The Phnom Penh Post Search

Search form




Logo of Phnom Penh Post newspaper Phnom Penh Post - ប្រោន​កាហ្វេ បង្កើត​កម្មវិធី​វប្បធម៌​បង្កប់​ន័យ​ជាតិ​និយម​




ប្រោន​កាហ្វេ បង្កើត​កម្មវិធី​វប្បធម៌​បង្កប់​ន័យ​ជាតិ​និយម​

Content image - Phnom Penh Post
​បុគ្គលិក​ស្លៀក​ប៉ឹង​ក្រមា មួក​ស្លឹកត្នោត​ និង​សៀតផ្កា​ចំប៉ី​អមដោយ​សំណេរ​អក្សរ​ផ្ចង់​។ ឈឹម ស្រីនាង

ប្រោន​កាហ្វេ បង្កើត​កម្មវិធី​វប្បធម៌​បង្កប់​ន័យ​ជាតិ​និយម​

ភ្នំពេញៈ សម្លៀក​បំពាក់​ប៉ឹង​ក្រមា​គ្រង​លើឯក​សណ្ឋាន​ពណ៌ខ្មៅ ខណៈ​បុគ្គលិក​បុរសពាក់​មួក​ស្លឹក​ត្នោត​ ឯនារី​ចងសក់​សៀត​ផ្កាចំប៉ី​មួយ​ជា​គ្រឿង​លម្អកាយ​ ជាភាព​ទាក់​ទាញ​ថ្មីមួយ​សម្រាប់​ហាង​កាហ្វេ​ ប្រោន ឬ (Brown Café)។

ប៉ុន្ដែអ្វី​ដែល​កាន់តែ​ពិសេស​ទៀត​នោះ​ គឺជា​ការប្រើ​ប្រាស់​ស្ករត្នោត​ខ្មែរ និងការ​តាំង​បង្ហាញនូវ​វត្ថុសិល្បៈ​ជា​តម្លៃជាតិ​ខ្មែរ​មួយ​ចំនួន​លើក​ដំបូង​នា​ឱកាស​ចូលឆ្នាំ​ប្រពៃណី​ខ្មែរ​ឆ្នាំវក​ឆ្នាំ ២០១៦ នេះ។

ពាក់ព័ន្ធ​នឹងភាព​ថ្មី​សន្លាង​នៃការ​ប្រើស្ករ​ត្នោត​ខ្មែរ​សម្រាប់​ឆុងផ្សំ​ជាមួយ​នឹងកាហ្វេ​នេះ​ កញ្ញា ធន ម៉ាឡា​ បុគ្គលិកផ្នែក​ប្រតិបត្តិ​ទីផ្សារ​នៅ Brown Café​ បង្ហើបឲ្យ​ដឹងថា៖ «ការរក​ស៊ី​មិនទាល់​តែ​ចំណេញ​ទើប​ធ្វើ​នោះ​ឡើយ។ ប្រការ​សំខាន់​ក៏ត្រូវ​មានលក្ខណៈ​ជាស្មារតី​ជាតិនិយម​ និង​លើក​តម្កើង​នូវ​តម្លៃ​វប្បធម៌ជាតិ​ដែរ។ ដូច្នេះ​យើងសាកល្បង​ប្រើរូប​មន្តថ្មី​មួយ​គឺ​ស្ករត្នោតដែល​ជាវត្ថុ​ធាតុ​ដើម​របស់​ខ្មែរ​ ដើម្បី​បញ្ជ្រាប​ចូល​ឲ្យមានលក្ខណៈ​ស្តង់ដារ​អន្តរជាតិ​មួយសម្រាប់​ភេសជ្ជៈ​កាហ្វេ។ យើងបាន​ប្រើ​និមិត្ត​រូបត្នោត​នៅ​ក្នុងប្រភេទ​កាហ្វេ​ទាំងនេះ​ដូចជា Palm Cappuccino, Palm Dolce, Palm Expresso និង​ Palm & Cookie»។

