ក្រុងអូស្លូ : ប្រទេសន័រវ៉េ បានបញ្ចប់ការតំឡើងគ្រោងអាគារធ្វើពីឈើខ្ពស់ជាងគេបំផុតក្នុងពិភពលោក ដែលសំណង់នេះក៏ត្រូវបានគេសរសើរថាមិនប៉ះពាល់បរិស្ថាន ហើយក៏គិតគូរដល់ករណីអគ្គីភ័យ។
អគារដែលមានឈ្មោះថា Mjos មានទីតាំងស្ថិតនៅជិតបឹងនិងត្រូវបានដាក់ឈ្មោះតាមបឹងនោះ ដែលមានចម្ងាយប្រមាណ១០០ គីឡូម៉ែត្រ ភាគខាងជើងទីក្រុងអូស្លូ។ អាគារនោះមានកម្ពស់ ៨៥,៤ ម៉ែត្រ និងមាន ១៨ ជាន់។
ក្រុមអ្នកផ្សព្វផ្សាយបានឲ្យដឹងថា ការប្រើប្រាស់ឈើដែលជាវត្ថុធាតុដើមកកើតឡើងវិញនេះគឺអាចជួយកាត់បន្ថយការសាយភាយឧស្ម័ន CO2 បានច្រើនបើប្រៀបធៀបទៅនឹងអាគារបេតុង ដែលជាវត្ថុធាតុដើមដំបូងនៃការសាងសង់អគារលំនៅដ្ឋាននៅក្នុងទីក្រុងនានា។
លោក Arthur Buchardt ដែលជាអ្នកជំនួញម្នាក់បាននិយាយថា៖« អាគារសាងសង់អំពីឈើគឺវាជួយឲ្យយើងរស់នៅក្នុងពិភពលោកមួយកាន់តែប្រសើរ»។
លោកបន្ថែមថា លោកបានចាប់ផ្តើមគម្រោងនេះបន្ទាប់ពីមានការបំផុសគំនិតដោយកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ។
ក្រុមអ្នកសាងសង់បាននិយាយថា អគារនេះមានភាពធន់នឹងអគ្គីភ័យដោយសារតែគេប្រើកាវ ដើម្បីលាបឈើហើយវាអាចឆេះបានលុះត្រាតែអណ្តាតភ្លើងឆាបឆេះបន្តគ្នារយៈយូរ។
នៅពេលដែលវាបើកដំណើរការនៅខែមីនាឆ្នាំ២០១៩ ខាងមុខ អគារនេះនឹងខ្ពស់ជាងអាគារ Treet នៅក្នុងប្រទេសន័រវេស ដែលមានកំពស់ ៤៩ ម៉ែត្រ ដែលពីមុនវាធ្លាប់ជាប់ ឯតទគ្គកម្មកំណត់ត្រាពិភពលោកជាអគារ ឈើ ដែលខ្ពស់ជាងគេបំផុតនៅលើពិភពលោក ដែលស្ថិតនៅភាគខាងលិចទីក្រុង Bergen ។
បន្ទាប់ពីសាងសង់រួច អគារ Mjos Tower នឹងបណ្តុំដោយអាគារស្នាក់នៅ អាងហែលទឹកក្នុងអាគារ សណ្ឋាគារ ការិយាល័យ និង ភោជនីយដ្ឋានជាដើម។
ដើមឡើយវាត្រូវបានគេសន្មត់ថាមានកម្ពស់ ៨១ ម៉ែត្រ ប៉ុន្តែនឹងមានការបន្ថែមដំបូលកម្ពស់ ៤,៤ ម៉ែត្រទៀត។
ការបន្ថែមនេះបានធ្វើឲ្យវាខ្ពស់ជាងអគារ HoHo tower ដែលមានកម្ពស់ (៨៤ ម៉ែត្រ) ដែលបច្ចុប្បន្នវាកំពុងត្រូវបានសាងសង់នៅទីក្រុងវីយែន។
អគារនៅក្នុងប្រទេសអូទ្រីសនោះគឺវាមានរចនាសម្ព័ន្ធនៃបណ្តុំឈើ ចំនួន ៧៦ ភាគរយ និងវត្ថុផ្សេងៗទៀតគឺមិនដូចអគារ Mjos នេះទេ។
គម្រោងដទៃទៀត ដែលត្រូវបានគេស្នើឡើងរួមមានគម្រោង Baobab Tower ក្នុងទីក្រុងប៉ារីស មានកម្ពស់១២០ ម៉ែត្រ ប៉ុន្តែអាជ្ញាធរក្រុងបានច្រានចោល។
ទន្ទឹមនឹងនេះដែរគម្រោង អគារ Abebe Court Tower ក្នុងទីក្រុង Lagos មានកម្ពស់ ៨៧ ម៉ែត្រ តែមិនទាន់បានសាងសង់នៅឡើយ នេះបើយោងតាមអង្គការ CTBUH ដែលជាអង្គការមួយមានឯកទេសខាងការរៀបចំទីក្រុងប្រកបដោយនិរន្តរភាព៕ AFP/NS