.jpg)
ថ្មីៗនេះតារាចម្រៀងស្រី ផន ស្រីខួច បង្ហោះសារចេញថតកុនដំបូងរបស់ខ្លួន។ រូបថត អុីនស្តាក្រាម
ភ្នំពេញ៖ ថ្មីៗនេះ តារាចម្រៀងនៅផលិតកម្មហង្សមាសឈ្មោះពិត ផន នីដា ហៅ ផន ស្រីខួច បង្ហើបរឿងខ្លួនចាប់ផ្តើមថតកុនជាលើកដំបូង បន្ថែមអាជីពថ្មីមួយទៀត ដើម្បីពង្រីកទីផ្សារសិល្បៈ ខណៈតារាប្រុសស្រីប្រឡូកក្នុងសិល្បៈចម្រៀងស្របាលៗខ្លួន និងរលកក្រោយបានឈានមុននាងមួយជំហានរួចទៅហើយនោះ។
តារាចម្រៀងស្រីល្បី ដែលឈរជើងយូរក្រែលនៅលើទ្រនំធំផលិតកម្មហង្សមាស កញ្ញា ផន ស្រីខួច បង្ហើរសារតាមអ៊ីនស្តាក្រាមថា៖ «តួស្រីរាងរមទមបន្តិចហើយមួយរឿងនេះ! រឿងដំបូងរបស់នាងខ្ញុំ» ដែលជាសារដ៏កម្របានឃើញរបស់តារាចម្រៀងស្រីរាងខ្ពស់ស្រឡះ សម្រស់កាន់តែស្រស់ស្រាយរូបនេះ បង្ហើបប្រាប់ឲ្យដឹងពាក់ព័ន្ធនឹងរឿងចេញថតកុនដំបូងនោះ។
កញ្ញា ផន ស្រីខួច អតីតតារាចម្រៀងនៅទ្រនំចាស់ផលិតកម្មរ៉ុក ដែលបានប្តូរមកចូលទ្រនំថ្មីហង្សមាសអស់ពេលជាច្រើនឆ្នាំរូបនេះ បានបញ្ជាក់ប្រាប់ភ្នំពេញប៉ុស្តិ៍ ពីរឿងការសម្រេចចិត្តថតកុនដំបូងនេះ តែសុំលាក់ចំណងជើងរឿង និងផលិតកម្មភាពយន្ត ដែលនាងទើបតែចាប់ផ្តើមថតនោះថា៖ «នោះគឺជាកុនខ្លី ដែលនាងខ្ញុំទើបតែចាប់ផ្តើមថតដំបូង ហើយក៏សុំអធ្យាស្រ័យដែរ ដោយមិនទាន់អាចជម្រាបបងពីចំណងជើង និងផលិតកម្មបាន នៅពេលនេះទេ ព្រោះជាគោលការណ៍របស់ផលិតកម្ម»។
តារាស្រី ផន នីដា ហៅកញ្ញា ផន ស្រីខួច បន្តឲ្យដឹងពីមូលហេតុក៏ដូចជាអារម្មណ៍នៃការចាប់ផ្តើមទទួលថតកុនដំបូង និងរំឭកពីមុនក៏ធ្លាប់មានគេហៅថតកុនដែរ តែមិនព្រមទទួលថតនៅក្នុងពេលនោះថា៖ «ដោយសារពេលនេះ នាងខ្ញុំគិតថា ចង់ពង្រីកទីផ្សារសិល្បៈបន្ថែម និងចង់បន្សល់ទុកនូវស្នាដៃរបស់ខ្លួនផ្នែកសិល្បៈនេះ [ថតកុន] ហើយកាលពីមុននោះ នាងខ្ញុំក៏ធ្លាប់មានខាងផលិតកម្មគេបានហៅឲ្យថតកុនដែរ តែដោយសារខ្លួនឯងគិតថា ខ្លាចសម្តែងមិនបានល្អ ទើបមិនហ៊ានទទួលថត។ ដោយឡែកចាប់ពីពេលនេះទៅ នាងខ្ញុំបានត្រៀមខ្លួនរួចហើយ សម្រាប់ការពង្រីកទៅលើអាជីពថ្មីក្នុងវិស័យថតខ្សែភាពយន្តនេះ»៕
