ភ្នំពេញ៖ ដោយសារចង់ផ្តល់ឱកាសឲ្យដល់យុវជន-យុវតីខ្មែរជំនាន់ក្រោយ ដែលមានទេពកោសល្យ និងស្រឡាញ់វិស័យសិល្បៈសម្តែងភាពយន្ត ហើយអាចអភិវឌ្ឍខ្លួនក្លាយទៅជាតារាសម្តែងអាជីពនាពេលអនាគត ទើបបានផលិតកម្មក្រុងពិជ័យប្រកាសជ្រើសរើសតួឯកប្រុស-ស្រីជាច្រើននាក់ ដើម្បីចេញថតកុនសម្រាប់ផលិតកម្មដោយមិនបានកំណត់កាលបរិច្ឆេទឡើយ។
បើតាមសម្តីលោក ចាន់ណា រ៉ូណាន ជាអ្នកគ្រប់គ្រងទូទៅនៃផលិតកម្មក្រុងពិជ័យបានឲ្យដឹងពីការសម្រេចប្រកាសជ្រើសរើសតួឯកប្រុស-ស្រីនេះថា៖ «ដោយសារតែយើង ចង់បើកឱកាសដល់យុវវ័យ ដែលមានទេពកោសល្យសម្តែងកុនបាន និងចង់ឲ្យវិស័យសម្តែងកុននៅផលិតកម្មរបស់យើងមានលក្ខណៈសម្បូរបែបនៃតួឯកប្រុស-ស្រី។ ដូច្នេះហើយ យើងចង់បានតួសម្តែងជំនាន់ក្រោយ សម្រាប់ការប្រឡូកសិល្បៈក្នុងវិស័យនេះ»។
លោក ចាន់ណា រ៉ូណាន បន្តឲ្យដឹងទៀតថា៖ «ផលិតកម្មក្រុងពិជ័យ ប្រកាសជ្រើសរើសតួឯកប្រុស-ស្រី ជំនាន់ថ្មីនេះគឺទទួលយកពីគ្រប់ខេត្តក្រុង។ ផលិតកម្មយើងខ្ញុំត្រូវការ តួឯកប្រុស-ស្រីជំនាន់ថ្មីច្រើននាក់ ដើម្បីចេញផលិតខ្សែភាពយន្តខ្នាតធំរឿង «កុំងាកក្រោយវគ្គ ២» និងរឿង «កំណត់ហេតុនាងនាថវគ្គ ២» ដោយតម្រូវឲ្យមានលក្ខខណ្ឌតាមការជ្រើសរើស គឺក្លាយទៅជាតារាសម្តែងកុងត្រាប្រចាំនៅផលិតកម្ម។ ចំពោះសុភាពបុរស ដែលមានអាយុចាប់ពី ១៥ ឆ្នាំ ដល់ ២២ ឆ្នាំ មានកម្ពស់ ១,៧០ ម៉ែត្រ ខណៈសុភាពនារីវិញមានអាយុចាប់ពី ១៥ ឆ្នាំ ដល់ ២០ ឆ្នាំ កម្ពស់ ១,៦៥ ម៉ែត្រ»។
គួររំឭកថា ផលិតកម្មក្រុងពិជ័យនេះ កំពុងទទួលបានការគាំទ្រខ្លាំងពីទស្សនិកជន ជាមួយវណ្ណកម្មដឹកនាំផលិត ដែលពោរពេញដោយទេពកោសល្យ និងជំរុញឲ្យភាពយន្តខ្នាតធំបែបកំប្លែងថ្មីរឿង «សំណើច ៦៥២ គីឡូម៉ែត្រ» ផ្ទុះការគាំទ្រជាថ្មី ដោយបានចាប់ផ្តើមចេញផលិតចាប់តាំងពីចុងឆ្នាំ ២០១៩ ដោយប្រមូលផ្តុំដោយតារាសម្តែងប្រុស-ស្រីល្បីឈ្មោះ និងធ្លាប់មានប្រវត្តិឆ្លងកាត់ការប្រកួតស្រីស្រស់-ប្រុសស្អាតច្រើនជំនាន់ដែរ។
ខណៈអ្នកនិពន្ធ និងដឹកនាំផលិតការសម្តែងនៅផលិតកម្មក្រុងពិជ័យ លោក ចាន់ណា រ៉ូណាន ធ្លាប់បានសាងភាពភ្ញាក់ផ្អើល និងកក្រើកនៅក្នុងវិស័យភាពយន្ត ដោយស្នាដៃផលិតភាពយន្តខ្នាតធំជាច្រើនបន្តបន្ទាប់ដូចជារឿង «កំណត់ហេតុនាងនាថ» រឿង «សសរកន្លោង» រឿង«កុំងាកក្រោយ» ជាដើម។
បេក្ខជនចាប់អារម្មណ៍អាចបំពេញពាក្យ និងផ្ញើរូបថតទម្រង់មុខចំ មុខចំហៀង និងមួយជំហរ ផ្ញើតាមគេហទំព័រផលិតកម្មផ្ទាល់ និងអាចធ្វើការទំនាក់ទំនង 098 584 999 /012 832 425៕