.jpg)
កញ្ញា ប៊ី សុធារី គ្រងសម្លៀកបំពាក់បុរាណថ្មីមួយនាសម័យក្រោយអង្គរ។ រូប អុីនស្តាក្រាម
ភ្នំពេញ៖ ថ្មីៗនេះមានការភ្ញាក់ផ្អើលពីមហាជន ខណៈអតីតកញ្ញាឯកចក្កវាឡកម្ពុជាឆ្នាំ ២០១៧ កញ្ញា ប៊ី សុធារី ស្រាប់តែបង្ហោះរូបគ្រងសម្លៀកបំពាក់ខ្មែរនាសម័យបុរាណមួយឈុត និងមានគ្រឿងអលង្ការផ្សេងៗក្នុងចេតនាបង្កប់គំនិតជាតិនិយម ឲ្យស្រឡាញ់តម្លៃសិល្បៈវប្បធម៌ជាតិខ្មែរ ដើម្បីចែករំលែកទៅយុវជនជំនាន់ក្រោយឲ្យបានស្គាល់ និងជួយថែរក្សាបន្ត។
កញ្ញា ប៊ី សុធារី បច្ចុប្បន្នវ័យ ២១ ឆ្នាំ មានកម្ពស់ ១,៧៣ ម៉ែត្រ ដែលប្រកបអាជីពជាតារាម៉ូដែលតាំងពីវ័យ ១៤ ឆ្នាំ និងបានឆ្លងកាត់ការខំប្រឹងប្រែង ៥ ឆ្នាំ នៅក្នុងអាជីពជាតារាបង្ហាញម៉ូដក៏បានជំរុញឲ្យរូបនាងសម្រេចសមិទ្ធផលខ្ពស់ដំបូង សម្រាប់ឆាកជីវិតគឺក្លាយជាកញ្ញាឯកប្រចាំប្រទេស កម្ពុជា ឆ្នាំ ២០១៦ និងក្លាយជាកញ្ញាឯកចក្កវាឡតំណាងកម្ពុជាឆ្នាំ ២០១៧ ក៏ដូចបានចូលរួមប្រកួតកញ្ញាឯកចក្កវាឡអន្តរជាតិឆ្នាំ ២០១៧ ផងដែរ។
អតីតកញ្ញាឯកចក្កវាឡតំណាងឲ្យកម្ពុជាឆ្នាំ ២០១៧ កញ្ញា ប៊ី សុធារី បញ្ជាក់ពីអត្ថន័យនៃសារដែលបានបង្ហោះអមនឹងរូបថតគ្រងសម្លៀកបំពាក់នាពេលថ្មីៗនេះថា៖ «តាមពិតទៅ! ឈុតនេះមិនមែនជាការចេញសម្រាប់គ្រងនៅថ្ងៃ ឱកាសអាចបង្ហាញនៅក្នុងកម្មវិធីពិសេសអ្វីនោះឡើយ ដោយគ្រាន់តែនាងខ្ញុំបានស្លៀកវា ហើយថតបង្ហោះកាលពីម្សិលមិញ ដោយសារតែវាមានន័យ សម្រាប់តម្លៃវប្បធម៌ខ្មែរ។
ឈុតនេះ គឺជាគំនិតរបស់អ្នកតុបតែងកាយសម្រាប់បវរកញ្ញារបស់យើង គាត់បានសិក្សាស្រាវជ្រាវច្បាស់លាស់ ហើយក៏គិតច្នៃបង្កើតវាឡើង ខណៈគាត់ប្រាប់ថា ជាឈុតដែលស្ថិតនៅក្នុងសម័យក្រោយអង្គរ ហើយគ្រឿងអលង្ការនានាវិញផលិតពីក្មុកម្រ័ក្សខ្មែរយើង។ លុះត្រាគាត់បានកាត់រួចរាល់មក ក៏ឲ្យនាងខ្ញុំស្លៀកវាទៅហើយខ្ញុំថតបង្ហោះកាលពីថ្ងៃម្សិលមិញ ខណៈឯគំនិតច្នៃនេះ វាក៏អាចនឹងមានការគិតទុកខ្ពស់ប្រមាណ ២-៣ សប្តាហ៍មុន»។
កញ្ញា ប៊ី សុធារី បន្តថា៖ «តាមរយៈឈុត និងសារខាងលើនោះ នាងខ្ញុំគិតថា វាក៏អាចជួយផ្តល់ការរំឭកដាស់តឿនកូនខ្មែរជំនាន់ក្រោយឲ្យចេះស្វែងយល់ពីតម្លៃវប្បធម៌ខ្មែរបានច្រើននាសម័យកាលបុរាណមក ហើយកុំចាំដល់ពេលមានប្រទេសជិតខាងចម្លងយកពីយើង ហើយផ្សព្វផ្សាយបានល្អជាងយើង ក៏អាចអាងមានការសោកស្តាយ និងស្រែកលើកឡើងថា គេលួចយករបស់យើងទៅទៀតហើយ!»។
កាលពីថ្មីៗនេះដែរ នាឱកាសធ្វើខួបកំណើតបុរសម្នាក់ក៏ស្រាប់តែឃើញតារាម៉ូដែល និងបានរំលេចរូបបែបកៀកកើយមួយសន្លឹកអម ដោយមានសារយ៉ាងផ្អែមល្ហែមថា៖ «រីករាយថ្ងៃកំណើតណាបង! នេះជាឆ្នាំទី ២ ហើយ ដែលពួកយើងឆ្លងថ្ងៃកំណើតបងជាមួយនឹងគ្នា។ នាងខ្ញុំមានក្តីសង្ឃឹមថា យើងនឹងឆ្លងជាមួយគ្នារាល់ៗឆ្នាំណា៎ ហើយក្នុងថ្ងៃជាពិសេសរបស់បង អូនជូនពរឲ្យបងមានសុខភាពល្អ ហើយសម្រេចនូវគ្រប់បំណងប្រាថ្នារបស់បងណា៎ ស្រឡាញ់បងណា៎»៕
