The Phnom Penh Post Search

Search form




Logo of Phnom Penh Post newspaper Phnom Penh Post - ប្ដីប្រពន្ធ​ម្ចាស់​កសិដ្ឋាន​ចិញ្ចឹម​ទន្សាយ​សង្ឃឹម​ពង្រីក​ទីផ្សារ​លក់​ចែកចាយ

ប្ដីប្រពន្ធ​ម្ចាស់​កសិដ្ឋាន​ចិញ្ចឹម​ទន្សាយ​សង្ឃឹម​ពង្រីក​ទីផ្សារ​លក់​ចែកចាយ

លោក ស្រេង សុវណ្ណារិន និង​អ្នកស្រី កែវ ម៉ាឡែន ដែល​ជា​អ្នក​ចិញ្ចឹម​សត្វ​ទន្សាយ​យក​សាច់​លក់​។
លោក ស្រេង សុវណ្ណារិន និង​អ្នកស្រី កែវ ម៉ាឡែន ដែល​ជា​អ្នក​ចិញ្ចឹម​សត្វ​ទន្សាយ​យក​សាច់​លក់​។ រូបថត Eli Meixler

ប្ដីប្រពន្ធ​ម្ចាស់​កសិដ្ឋាន​ចិញ្ចឹម​ទន្សាយ​សង្ឃឹម​ពង្រីក​ទីផ្សារ​លក់​ចែកចាយ

ភ្នំពេញ: នៅ​កសិដ្ឋាន​តូច​មួយ​ឯ​ជាយ​រាជធានី​ភ្នំពេញ​ភាគ​ខាង​ត្បូង អ្នកស្រី កែវ ម៉ាឡែន និង​ស្វាមី ស្រេង សុវណ្ណារិន ជា​អ្នក​ចិញ្ចឹម​សត្វ​ទន្សាយ បាន​រៀបចំ​ប្រឡាក់​គ្រឿង​សាច់​ដើម្បី​ចម្អិន​អាហារ​ពេល​ថ្ងៃ​ត្រង់​។ អ្នក​ទាំង​ពីរ បាន​ប្រាប់​ថា គ្មាន​រូបមន្ដ​អ្វី​ពិសេស​ទេ គ្រាន់តែ​ជា​ខ្ទឹមស ទឹកត្រី ម្ទេស និង​អំបិល​ប៉ុណ្ណោះ ខណៈ​ពួកគេ​កំពុង​ញាប់​ដៃជើង​ឆាផង និង​អាំង​ផង​។

អ្នកស្រី ម៉ាឡែន បាន​អួត​ពី​រសជាតិ​អាហារ​ដ៏ពិសេស​សម្រាប់​ពេល​ថ្ងៃត្រង់​នោះ​ថា​៖ «​សាច់ទន្សាយ​មាន​កូឡេស្ដេរ៉ូល​ទាប និង​មាន​ប្រូតេអ៊ីន​ខ្ពស់​បើ​ធៀប​នឹង​សាច់គោ ឬ​សាច់ជ្រូក​»។

ការ​ចម្អិន​សាច់ទន្សាយ​ដោយ​ការ​ប្រឡាក់​សាច់​អាំង។
ការ​ចម្អិន​សាច់ទន្សាយ​ដោយ​ការ​ប្រឡាក់​សាច់​អាំង។ រូបថត Eli Meixler

ការ​ផ្សំគ្រឿង​ជាមួយ​ទឹកត្រី ខ្ទឹមស សាច់ទន្សាយ​មាន​រសជាតិ​ស្រដៀង​នឹង​សាច់មាន់ ប៉ុន្ដែ​ស្វិត​មិន​ចាញ់​សាច់​ក្របី​នោះ​ទេ​។ ថ្វីដ្បិត​តែ​ម្ហូប​ខ្មែរ​បាន​ប្រើ​សាច់​សត្វ​ច្រើន​មុខ​ចាប់ពី​សាច់ជ្រូក អាពីង ឬ​កង្កែប​ក៏ពិតមែន តែ​និយាយ​ពី​ម្ហូប​សាច់ទន្សាយ​ហាក់​មិន​សូវ​ពេញនិយម​សម្រាប់​ប្រជាជន​កម្ពុជា​ឡើយ​។ វា​ប្រាកដ​ជា​មាន​មូលហេតុ​របស់​វា។ អ្នកស្រី ម៉ាឡែន បាន​បកស្រាយ​ថា ទន្សាយ​ជា​សត្វ​នៅក្នុង​ដំណាល​រឿងព្រេង​បុរាណ​ខ្មែរ​ដែល​ចាត់ទុក​ជា​សត្វ​មាន​ប្រាជ្ញា​បំផុត​។

ប៉ុន្ដែ​អ្នក​ចិញ្ចឹម​សត្វទន្សាយ​រូប​នេះ​សង្ឃឹម​ថា បើ​សាកល្បង​ភ្លក្សរសជាតិ​សាច់​ដ៏ឈ្ងុញឆ្ងាញ់​របស់​វា អ្នក​ពិតជា​ភ្លេច​រឿង​ព្រេង​ទាំងនោះ​មិន​ខាន​។

កំពុង​ទំពារ​អាហារ​បណ្ដើរ អ្នកស្រី​បាន​រៀបរាប់​បណ្ដើរ​ថា​៖ «​ខ្ញុំ​គិត​ថា វា​មាន​រសជាតិ​ឆ្ងាញ់​ជាង​សាច់​ជ្រូក ឬ​សាច់មាន់​ទៅ​ទៀត​»។

