.jpg)
កុលសម្ព័ន្ធនៅតំបន់អាហ្វ្រិក អូស្ត្រាលី និងអាស៊ីអាគ្នេយ៍គូរឆ្នូតសេះបង្កង់លើខ្លួន។
ក្រុងប៉ារីស : រាងកាយគូរក្រវេមក្រវាមឆ្នូតពណ៌សតាមប្រពៃណីរបស់សហគមន៍ជនជាតិដើមភាគតិច ដើម្បីកាត់បន្ថយអត្រាសត្វល្អិតរបោមខាំរហូតដល់ ១០ ដង។
កុលសម្ព័ន្ធតំបន់អាហ្វ្រិក អូស្ដ្រាលី និងអាស៊ីអាគ្នេយ៍បានគូរឆ្នូតសេះបង្កង់លើខ្លួន ដោយលាយល្បាយដីឥដ្ឋ ដីស ផេះ និងអាចម៍គោ ថ្នាំពណ៌ស ឬ ប្រផេះ ដើម្បីជួយដល់រាងកាយទប់ទល់កម្ដៅក្នុងតំបន់ភ្លើងឆេះព្រៃ និងសីតុណ្ហភាពនៅវាលល្ហល្ហេវ។
ប៉ុន្ដែក្រុមអ្នកវិទ្យាសាស្ដ្រពេលនេះជឿហើយថា ប្រពៃណីរំលេចពណ៌សេះបង្កង់លើរាងកាយកាត់បន្ថយសត្វល្អិតទិច ឬខាំដែលរមែងមកញាំញីរាងកាយអាក្រាតរបស់ក្រុមកុលសម្ព័ន្ធរស់នៅតាមបែបធម្មជាតិ។
ការពិសោធលើសត្វក៏រកឃើញថាសេះបង្កង់ត្រូវសត្វល្អិតខាំតិចជាងសត្វដទៃ។
គេស្គាល់ថាសេះបង្កង់រងនូវការខាំ ឬទិចពីសត្វល្អិតតិចជាងពពួកសត្វដទៃដោយសាររោមប្រផេះរបស់វា។ ដូច្នេះក្រុមអ្នកស្រាវជ្រាវបានសម្រេចតាមដានមើលថា តើឆ្នូតពណ៌សលើរាងកាយមនុស្សក៏មានប្រសិទ្ធភាពស្រដៀងគ្នានេះដែរឬយ៉ាងណា?
ពួកគេបានប្រើម៉ាណឺកាំងក្នុងហាងចំនួន ៣ ដោយមួយមានសម្បុរខ្មៅមួយសម្បុរសជ្រះ និងមួយទៀតដែលមានសម្បុរខ្មៅឆ្នូតស។ ម៉ាណឺកាំងនីមួយៗត្រូវបានពាក់ស្រោបកាវស្អិតស្ដើងៗ ដើម្បីចាប់សត្វល្អិត។
ក្រោយមកពួកគេបានដាក់វានៅកណ្ដាលវាលស្មៅ ៨ សប្ដាហ៍ក្នុងរដូវក្ដៅរួចចាប់រាប់សត្វរបោម និងសត្វល្អិតខាំដទៃទៀតលើខ្លួនម៉ាណឺកាំង។ លទ្ធផលបានបង្ហាញថា ម៉ាណឺកាំងសម្បុរខ្មៅមានភាពទាក់ទាញរបោម ១០ ដងជាងម៉ាណឺកាំងពណ៌ឆ្នូត និងលើស ២ ដងនៃម៉ាណឺកាំង ស។
ការសិក្សាដែលបានចុះផ្សាយក្នុង Royal Society Open Science ថា ពណ៌ឆ្នូតបង្កើតជាចំណាំងប្លាតលើរាងកាយមនុស្សធ្វើឲ្យសត្វល្អិតមិនសូវចាប់អារម្មណ៍៕ HR
