ភ្នំពេញ: តារាសម្តែងប្រុសពន្លកថ្មី មានមុខមាត់ស្រស់សង្ហាលោក លី សុគឹមសាន ហៅ ប្រុស ខួច ទើបតែឈានចូលសិល្បៈអាជីពជាតារាសម្តែងបាន ២ ឆ្នាំ តែលោកបានធ្វើឲ្យមានការគាំទ្រជាខ្លាំង មិនថា នៅក្នុងប្រទេស និងឯនាយសមុទ្រ តាមរយៈវីដេអូបទចម្រៀង «មេឃកំពុងភ្លៀងហើយ» របស់កំពូលតារាចម្រៀងសំនៀងស្រទន់ អ្នកនាង មាស សុខសោភា។
តារាប្រុសវ័យ ២៧ ឆ្នាំរូបនេះ បានផ្តល់បទសម្ភាសមកកាន់ ភ្នំពេញ ប៉ុស្តិ៍ តាមរយៈទូរស័ព្ទថា៖ «ខ្ញុំចូលសិល្បៈបាន ២ ឆ្នាំហើយ។ ចម្រៀងដែលសម្តែងដំបូង បទ« Forever Alone » និងបទទី ២ «មេឃកំពុងភ្លៀងហើយ» ក្រោយពីហ្នឹងមកក៏មានជាបន្តបន្ទាប់ទៀត ជាមួយកញ្ញា អ៊ីវ៉ា អ្នកនាង ពេជ្រ សោភា និងតារាល្បីៗជាច្រើននាក់ទៀត»។
ប្រុស ខួច តារាសម្តែងប្រុសមានមុខឃ្យូតៗបាននិយាយបន្តទៀតថា៖ «តាំងពីចូលសិល្បៈមក ថតរឿងបាន ៣ រឿងហើយ ជារឿងភាគ។ រឿងទី ១ រឿង និស្ស័យបងប្អូន បន្ទាប់មក រឿង ភ្លើង និងរឿងថ្មីមួយទៀតដែលសព្វថ្ងៃមិនទាន់ថតចប់នៅឡើយទេ តែសុំលាក់សិន»។
ក្រៅពីការងារសិល្បៈ ប្រុស ខួច តួឯកក្នុងរឿង «ភ្លើង» ជារឿងល្បី ដែលទើបតែបញ្ចប់ការចាក់ផ្សាយនៅទូរទស្សន៍បាយ័នមានការគាំទ្រខ្លាំងនោះ លោក ក៏មានមុខរបរមួយទៀត ដោយការលក់ផលិតផលថែរក្សាសម្រស់អនឡាញរបស់លោកផ្ទាល់ (NK Plus) និងមានគម្រោងបើកហាងលក់សម្លៀកបំពាក់ និងភោជនីយដ្ឋានផងដែរ។
តារាប្រុសរូបសង្ហា និងប៉ិនប្រសប់ខាងបញ្ចូលអារម្មណ៍ទៅតាមសាច់រឿង បូករួមភាពស្រស់សង្ហាមានមន្តស្នេហ៍ត្រង់ថ្ពាល់ខូចទាំងសងខាងរូបនេះបានបន្តដូច្នេះទៀតថា៖ «រាល់ថ្ងៃពិតជាមានការរវល់ខ្លាំងណាស់ទាំងការថតបទចម្រៀង រឿងកុន និងការផ្សព្វផ្សាយផលិតផលផ្សេងៗទៀតជាបន្តបន្ទាប់ សឹងថាមិនមានពេលសម្រាប់ការថតមួយចំនួន»។
ប្រុស ខួច ដែលទើបបន្សាបរឿងអាស្រូវស្នេហ៍ជាមួយតារាសម្ដែងរៀមច្បងតួនាងកាកី កញ្ញា សាន សុម៉ាលី លោកបានសម្ដែងចំណាប់អារម្មណ៍ថា៖ «ហើយខ្ញុំពិតជាសប្បាយចិត្ត ដែលមានបងប្អូនគាំទ្រច្រើនខ្លាំងបែបនេះ តែខ្ញុំក៏មិនសប្បាយចិត្តដល់ថ្ងៃណាមួយដែលប្រទេសយើងឲ្យតម្លៃតារាសម្តែង ដូចតារាចម្រៀង ព្រោះទីផ្សារតារាសម្តែងនៅមិនទាន់បានថ្លៃដូចប្រទេសដទៃនៅឡើយទេ ព្រោះពិតជាហត់ណាស់ថ្ងៃខ្លះត្រូវថតទាំងយប់ទាំងថ្ងៃបើសិនជារឿងប្រញាប់ តែបែរជាមិនសូវបានថ្លៃទៅវិញ»។
ចំពោះរឿងស្នេហាវិញ ប្រុស ខួច តារាសម្តែងពន្លកថ្មីសារភាពទាំងឥតលាក់លៀមថា៖ «មានម្ចាស់ចិត្តរួចហើយ តែសុំលាក់សិន ប្រហែលជាអាយុចូល ៣០ ឆ្នាំជាង ទើបចូលរោងការចាំដល់មាន ផ្ទះនៅខ្លួនឯងសិន»។
ទាក់ទងទៅរឿងគូស្នេហ៍របស់តារាសម្តែងវ័យ ២៧ ឆ្នាំរូបនេះត្រូវបានគេដឹងថា មិនមែនជាអ្នកសិល្បៈទេ តែជាកូនអ្នកមានទ្រព្យស្តុកស្តម្ភម្នាក់ ដែលមានអាខោនហ្វេសប៊ុកឈ្មោះថា Nyny Angel II និងមានមុខជំនួញលក់ផលិតផលថែរក្សាសម្រស់រួមគ្នានោះដែរ៕