.jpg)
ប៊ុត សីហា ម្ចាស់ពានThe Voice Cambodia 1។ ភ្នំពេញ ប៉ុសិ៍្ត
ភ្នំពេញៈ ទីបំផុតតារាចម្រៀងប្រុសម្ចាស់ពាន The Voice Cambodia រដូវកាលទី ១ ប៊ុត សីហា ជិតមានដំណឹងពីទ្រនំថ្មីហើយ ក្រោយពីជួបព្យុះភ្លៀង ដែលរួតរឹតដោយរឿងអាស្រូវដ៏អាម៉ាស់ប្រើប្រាស់គ្រឿងញៀនកាលពីចុងខែកុម្ភៈ ខណៈថ្មីៗនេះលេចឮថា ផលិតកម្មធំ ២ កំពុងតែចរចាយក ហើយត្រៀមថតបទចម្រៀងចេញនៅរដូវកាលភ្ជុំបិណ្ឌខាងមុខនេះទៀតផង។
ក្រោយពីបង្ហោះសារសុំក្តីអាណិតពីមហាជន ដើម្បីស្វែងរកការគាំទ្រសាជាថ្មី ដោយមិនហ៊ានប្រាថ្នាឆាកតន្ត្រីធំ គឺចង់បានតែត្រឹមឆាកតន្ត្រីតូចតាចតាមភូមិ ឬស្រុកស្រែចម្ការនោះ ស្រាប់តែមួយសន្ទុះក្រោយមកក៏ឃើញសារប្រកាសក្តែងៗថា លាឈប់ពីអាជីពចម្រៀង ព្រោះតែបាក់ទឹកចិត្ត ដែលចេញពីគណនីហ្វេសប៊ុកខ្លួនផ្ទាល់ ប៊ុត សីហា សរសេរថា៖ «អរគុណបងប្រុស Soklim Reaks Avp ដែលបានឲ្យគេធ្វើបទ និងនិពន្ធឲ្យខ្ញុំរួមទាំងបងប្រុស ស៊ីវ ចន្ទ។ អរគុណដល់អង្គការ IKARE នៃសារមន្ទីរមរតកជាតិខ្មែរ ដែលមានបង សេក កុសល ជានាយក និងបង សុខ លីមរក្សា អ្នកសម្របសម្រួលនៅស្រុកខ្មែរ ក្នុងការចំណាយប្រាក់ធ្វើសម្រាប់ខ្ញុំ។ ៥ បទដែលបានថតថ្ងៃមិញពិតជាត្រូវចិត្តណាស់។ មុននឹងឈប់ច្រៀងខ្ញុំ នឹងបន្សល់សំឡេងទុកឲ្យពុកម៉ែបងប្អូននៅនឹងអង្គការ IKARE ឲ្យបាន ២០ បទខ្ញុំនឹងឈប់ច្រៀងហើយ ហើយពុកម៉ែ បងប្អូន នឹងបានឈប់ដៀលខ្ញុំតទៅទៀត»។
បើតាមលោក សុខលីម រក្សា ជាអ្នកសម្របសម្រួលអង្គការ IKARE និងជាបងធម៌របស់អតីតតារាចម្រៀងប្រុសលំដាប់កំពូលនៅលើទ្រនំហង្សមាស ប៊ុត សីហា ដែលទើបជំពប់រឿងអាស្រូវស្ទើរធ្លាក់រហូតដល់ចំណុចសូន្យនោះ បានបង្ហើបប្រាប់ភ្នំពេញប៉ុស្តិ៍ថា៖ «នាពេលថ្មីៗ រំលងប្រមាណជិតមួយ ១ ខែ កន្លងមកនេះ ប៊ុត សីហា មានផលិតកម្មចម្រៀងជាច្រើនបានមកចរចាចង់បានគាត់ទៅច្រៀងនៅផលិតកម្មខ្លួន តែមានជម្រើសផលិតកម្មធំ ២ ដែលជាជម្រើសចុងក្រោយរបស់គាត់ នឹងសម្រេចនាពេលឆាប់ៗនេះផងដែរគឺមានផលិតកម្មថោន និងផលិតកម្មសាន់ដេ»។
អ្នកសម្របសម្រួលអង្គការ IKARE រូបនេះបានបន្តថា៖ «បើតាមដឹងនោះ ប៊ុត សីហា ពិតជាចង់ទៅក្លាយជាសមាជិកនៃផលិតកម្មទាំង ២ នេះណាស់ តែដោយសារមិនទាន់ត្រូវគ្នារឿងកុងត្រា តែជាអាទិភាពសម្រាប់គាត់គឺផលិតកម្មថោន ខណៈគាត់ និងខ្ញុំ នឹងត្រូវជួបពិភាក្សាគ្នាជាចុងក្រោយផងដែរ ជាមួយនឹងលោក មាស សុខរតនៈ ជាអ្នកគ្រប់គ្រងទូទៅនៃផលិតកម្មថោន នាពេលប៉ុន្មានថ្ងៃខាងមុខនេះពាក់ព័ន្ធនឹងរឿងកុងត្រា និងលក្ខខណ្ឌនានាមួយចំនួន សម្រាប់ការយល់ព្រមទទួលយក សីហា ឲ្យចូលទៅផលិតកម្មថោន។ ពេលមិនយូរទេ អាចពាក់កណ្តាលខែកក្កដា ឬចុងខែកក្កដា នេះ សីហា នឹងអាចបង្ហាញវត្តមានដឹងច្បាស់ពីទ្រនំថ្មីជាមិនខាន។
ក្រោយពីមានការចរចាត្រូវគ្នាហើយ នាឱកាសរដូវកាលបុណ្យភ្ជុំបិណ្ឌប្រពៃណីខ្មែរខាងមុខក្នុងឆ្នាំនេះ សីហា ក៏មានបទចម្រៀងចេញបំពេអារម្មណ៍មហាជនតែម្តង។ ប្រសិនបើ ការចរចាជាមួយថោន មិនត្រូវគ្នានោះទេ គាត់នៅមានជម្រើសបន្ទាប់មួយទៀតគឺផលិតកម្មសាន់ដេ ខណៈអ្នកគ្រប់គ្រងជាន់ខ្ពស់ ក៏រង់ចាំការសម្រេចចិត្តរបស់ សីហា និងរូបខ្ញុំជាអ្នកសម្របសម្រួលទៅជួប»៕
