ភ្នំពេញ៖ ដើម្បីពង្រីកទីផ្សារផ្នែកវិស័យសិល្បៈឱ្យដើរទាន់តាមសម័យកាល និងកាន់តែទូលំទូលាយនោះ ទើបជំរុញឱ្យផលិតកម្មធំចំនួន ២ របស់ប្រទេសកម្ពុជា និងថៃ បានពួតដៃគ្នាធ្វើទំនើបកម្មផ្នែកទីផ្សារលើវិស័យសិល្បៈតាមរយៈការរៀបចំការប្រគំតន្រ្តីរវាងផលិតកម្មថោន និងផលិតកម្ម GRAMMY។
គួរឱ្យកត់សម្គាល់ផលិតកម្មទីក្រុងភាពយន្ត (ថោន) បានបោះជំហានមួយ ស្របទៅនឹងការដាក់ចេញជាយុទ្ធសាស្ត្រ ផែនការសកម្មភាព និងទិសដៅការងារអាទិភាព សម្រាប់ការប្រកួតប្រជែងលើទីផ្សារសេរីក្នុងន័យចូលរួមអភិវឌ្ឍ ថែរក្សាវប្បធម៌ឱ្យបានរឹងមាំ និងរស់រវើក។ បើគិតមកដល់ឆ្នាំ ២០២០ នេះ ផលិតកម្មថោនមានអាយុកាល ១០ ឆ្នាំ ហើយដោយមានតារាចម្រៀងប្រុសស្រី និងតារាសម្តែងល្បីៗជាច្រើន បានចូលរួមរស់ជាមួយថោនបង្កើតបាននូវទស្សនីយភាពដ៏ជក់ចិត្តបម្រើដល់សាធារណជន។
នាយិកាប្រតិបត្តិក្រុមហ៊ុនថោនគ្រុប លោកស្រី វ៉ា នីតា បានថ្លែងឱ្យដឹងនាថ្ងៃប្រកាសបើកចុះកិច្ចព្រមព្រៀងគ្នារវាងផលិតកម្មទីក្រុងភាពយន្ត (ថោន) និងផលិតកម្ម GMM (GRAMMY) កាលពីថ្ងៃទី ៣ ខែ ធ្នូ ឆ្នាំ ២០២០ តាមរបៀបធ្វើការងារថ្មីនាសម័យកូវីដ ១៩ នេះថា៖ «ជាក់ស្តែងនៅថ្ងៃនេះ បានលេចចេញជារូបរាងថ្មីមួយទៀត រវាងផលិតកម្មទីក្រុងភាពយន្តប្រចាំប្រទេសកម្ពុជា និងផលិតកម្ម GRAMMY ប្រចាំប្រទេសថៃ បានរួមគ្នាចុះកិច្ចព្រមព្រៀងពង្រីកទីផ្សារផ្នែកវិស័យសិល្បៈកម្សាន្តរួមគ្នាផលិតបទចម្រៀងរួមគ្នាបង្កើតព្រឹត្តិការណ៍ប្រគំតន្ត្រីនានា (Concerts) បង្កើតបានជារសជាតិថ្មី ស្របតាមតម្រូវការទីផ្សារនាពេលបច្ចុប្បន្ន ក៏ដូចជាពេលទៅអនាគត។
រាប់ចាប់តាំងពីផលិតកម្មថោន បានបង្កើតជាមួយនឹងការទទួលបាននូវការគាំទ្រពីមហាជនទាំងក្នុង និងក្រៅប្រទេស ផលិតកម្មថោនបានពង្រីកអាជីវកម្មរបស់ខ្លួន ដើម្បីចូលរួមចំណែកនូវការកសាងអភិវឌ្ឍសង្គមជាតិខាងវិស័យសិល្បៈ។
លោកស្រី វ៉ា នីតា បានបន្តថា៖ «ជាថ្មីម្តងទៀត ដូចបានជម្រាបជូនខាងលើ ផលិតកម្មទីក្រុងភាពយន្ត (ថោន) និងផលិតកម្ម GRAMMY ចាប់ពីថ្ងៃនេះតទៅបានរួមគ្នាធ្វើទំនើបកម្ម ដើម្បីឆ្លើយតបទៅនឹងតម្រូវការទីផ្សារឱ្យបានទាន់់ពេល និងកាន់តែទូលំទូលាយ ជាពិសេស គឺការខិតខំសម្រិតសម្រាំងផលិតកម្មវិធីល្អៗឱ្យបានច្រើន ដើម្បីបំពេញតាមតម្រូវការទីផ្សារនៅក្នុងស្មារតីទទួលខុសត្រូវ សំដៅរួមគ្នាលើកកម្ពស់វិស័យសិល្បៈឱ្យមានភាពល្បីល្បាញ និងរួមគ្នា ការពារគោរព គាំទ្រលើស្នាដៃអ្នកនិពន្ធ និងក្រុមអ្នកផលិតក្នុងន័យការលើកទឹកចិត្ត ផ្តល់តម្លៃម្ចាស់កម្មសិទ្ធិ»។
លើសពីនេះ ផលិតកម្មថោន និងផលិតកម្ម GRAMMY បានរួមគ្នាបង្កើតនូវបណ្តាញសង្គម YouTube ថ្មីមួយរួមគ្នាដែលមានឈ្មោះថា «TOWN x GMM GRAMMY» ដើម្បីឱ្យអ្នកគាំទ្រអាចចូលទស្សនាកម្សាន្តដោយសេរី និងមានលក្ខណៈយ៉ាងសម្បូរបែបនៃវិស័យសិល្បៈរបស់ប្រទេសកម្ពុជា និងប្រទេសថៃ។
គួរបញ្ជាក់ថា ក្រុមហ៊ុនថោនអ៊ីនធឺធេនមែនគ្រុប នាពេលបច្ចុប្បន្ននេះ បាននិងកំពុងពង្រីកនូវវិសាលភាពរបស់ខ្លួនមានបុត្រសម្ព័ន្ធចំនួន ៥ រួមមានដូចជា ផលិតកម្មថោន ស្ថានីយវិទ្យុថោន ស្ថានីយវិទ្យុថប់ ផលិតកម្ម Top Music និងស្ថានីយប៉ុស្តិ៍ទូរទស្សន៍ថោន៕