ភ្នំពេញៈ ថ្មីៗនេះមានការភ្ញាក់ផ្អើលដល់មហាជន ខណៈកញ្ញាឯកចក្កវាឡកម្ពុជាឆ្នាំ ២០១៧ កញ្ញា ប៊ី សុធារី ស្រាប់តែបង្ហើរសារដោយបើកចំហ និងបង្ហាញមុខមាត់ពិតម្ចាស់បេះដូង ដែលបានបង្កាត់ភ្លើងស្នេហ៍នឹងគ្នាអស់រយៈពេល ២ ឆ្នាំមកហើយតាមបណ្តាញសង្គមអ៊ីនស្តាក្រាម។
កញ្ញា ប៊ី សុធារី ដែលបច្ចុប្បន្ននាងមានវ័យ ២២ ឆ្នាំកម្ពស់ ១,៧៣ ម៉ែត្រដោយការប្រកបអាជីពជាតារាម៉ូដែលតាំងពីវ័យ ១៤ ឆ្នាំ និងបានឆ្លងកាត់ការខំប្រឹងប្រែង ៥ ឆ្នាំនៅក្នុងអាជីពជាតារាបង្ហាញម៉ូដក៏បានជំរុញឲ្យនាងសម្រេចសមិទ្ធផលខ្ពស់ដំបូង សម្រាប់ឆាកជីវិតគឺជាប់ជាកញ្ញាឯកប្រចាំប្រទេសកម្ពុជានៅឆ្នាំ ២០១៦ និងក្លាយជាកញ្ញាឯកតំណាងកម្ពុជាឆ្នាំ ២០១៧។
បើតាមលោក ម៉ែន និមលរ័តន៍ ដែលជាប្រធានប្រតិបតិ្តអឹរ៉ាយស៍អេជេនស៊ី បានប្រាប់កន្លងមកថា នាពេលបច្ចុប្បន្ននេះ កញ្ញា ប៊ី សុធារី មានការមមាញឹកខ្លាំងនឹងការងាររបស់ខ្លួនដោយនាងក៏បានក្លាយជាគ្រូបង្វឹកផ្នែកម៉ូដែលប្រចាំក្រុមហ៊ុន Arise Agency ហើយនាងក៏រវល់ខ្លាំងទៅនឹងការថតផ្នែកសម្អាងការដែរ។ ហើយមិនតែប៉ុណ្ណោះកញ្ញា សុធារី ក៏កំពុងតែអភិវឌ្ឍខ្លួនទៅលើអាជីព ជាពិធីការិនីរបស់ទូរទស្សន៍ទៀតផង បើតាមការបន្តឲ្យដឹងពីលោក ម៉ែន និមលរ័តន៍ នោះ។
ដោយឡែកថ្មីៗនេះនាឱកាសធ្វើខួបកំណើតបុរសម្នាក់ ក៏ស្រាប់តែឃើញតារាម៉ូដែល និងអតីតកញ្ញាឯកចក្កវាឡតំណាងឲ្យកម្ពុជាឆ្នាំ ២០១៧ កញ្ញា ប៊ី សុធារី បានរំលេចរូបបែបកៀកកើយមួយសន្លឹកអមដោយសារយ៉ាងផ្អែមល្ហែមថា៖ «រីករាយថ្ងៃកំណើតណាបង.. ឆ្នាំទី ២ ហើយដែលយើងឆ្លងថ្ងៃកំណើតបងជាមួយនឹងគ្នា សង្ឃឹមថាយើងនឹងឆ្លងជាមួយគ្នារាល់ៗឆ្នាំណា៎ ហើយក្នុងថ្ងៃពិសេសរបស់បង អូនជូនពរឲ្យបងមានសុខភាពល្អ ហើយសម្រេចនូវគ្រប់បំណងប្រាថ្នារបស់បងណា៎.. ស្រឡាញ់បងណា៎»។
រំពេចក្រោយមកក៏មានអ្នកចុច Like ជាច្រើន និងមានអ្នក Comments ថា ៖ «Sweet nas sis!» និងជាចុងក្រោយក៏ស្រាប់តែមានលេចវត្តមានបុរសម្នាក់មានគណនីឈ្មោះថា ravanrunchai បានតបសារវិញថា៖ «អរគុណ អូនសម្លាញ់»។
បើទោះបីជាគេឃើញសាររវាងកញ្ញា ប៊ី សុធារី និងបុរសក្នុងរូបភាពកៀកកើយនាថ្ងៃធ្វើកំណើតនោះបានប្រើពាក្យពេចន៍ស៊ីអារម្មណ៍ប្រៀបដូចជាគូស្នេហ៍យល់ចិត្តថ្លើមគ្នាច្បាស់យ៉ាងណាក្តី ក៏ភ្នំពេញប៉ុស្តិ៍នៅតែមិនអាចសុំការបកស្រាយបញ្ជាក់ឲ្យច្បាស់បន្ថែមពីកញ្ញាផ្ទាល់បានឡើយ ដោយសារតែប្រព័ន្ធទូរស័ព្ទរបស់នាងពុំអាចធ្វើការទាក់ទងបានទេកាលពីម្សិលមិញ៕