ក្រុងឡុងដ៍: ពលរដ្ឋអង់គ្លេសដ៏សប្បុរសបានសរសេរសារលើកទឹកចិត្ដដោយក្ដីស្រឡាញ់រាប់ពាន់ច្បាប់ផ្ញើជូនកំលោះក្រមុំចាស់នៅទិវានៃក្ដីស្រឡាញ់ក្នុងបំណងលួងចិត្ដជនដែលឯកា។
សំបុត្រ និងប័ណ្ណត្រូវបានសរសេរក្នុងប៉ុន្មានសប្ដាហ៍ និងយកទៅដាក់ទុកនៅតាមប្រអប់សំបុត្រប្រៃសណីយ៍បែបបុរាណចំនួន ១០ ទីតាំងទូទាំងក្រុងឡុងដ៍ និងទីក្រុងដទៃទៀត។
ទិវាសំបុត្រក្រហមជាគំនិតផ្ដួចផ្ដើមរបស់ក្រុមហ៊ុនលក់កាដូអនុស្សាវរីយ៍នឹងបញ្ជូនសំបុត្រទាំងនោះទៅកាន់អ្នកឯកាវ័យចំណាស់ក្នុងគោលដៅមជ្ឈមណ្ឌលថែទាំជនវ័យចាស់មួយចំនួននៅថ្ងៃ ១៤ កុម្ភៈ។
កញ្ញា ស៊ីវ៉ានី ផាតនី ជានាយកផ្នែកទីផ្សារអាយុ ២៦ ឆ្នាំបានប្រាប់ AFP ក្រោយបានសរសេរសំបុត្រ ១ ដាក់ក្នុងប្រអប់នៅកន្លែងធ្វើការភាគកណ្ដាលទីក្រុងឡុងដ៍កាលពីថ្ងៃអង្គារថា៖ «ខ្ញុំសរសេរថាអ្នកមានគេស្រឡាញ់ អ្នកមានគេចូលចិត្ដ អ្នកមានគេរាប់អាន។ ខ្ញុំគិតថា វាពិតជាអស្ចារ្យ។ វាល្អត្រង់ថាមានគេនឹកគិតដល់ពួកគាត់»។
ក្រុមហ៊ុនដែលមានសមាជិកជាង ៤ ម៉ឺននាក់នៅចក្រភពអង់គ្លេសបានផ្សព្វផ្សាយខ្លាំងពីគម្រោងនេះដោយមានការគាំទ្រពីអង្គការយុទ្ធនាការបញ្ឈប់ភាពឯកា ខណៈពលរដ្ឋអង់គ្លេស ៩ លាននាក់រស់នៅឯកាក្នុងនោះ ៤ លាននាក់ជាជនចាស់ជរា៕ HR