ភ្នំពេញ៖ ដោយមួយរយៈនេះ ឧស្សាហ៍ឃើញកើតមានបញ្ហាចម្រូងចម្រាសគ្នាខ្លាំងរវាងតារាចម្រៀងរលកក្រោយត្រូវបានតារាចម្រៀងរលកមុខ ឬម្ចាស់កវីនិពន្ធ ចោទប្រកាន់រឿងយកបទចម្រៀងគេទៅច្រៀងមិនបានសុំការអនុញ្ញាត ឬរំលោភច្បាប់កម្មសិទ្ធិបញ្ញានោះ ទើបថ្មីៗនេះ ផលិតកម្ម Galaxy Navatra បានប្រកាសទិញសិទ្ធិផ្តាច់មុខនូវបទចម្រៀងមរតកដើមអតីតកវីម្ចាស់ស្ទឹងសង្កែលោក គង្គ ប៊ុនឈឿន ដែលមានការព្រមព្រៀងពីភរិយាកវី និងក្រសួងវប្បធម៌ និងវិចិត្រសិល្បៈផងដែរ។
បើតាមលិខិតមេធាវីរបស់ផលិតកម្ម Galaxy Navatra បានជូនដំណឹងកាលថ្ងៃទី ១៩ ខែ ឧសភា ឆ្នាំ ២០២០ នោះបញ្ជាក់ថា៖ «ខ្ញុំ គូន សារឿន ជាមេធាវីការពារសិទ្ធិ និងផលប្រយោជន៍ឲ្យក្រុមហ៊ុន Galaxy Navatra Group Co.,LTD ក្រោមកម្មវត្ថុ សូមជម្រាបដំណឹងអំពីសិទ្ធិក្នុងការផលិត និងចាក់ផ្សាយឡើងវិញនូវបទចម្រៀងមរតកដើមរបស់កវីនិពន្ធ គង្គ ប៊ុនឈឿន។ តបតាមកម្មវត្ថុ និងយោងខាងលើ ខ្ញុំបាទមានកិត្តិយសជម្រាបជូនដល់សាធារណជន រួមទាំងបណ្តាលផលិតកម្មចម្រៀងនៅក្នុងព្រះរាជាណាចក្រកម្ពុជា និងម្ចាស់ CHANNEL YOUTUBE ទាំងអស់មេត្តាជ្រាបថា ក្រុមហ៊ុន Galaxy Navatra Group Co.,LTD បានទទួលសិទ្ធិផ្តាច់មុខពីលោកស្រី គាត គឹមលន ជាភរិយារបស់អតីតកវីនិពន្ធ គង្គ ប៊ុនឈឿន ក្នុងការផលិត និងផ្សព្វផ្សាយឡើងវិញនូវបទចម្រៀងមរតកដើម ដែលជាស្នាដៃរបស់កវីនិពន្ធ គង្គ ប៊ុនឈឿន តាមប្រព័ន្ធផ្សព្វផ្សាយនានារួមទាំង CHANNEL YOUTUBE សម្រាប់រយៈពេល ១០ ឆ្នាំ គិតចាប់ពីថ្ងៃទី ១០ ខែ មេសា ឆ្នាំ ២០១៩»។
ខណៈសេចក្តីជូនដំណឹងនេះក៏បានកំណត់ពេលឲ្យភាគីទាំងផលិតកម្ម និងម្ចាស់គេហទំព័រនានាឲ្យបញ្ឈប់សកម្មភាពយកបទមរតកដើមរបស់កវីនិពន្ធ គង្គ ប៊ុនឈឿន ថា៖ «អាស្រ័យដូចបានជម្រាបខាងលើ សូមបណ្តាផលិតកម្ម និង CHANNEL YOUTUBE ទាំងអស់ដែលបានយកបទចម្រៀងមរតកដើមទៅ Upload ឬផលិតឡើងវិញ និងការកែសម្រួលចង្វាក់ភ្លេង ព្រមទាំងខ្លឹមសារខុសពីទម្រង់ដើម ដាក់ផ្សាយតាម CHANNEL ឬដាក់លក់ នៅក្នុង App Store ឬយកទៅដាក់ Copyright កន្លងមក មេត្តារួសរាន់លុបចេញ ឬដកចេញឲ្យបានមុនថ្ងៃទី ១ ខែ មិថុនា ឆ្នាំ ២០២០ នេះ មុននឹងយើងខ្ញុំប្រើប្រាស់នូវសិទ្ធិតាមនីតិវិធីច្បាប់ក្នុងការការពារ សិទ្ធិ និងផលប្រយោជន៍របស់យើងខ្ញុំ»។
ចំណែកលោក យឹម តាស្រង់ ជាអ្នកគ្រប់គ្រងទូទៅនៃផលិតកម្ម Galaxy Navatra ក៏បានចេញសារជូនដំណឹងដែរថា៖ «ដើម្បីចូលរួមថែរក្សា និងលើកកម្ពស់ស្នាដៃមរតកដើម ព្រមទាំងចូលរួមចំណែកលើកកម្ពស់ជីវភាពអ្នកដែលបានទទួលសិទ្ធិគ្រប់គ្រងមរតកសាសន៍នូវបទចម្រៀងមរតកដើមរបស់កវីនិពន្ធបទចម្រៀងដ៏ឆ្នើមរបស់ប្រទេសយើងផលិតកម្ម Galaxy Navatra មានកិត្តិយសសូមជម្រាបជូនសាធារណជនឲ្យបានជ្រាបថា ផលិតកម្ម Galaxy Navatra បានទិញសិទ្ធិផ្តាច់មុខបទចម្រៀងមរតកដើមរបស់កវីនិពន្ធ គង្គ ប៊ុនឈឿន ដើម្បីរក្សា និងផលិតឡើងវិញដោយរក្សាទម្រង់ដើម ព្រមទាំងប្រើប្រាស់នៅក្នុង Youtube និងប្រព័ន្ធ Digital ផ្សេងៗដូចជា Calltune តាមទូរស័ព្ទដើម្បីស្វែងរកចំណូលបន្ថែមជូនម្ចាស់ស្នាដៃ ដោយមានរយៈពេល ១០ ឆ្នាំ ដែលបទភាគច្រើនជា សំនៀងរបស់អធិរាជសំឡេងមាស ស៊ីន ស៊ីសាមុត លោកយាយ រស់ សេរីសុទ្ធា និងមរតកសំនៀងជាច្រើនរូបទៀត»៕