Content image - Phnom Penh Post
​កាក់ និង​ក្រដាស​ប្រាក់​បុរាណ​នៅ​ប្រោន​កាហ្វេ​​។ ឈឹម ស្រីនាង

កញ្ញា ធន ម៉ាឡា បន្ត​ថា៖ «កាហ្វេ​ដែល​ប្រើ​ស្ករ​ត្នោត​មានបម្រើ​នៅ Brown Café ចាប់ពី​ដើមខែ​មេសាបន្ត​ដល់​ដើម​ខែឧសភា​ខាងមុខ​ ហើយ​បើ​រូបមន្ត​នេះមាន​ការ​ពេញ​និយម​ពី​ភ្ញៀវ​ យើងនឹង​បញ្ចូល​ក្នុង​បញ្ជី​នៃ​តារាង​ភេសជ្ជៈ​តែម្តង»។

ក្រៅពី​ឈុតសម្លៀក​បំពាក់​ ការ​លម្អ​កាយ និង​រសជាតិ​ថ្មី​នៃកាហ្វេ​នៅ Brown Café គេក៏​ឃើញ​មាន​រៀបចំ​ការដាក់​តាំងរូប​ភាព​វត្ថុសិល្បៈ​ និង​បង្កើតនូវ​សកម្មភាព​លើក​តម្កើង​តម្លៃ​វប្បធម៌ខ្មែរ​ ដែលបាន​គាស់​កកាយតាំង​ពី​សម័យកាល​បុរេប្រវត្តិសាស្រ្ត​របស់ខ្មែរ​ផងដែរ គឺការ​តាំងរូប​ភាពរូបិយ​វត្ថុខ្មែរ​ចាប់ពីសម័យ​ហ្វូណន ដែល​ប្រើកាក់​ប្រាក់​រហូតដល់​សម័យ​ទំនើប​ដែលប្រើ​ក្រដាសប្រាក់​ ការបង្ហាញ​នូវ​ឧបករណ៍តន្រ្តី​បុរាណ​ខ្មែរ និង​ការវិវត្ត​នៃអក្សរ​សាស្រ្តខ្មែរ​ពីបុរាណ​ដល់បច្ចុប្បន្ន​តាមរយៈ​កម្មវិធី​ប្រកួត​សរសេរ​អក្សរ​ផ្ចង់។

Content image - Phnom Penh Post
​ការ​តាំង​បង្ហាញ​នូវ​អក្សរ​បុរាណ​នៅ​ប្រោន​កាហ្វេ​។ ឈឹម ស្រីនាង

លោក ឈុន ហាវ៉ាន បុគ្គលិក​ផ្នែក​រចនា​ក្រាហ្វិក​នៅ​ Brown Café ឲ្យដឹងថា៖ «ជាដំបូង​នេះ​ យើងបាន​រៀបចំ​ការបង្ហាញ​វត្ថុសិល្បៈ​ទាំងនេះ​នៅតែ​បីសាខា​ប៉ុណ្ណោះ។ ​ការ​បង្ហាញ​រូបភាព​រូបិយ​វត្ថុ​ខ្មែរ​នៅ​សាខាទី ១១ លើដង​មហាវិថី​ព្រះនរោត្តម ការ​បង្ហាញ​ពីការ​វិវត្ត​អក្សរសាស្រ្ត​ខ្មែរ និងប្រកួត​អក្សរផ្ចង់​ចាប់ពី​ថ្ងៃទី ១៣ ដល់ទី ១៧ ខែមេសា និង​ប្រកាសអ្នក​ឈ្នះ​នៅថ្ងៃទី ១៩ ខែមេសា​ ឯសាខាទី ៨ សង្កាត់​បឹងកេងកង និង​បង្ហាញ​ឧបករណ៍​ភ្លេង​បុរាណ​ខ្មែរវិញ​នៅ​សាខា​ទួល​គោក»៕

អត្ថបទគួរចាប់អារម្មណ៍