កំពង់ចាម: ក្ដីរំភើបស្រក់ទឹកភ្នែកនាពេលាសិរីក្រាបផ្ទឹមស្វាមីតាមប្រពៃណីមិនបានប៉ុន្មានផង ស្រាប់តែនារីកំព្រាគ្មានម្ដាយឪពុកឲ្យពរជ័យម្នាក់នេះ អភ័ព្វជីវិតថ្មីប្រែជាអាប់អួខណៈខ្លួនទើបសម្រាលកូនខ្ចី ស្វាមីបែរជាធ្លាក់ខ្លួនឈឺដុនដាបដោយជំងឺកាចសាហាវ។ ទឹកភ្នែកហូរកាត់ថ្ពាល់លើកនេះ មានតែក្ដីទុក្ខត្រូវរែកពុន។
ជាកម្មការិនីរោងចក្រនៅក្រុងស្គន់ ទើបចូលបម្រើការងាររយៈពេល ៧ ខែ អ្នកស្រី វុធ ស្រីខួច អាយុ ១៩ ឆ្នាំ បាននិយាយប្រាប់ថា៖ «យើងរៀបការបាន ២ ឆ្នាំរហូតដល់ថ្ងៃនេះ។ គាត់ [ប្ដី ធឹម សិរីរិទ្ធ] ចាប់ផ្ដើមធ្លាក់ខ្លួនឈឺជិត ១ ឆ្នាំ ហើយម្ដាយនាំគាត់ទៅរកគ្រូខ្មែរ គ្រូចិនសែ និងពេទ្យរហូតដល់អស់ប្រាក់ អស់ដីកេរ»។
អារម្មណ៍មួយគិតពីកូនខ្ចីអាយុទើប ១ ខែកន្លះ អារម្មណ៍មួយគិតពីស្ថានភាពសុខភាពប្ដី និងអារម្មណ៍មួយទៀតបារម្ភពីអង្ករច្រកឆ្នាំង ស្រីខួច បានថ្លែងទាំងក្ដុកក្ដួលថា៖ «ខ្ញុំពិបាកចិត្ដខ្លាំងណាស់»។
ដោយហេតុផលថា មានគភ៌មុនពេលចូលធ្វើការនៅរោងចក្រ គ្មានប្រាក់មាតុភាព អ្នកម្ដាយ ដែលនៅពាក់មួកចាក់ការពារសរសៃខ្ចីរូបនេះ បានឲ្យដឹងថា៖ «ពេលមានកូន គេឲ្យ ៣០០ ដុល្លារ តែខ្ញុំអត់បានផង ពីព្រោះខ្ញុំមានផ្ទៃពោះមុនចូល ទាល់តែខ្ញុំធ្វើការបាន ១ ឆ្នាំ ទើប ប.ប.ស ជួយ រួមទាំងការសម្រាក ៣ ខែ ក៏មានប្រាក់ខែដែរ។ សព្វថ្ងៃនេះ ម្ដាយក្មេកខ្ញុំលក់ដីគាត់ចេញថ្លៃព្យាបាល និងចាយវាយអស់ហើយ»។
អ្នកស្រី ឌឹម អែម អាយុ ៥៣ ឆ្នាំ ជាម្ដាយលោក ធឹម សិរីរិទ្ធ និងជាអ្នកថែទាំកូនផ្ទាល់ បានរៀបរាប់ពីស្ថានភាពជំងឺកូនប្រុសថា ដំបូងឡើយលោក សិរីរិទ្ធ អាយុ ២២ ឆ្នាំ ដែលធ្លាប់ធ្វើការជាជាងសំណង់នៅប្រទេសថៃ និងចាប់ជំនាញកាត់ដេរមុនពេលរៀបការផ្ដើមមានអាការឈឺស្ពឹកស្រពន់ដៃសង្ស័យបញ្ហាកប់សរសៃ។
ក្រោយពីទៅរកគ្រូខ្មែរ និងពេទ្យចិនសែ អ្នកស្រីបានប្រាប់ថា៖ «ចុងក្រោយខ្ញុំទៅពេទ្យលោកសង្ឃពីដំបូងពេទ្យពិនិត្យឈាម និងស្កេន តែប្រាប់ថាអត់មានបញ្ហាអីទេ។ លើកទី ២ ពេលចោះសាច់ទៅពិនិត្យពេទ្យថា ជាសាច់កាចដំណាក់កាលដំបូង ហើយទាមទារវះកាត់ដោយត្រូវកាត់ដៃចោលតែម្ដង»។
ស្ដ្រីមេម៉ាយតាំងពីកូនប្រុសអាយុទើប ២ ឆ្នាំ រូបនេះបន្ដថា៖ «កូនប្រុសខ្ញុំប្រកែកដោយប្រាប់ថា បើជាសាច់កាច ទោះកាត់ចោលក៏ឥតប្រយោជន៍។ គាត់ស៊ូស្លាប់ទាំងរាងកាយនៅពេញលក្ខណៈចុះ»។
ក្រោយចេញពីមន្ទីរពេទ្យ ពេលនេះ អាការលោក សិរីរិទ្ធ កាន់តែដុនដាប ស្មាខាងឆ្វេងរីកធំឡើងៗរហូតក្រោកដើរអង្គុយលែងរួច ដែលទាមទារឲ្យមានអ្នកថែទាំជាប្រចាំ។ រីឯភរិយានៅសរសៃខ្ចី ស្ទើរតែគ្មានទឹកដោះបំបៅកូនដោយសារពិបាកចិត្ដពេក និងគ្មានជីវជាតិអាហារបំប៉ន។
អាស្រ័យក្ដីសប្បុរសពីបងប្អូនសាច់ញាតិទាំងក្នុង និងក្រៅស្រុក អ្នកស្រី អែម បានពោលថា៖ «អរគុណខ្លាំងណាស់! បងប្អូនទាំងអស់គ្នាដែលបានផ្ញើជំនួយពី ២ ម៉ឺនរៀលតាមវីង រហូតដល់ ៥០ ឬ ១០០ ដុល្លារពីបងប្អូនខ្មែរនៅក្រៅស្រុក ហើយសប្បុរសជនខ្លះទៀត ក៏បានយកជំនួយដល់ផ្ទះ»។
ក្រុមគ្រួសារលោក ធឹម សិរីរិទ្ធ ដ៏អភ័ព្វ រស់នៅក្នុងភូមិព្រៃញ ឃុំផ្អាវ ស្រុកបាធាយ ខេត្ដកំពង់ចាម ទាក់ទងតាមទូរស័ព្ទលេខ ០៨៦ ៤៥ ៥៥ ១៨៕