អ្នកស្រី ម៉ាឡែន និង​ស្វាមី​ដែល​បាន​បើក​កសិដ្ឋាន​ចិញ្ចឹម​សត្វ​ទន្សាយ Cambofarm Rabbitry ក្នុង​ឆ្នាំ​២០១២ កាលពី​ខែ​ធ្នូ​ឆ្នាំ​ទៅ ពួកគេ​បាន​ទិញ​ទន្សាយ​ពណ៌​ស​ពូជ​នូវែលសេឡង់​មួយ​ក្បាល ជា​ពូជ​ដែល​គេ​ចិញ្ចឹម​ច្រើន​បំផុត​ក្នុង​លោក ហើយ​បច្ចុប្បន្ន​កសិដ្ឋាន​របស់​ពួកគេ​មាន​ទន្សាយ​៦០​ក្បាល​ឯណោះ​។

មូលហេតុ​មួយ​ទៀត​ដែល​ធ្វើឲ្យ​មនុស្ស​មិន​ដាច់​ចិត្ត​ញ៉ាំ​សាច់ទន្សាយ​គឺ​ភាព​គួរ​ឲ្យ​ស្រឡាញ់​របស់​សត្វ​នេះ​តែ​ម្ដង​ដែល​សូម្បីតែ​ប្អូនស្រី​របស់​អ្នកស្រី​ក៏​មិន​ហ៊ាន​ហូប​ទន្សាយ​ដែរ។

អ្នកស្រី​បាន​និយាយ​ថា​៖ «​ខ្ញុំ​បាន​កុហក​ប្អូនស្រី​ខ្ញុំ​ថា នោះ​ជា​សាច់មាន់ ហើយ​ថា វា​ឆ្ងាញ់​ណាស់​»។

ការ​ឆា​ទន្សាយ​គ្រាន់តែ​ប្រើ​គ្រឿងផ្សំ​សាមញ្ញ​ប៉ុណ្ណោះ​។
ការ​ឆា​ទន្សាយ​គ្រាន់តែ​ប្រើ​គ្រឿងផ្សំ​សាមញ្ញ​ប៉ុណ្ណោះ​។ រូបថត Eli Meixler

ពាក់ព័ន្ធ​នឹង​ការ​ទទួលទាន​សាច់ទន្សាយ លោក ឡេង វីរៈ ជា​នាយក​កម្មវិធី​ជាន់ខ្ពស់​ទទួល​បន្ទុក​ក្រុម​អភិវឌ្ឍ​កសិកម្ម​សេដ្ឋកិច្ច​របស់​អង្គការ​ទស្សនៈ​ពិភពលោក បាន​ថ្លែង​ថា ការ​ចិញ្ចឹម​សត្វទន្សាយ​វា​ស័ក្ដិសម​នឹង​ស្ថានភាព​ទីក្រុង​ភ្នំពេញ​ដ៏អ៊ូអរ​។

លោក​បាន​និយាយ​ថា​៖ «​ទន្សាយ​មិន​ត្រូវការ​ទីធ្លា​រស់នៅ​ធំ​នោះ​ទេ​»។

យ៉ាងណា​មិញ​គម្រោង​ជំរុញ​ឲ្យ​ប្រជាពលរដ្ឋ​ចិញ្ចឹម​សត្វ​ទន្សាយ​ក្នុង​ខេត្ដ​ព្រះវិហារ​បែរ​ត្រូវ​បរាជ័យ​ពីព្រោះ​ពួកគេ​ចង់​ចាប់​ទន្សាយ​ព្រៃ​វិញ​។

លោក រ៉ូហ្វ លេនហ្ស៊ីងជើរ (Rolf Lanzinger) ជា​ម្ចាស់​ហាង Dan Meats បាន​ឲ្យ​ដឹង​ថា អតិថិជន​បរទេស​តែងតែ​ស្នើឲ្យ​លោក​លក់​សាច់​ទន្សាយ​។ លោក​បាន​និយាយ​ថា បញ្ហា​ស្ថិត​នៅ​ត្រង់​ថា លោក​មិន​ទាន់​រកឃើញ​ដៃគូ​គួរ​ឲ្យ​ទុកចិត្ដ​ដែល​អាច​ផ្គត់ផ្គង់​សាច់​តាម​ស្ដង់ដារ​។
លោក​បាន​អះអាង​ថា​៖ «​បើ​មាន​គុណភាព​ល្អ និង​ត្រឹមត្រូវ ខ្ញុំ​ពិតជា​ចាប់​អារម្មណ៍​ជាវ​បំផុត​»។

ថ្វីដ្បិត​តែ​កសិដ្ឋាន​ចិញ្ចឹម​ទន្សាយ Cambofarm Rabbitry របស់​អ្នកស្រី ម៉ាឡែន មិន​បើក​ជា​ជំនួញ​ផ្លូវការ​រហូត​ដល់​អាច​បង្កាត់​ពូជ​ទន្សាយ​តាម​តម្រូវការ អ្នកស្រី​បាន​និយាយ​ថា អ្នកស្រី​បាន​លក់​សាច់ទន្សាយ​តម្លៃ​២៥​ដុល្លារ​ក្នុង​មួយ​គីឡូក្រាម និង​ទទួល​ការ​កុម៉្មុង់​តាម​ទូរស័ព្ទ​លេខ​០១៦ ៦៣៥​៣៦៧​៕ HR

អត្ថបទគួរចាប់អារម្មណ៍