.jpg)
សត្វប្រចៀវត្រូវបានលែងឲ្យទៅរស់នៅជម្រកដើមឈើថ្មី។ រូបថត AFP
ក្រុងមីនស្កិ៍: ក្រោយចំណាយពេលនៃរដូវរងាសម្ងំដេកក្នុងទូទឹកកកនៅមណ្ឌលសង្គ្រោះក្នុងប្រទេសបេឡារុស ប្រចៀវមួយហ្វូងបានភ្ញាក់ដឹងខ្លួន និងត្រូវបានលែងឲ្យចូលព្រៃវិញ។
ដើម្បីធានាដំណេកយ៉ាងស្កប់ស្កល់នៃរដូវរងា ប្រចៀវនីមួយៗត្រូវបានចាប់ច្រកដាក់ថង់ក្រណាត់ដោយក្រុមអ្នកស្ម័គ្រចិត្ដនៅមណ្ឌល រួចចងព្យូរក្នុងទូទឹកកកដែលទទួលសំណើម និងធាតុត្រជាក់សមល្មម។
មជ្ឈមណ្ឌលស្ថិតក្នុងក្រុងមីនស្ដិ៍បានបីបាច់ប្រចៀវដែលត្រូវបានរកឃើញដោយមហាជនក្រោយពីពួកវាពិបាកស្វែងរកទីជម្រកសុវត្ថិភាពដើម្បីសម្ងំដេកប្រចាំរដូវ។
ប្រធានមជ្ឈមណ្ឌលលោក Alexei Shpak បាននិយាយថា៖ «នៅរដូវរងា ប្រចៀវត្រូវការដេកច្រើន និងសម្ងំស្ងៀមពេញ ១ រដូវតែម្ដង»។
ថង់ច្រកប្រចៀវ parti-coloured និង serotine bats ព្យួរក្នុងទូទឹកកក។ រូបថត AFP
ស្ថានភាពស័ក្ដិសមសម្រាប់ប្រចៀវសម្ងំលាក់ខ្លួនគឺសីតុណ្ហភាពចន្លោះពី ០ ទៅ ៥ អង្សាសេ។ នោះជាអ្វីដែលទូទឹកកកអាចជួយបាន។ មជ្ឈមណ្ឌលមានទូទឹកកកតែ ១ គ្រឿង តែវាគ្រប់គ្រាន់សម្រាប់ប្រចៀវ ៣២ ក្បាលចំណាយពេលរដូវរងាដេកក្នុងថង់ក្រណាត់ត្រជាក់ស្រួល។
ពេលរដូវផ្ការីកមកដល់សីតុណ្ហភាពខាងក្រៅស្ថិតនៅលើស ១០ អង្សាសេ Shpak និងក្រុមការងារស្ម័គ្រចិត្ដ ៣ នាក់ទៀតនៅមជ្ឈមណ្ឌលបាននាំគ្នាយកប្រចៀវចេញក្នុងថង់យ៉ាងប្រុងប្រយ័ត្ន។ រាងកាយរបស់វាចាប់ផ្ដើមកម្រើកឡើង និងភ្ញាក់ពីដំណេក។
ប្រចៀវខ្មៅលាតស្លាបរបស់វាពេលវាត្រួតពិនិត្យទម្ងន់ខ្លួនថា តើវាមានសុខភាពល្អឬយ៉ាងណា។ ពួកវាត្រូវបានបញ្ចុកសត្វល្អិត និងទឹកដើម្បីផ្ដល់ថាមពលដល់ពួកវា។
នាពេលល្ងាចមនុស្សម្នាជាច្រើនបានទៅតាម Shpak និងក្រុមការងារស្ម័គ្រចិត្ដទៅកាន់ឧទ្យានទីក្រុងជាទីដែលពួកគេជួយផ្ទេរសត្វប្រចៀវចូលជម្រកដើមឈើថ្មី៕ HR
