពរ ឲ្យលោកអ្នកមានគុណ និងក្រុមគ្រួសារទាំងសងខាង ទទួលបាននូវសេចក្ដីសុខ និងសេចក្ដីចម្រើនគ្រប់ក្រុមគ្រួសារ»។
រំពេចនោះមិត្តសិល្បៈ និងអ្នកគាំទ្រតារាសម្ដែង និងជាពិធីការិនីប្រចាំនៅស្ថានីយទូរទស្សន៍ហង្ស មាស កញ្ញា ប៉ែន ស្រីពេជ្រ ក៏បង្ហាញការភ្ញាក់ផ្អើលនឹងពិធីភ្ជាប់ពាក្យរបស់កញ្ញាដែរ ហើយចង់ដឹងពីថ្ងៃចូលរោងជ័យរបស់នាងដែរ ក្រោយពីភ្ជាប់ពាក្យជាមួយកូនប្រុសអ្នកជំនួញម្នាក់ ដែលបានស្រឡាញ់មើលចិត្តថ្លើមគ្នាអស់រយៈពេល ៥ ឆ្នាំមកនេះ។
បើតាមការបង្ហើបពីកញ្ញា ប៉ែន ស្រីពេជ្រ កូនកំលោះមានឈ្មោះថា ឆេង ពន្លកនេត្រា គឺជាអ្នកធ្វើការផ្នែកទីផ្សារ ហើយជាកូនមន្ត្រីរាជការម្នាក់ ហើយកញ្ញា ប៉ែន ស្រីពេជ្រ ក៏បានប្រាប់ថា នឹងគ្រោងចូលរោងជ័យនៅឆ្នាំ ២០២១ ហើយចំពោះថ្ងៃ និងខែ ជាក់លាក់សិន គឺឪពុកម្ដាយសងខាងនឹងពិភាក្សាគ្នាពេលក្រោយ។ ពិធីការិនីកាន់តែស្រស់ស្អាតនៅប៉ុស្តិ៍ហង្សមាសរូបនេះ គ្រាន់តែបាបបង្ហើបថា៖ «បើយើងចង់គិតគូរភ្លាមៗក្នុងឆ្នាំនេះ ក៏មិនកើតដែរ ព្រោះរឿងកូវីដ ១៩ ហើយនៅឆ្នាំក្រោយហ្នឹង ក៏ចាំមើលម៉ែឪ ទាំងសងខាង ពិភាក្សាគ្នាទៀតសិន»៕
