ភ្នំពេញៈ អ្នកនិពន្ធខ្មែរល្បីឈ្មោះ អ្នកនាង ម៉ីសន សុធារី បានរំលេចស្នាដៃថ្មីគឺប្រលោមលោកស៊ើបអង្កេតតាមរកជនឧក្រិដ្ឋបង្កឃាតកម្មដោយអ្នកនាងគ្រោងបោះពុម្ពដាក់លក់នៅលើទីផ្សារតែ ១ ដងគត់។
«ស្ទូឌីយោលេខ ៧» ជាខ្សែរឿងប្រភេទតាមដានរកជនល្មើសដោយកំណត់ទីតាំងកើតហេតុនៅខេត្តព្រះសីហនុ។ ប្រលោមលោកស៊ើបអង្កេតនេះមានភាពប្រទាក់ក្រឡាគ្នាក្នុងការស្វែងរកឃាតករពិតប្រាកដ ដែលទោះបីជាជននោះខំគេចខ្លួន ឬមានខ្នងបង្អែកជាអ្នកមានយសស័ក្តិធំប៉ុនណា ក៏មិនអាចរួចពីសំណាញ់ច្បាប់។
ប្រលោមលោកដែលត្រូវបានកក់ទុកជាច្រើនច្បាប់រួចមកហើយនេះត្រូវបានម្ចាស់ស្នាដៃ អ្នកនាង ម៉ីសន សុធារី បង្ហាញពីគំនិតអប់រំយ៉ាងដូច្នេះថា៖ «រឿងប្រភេទស៊ើបអង្កេតគឺបានផ្តល់គំនិតអប់រំជាច្រើនឲ្យមនុស្សរស់នៅក្នុងសង្គមកុំអាងមានអំណាចហើយអាចរួចខ្លួនបានពីសំណាញ់ច្បាប់បាន ហើយមួយទៀតក៏ផ្តោតទៅលើការលើកកម្ពស់ដល់នីតិរដ្ឋដូចគ្នាដែលអាចវែកញែករឿងក្តីបានទោះបីជាលំបាក ឬសម្ងាត់យ៉ាងណាក៏ដោយ»។
ស្ទូឌីយោលេខ ៧ ជាកម្រងរឿងធំទាំង ៤ របស់សុភាប្រុសដែលបានពិពណ៌នានូវភាពប៉ិនប្រសប់ល្អិតល្អន់ និងពេញដោយការទទួលខុសត្រូវរបស់កូនប៉ូលិសម្នាក់ឈ្មោះ សេត វិទូ ចាប់តាំងពីមិនទាន់មានងារជាឧត្តមសេនីយ៍រហូតដល់ចូលនិវត្តន៍ដោយបានបំបែករឿងក្តី ៤ ករណីដែលបានចងក្រងក្នុងសៀវភៅតែមួយមាន «ស្ទូឌីយោលេខ ៧ ម៉ោង ១២ អធ្រាត្រនៅសង្កាត់លេខ ១ សំណុំឯកសារ z22 និងគម្រោងការសម្ងាត់ ២០១៥»។
ខ្សែរឿងទី ១ «ស្ទូឌីយោលេខ ៧» ស្តែងពីឃាតកម្មលើអ្នកនិយាយកម្មវិធីវិទ្យុ ២ រូបក្នុងពេលដែលទ្វារបន្ទប់ផ្សាយត្រូវបិទ ហើយអ្នកមានលេខសម្ងាត់ចេញចូលបន្ទប់នេះ ៤ នាក់ទៀតកំពុងជាប់ប្រជុំនៅជាន់ខាងក្រោមដែលព្រឹត្តិការណ៍នេះបានកើតឡើងនៅក្នុងក្រុងព្រះសីហនុ។
ខ្សែរឿងទី ២ «ម៉ោង ១២ អធ្រាត្រនៅសង្កាត់លេខ ១» និយាយអំពីករណីស្លាប់ហើយរស់ឡើងវិញយ៉ាងចម្លែកនៃភរិយាចុងរបស់បុរសស្តុកស្តម្ភ ១ រូបបង្កជាចំណោទចាក់ស្រែះពេញគ្រួសារ។
ខ្សែរឿងទី ៣ ទាក់ទងនឹងដំណើររឿងជាប់អន្ទាក់របស់មេធាវីខ្មែរ-អាមេរិកដែលជាន់ដានជាប់ផុងសឹងរើខ្លួនមិនរួចក្នុងរង្វង់ឃាតកម្មមានការគ្រោងទុក ឈ្មោះថា «សំណុំឯកសារ z22» និងរឿងចុងក្រោយនិពន្ធក្នុងឆ្នាំ ២០១៨ មានឈ្មោះថា «គម្រោងការសម្ងាត់ ២០១៥» បរិយាយអំពីយុវនារីកើតឆ្នាំ ២០០០ ចំនួន ៣៥ នាក់បាត់ខ្លួនជាបន្តបន្ទាប់កក្រើកក្រុងភ្នំពេញ។
អ្នកនាង ម៉ីសន សុធារី បានថ្លែងប្រាប់ ភ្នំពេញ ប៉ុស្តិ៍ ថា៖ «ខ្ញុំបាននិពន្ធរឿងនេះឡើងមកមិនមែនជាពាណិជ្ជកម្មទេ ប៉ុន្តែជាសក្ខីភាពនៃទំនាក់ទំនងរវាងខ្ញុំ និងអ្នកគាំទ្រ។ ខ្ញុំបានបោះពុម្ពសៀវភៅនេះឡើងជាមួយដៃគូសហការអាថ៌កំបាំងមួយដែលមិនអាចបង្ហាញពីអត្តសញ្ញាណបាន ដោយមិនមានដៃគូក្នុងការដាក់លក់នៅក្នុងទីផ្សារនោះទេលុះត្រាតែមានការដាក់កុម្ម៉ង់ជាមុនសិន»។
ស្ទូឌីយោលេខ ៧ មិនត្រឹមតែមានការដាក់លក់នៅក្នុងប្រទេសជាភាសាខ្មែរនោះទេ ប៉ុន្តែអ្នកនិពន្ធរូបនេះក៏មានគម្រោងថានឹងដាក់លក់នៅលើឆាកអន្តរជាតិបកប្រែជាភាសាអង់គ្លេសនៅពេលដែលបានដាក់លក់ និងចែកចាយនៅក្នុងប្រទេសជាមុនសិន។
ស្ទូឌីយោលេខ ៧ ត្រូវបានបោះពុម្ពតែម្ដងគត់ក្នុងចំនួន ១ ពាន់ក្បាលដោយត្រូវបានកក់ទុកស្ទើរតែទាំងអស់ហើយក្នុងតម្លៃ ១ ក្បាលថ្លៃ ៤ ម៉ឺនរៀល និងគ្រោងដាក់លក់ក្នុងខែកក្កដាខាងមុខនេះ។
អ្នកនិពន្ធ ម៉ីសន សុធារី បានសម្ដែងចំណាប់អារម្មណ៍ពីសៀវភៅនេះថា៖ «ខ្ញុំចង់ឲ្យអ្នកអានមានមោទនភាពដែលមានសៀវភៅនេះនៅក្នុងដៃ។ ខ្ញុំសម្រេចចិត្តថាបោះពុម្ពតែម្តងនេះក៏ដោយសារតែខ្ញុំចង់ឲ្យសៀវភៅនេះត្រូវបានចែកគ្នាអានសឹករេចរឹល ហើយមានការនិយាយតៗគ្នា»៕