.jpg)
ពិធីករ និងតារាសម្ដែងលោក ប៉ែន ចំរ៉ុង។ ស្រេង ម៉េងស្រ៊ុន
ភ្នំពេញ: ខណៈផលិតករក្នុងស្រុកជាច្រើន រួមទាំងម្ចាស់ផលិតកម្ម LD Picture លោក លៀក លីដា បានសម្ដែងការព្រួយបារម្ភចំពោះភាពយន្តខ្មែរមិនសូវមានការគាំទ្រពីទស្សនិកជន ក្ដីកង្វល់នេះបានធ្វើឲ្យផ្អើលដល់តារាសម្តែង និងជាពិធីករល្បីឈ្មោះ លោក ប៉ែន ចំរ៉ុង ដែលខ្លាចត្រូវប្តូរអាជីព។
ដោយសារតែទំនោរប្រជាជនខ្មែរយើងសម័យបច្ចុប្បន្នបានផ្អៀងចំណាប់អារម្មណ៍តាមដានរឿងបរទេស ទាំងម៉ោងចាក់បញ្ចាំងភាពយន្តក្នុងស្រុកតាមរោងភាពយន្តក៏ចង្អៀត បណ្តាផលិតករខ្មែរបាននាំគ្នាសម្ដែងនូវក្ដីលំបាកក្នុងការឈរជើងលើទីផ្សារផ្ដល់ចំណីចក្ខុដល់ទស្សនិកជន ដែលគាំទ្រវិស័យភាពយន្តខ្មែរ។
ទន្ទឹមនឹងផលិតករល្បីៗត្អូញត្អែពីកង្វះការគាំទ្រ ដែលអាចឈានទៅដល់ភាពនឿយណាយក្នុងការផលិតខ្សែភាពយន្ត សូម្បីតែតួសម្ដែងដូចជាលោក ប៉ែន ចំរ៉ុង ក៏បារម្ភពីការបាត់បង់ឱកាសសម្ដែងសម្រាប់រូបលោក និងមិត្តរួមអាជីពផងដែរ។
តាមរយៈទំព័រហ្វេសប៊ុកផ្ទាល់ខ្លួន តារាសម្ដែង និងពិធីករពូកែខាងកំប្លុកកំប្លែងរូបនេះ បរិយាយសារជុំវិញក្ដីកង្វល់របស់លោកឡើងថា៖«អត់ផលិតករ អត់មានផលិតកម្ម អ៊ីចឹងតួសម្តែងរែកដូងលក់ឲ្យហើយទៅកនយើង»។
ពិធីករ និងតារាសម្ដែងលោក ប៉ែន ចំរ៉ុង។ រូបថត ភ្នំពេញ ប៉ុស្ដិ៍
ជុំវិញការបង្ហើរខាងលើ តារាសម្តែង និងជាពិធីការស្រស់សង្ហា លោក ប៉ែន ចំរ៉ុង បានប្រាប់មក ភ្នំពេញ ប៉ុស្តិ៍ បន្ថែមថា៖ «ដោយសារតែគាត់ (លោក លៀក លីដា) ជាអ្នកផលិតកុនដែលធំជាងគេនៅស្រុកខ្មែរ ដែលមានការចាប់អារម្មណ៍ និងទទួលបានប្រជាប្រិយភាពច្រើនពីអ្នកគាំទ្រ ហើយគាត់មានការព្រួយបារម្ភ អ៊ីចឹងចំពោះខ្ញុំជាអ្នកសម្តែងក៏មានការព្រួយបារម្ភដែរ»។
លោក ប៉ែន ចំរុង ក៏បានផ្តាំផ្ញើរទៅទស្សនិកជនទាំងអស់ថា៖ «សុំឲ្យបណ្តាទស្សនិកជនចូលរួមរិះគន់ ដើម្បីស្ថានា និងសុំឲ្យគាត់បង្វែរពីការពេញនិយមបរទេសនិយម ឬបងប្អូនមួយចំនួនទៀតចូលចិត្តបរទេសនិយមមកចូលចិត្តនិងបង្ហាញទស្សនៈរបស់គាត់តាមរយៈទស្សនាភាពយន្តខ្មែរ ដើម្បីលើកស្ទួយភាពយន្តខ្មែរឲ្យកាន់តែរីកចម្រើន»។
ពិធីករ និងតារាសម្ដែង ដែលសម្បូរទាំងរឿងអាស្រូវ និងទាំងទីផ្សារសិល្បៈ រូបនេះបានបន្តទៀតថា៖ «ប្រសិនបើគ្មានអ្នកគាំទ្រ ផលិតករក៏មិនមានដែរ អ្នកធំជាងផលិតករ គឺទស្សនិកជនអ្នកគាំទ្រនេះឯង បើសិនគ្មានពួកគាត់អ្នកគាំទ្រ ក៏គ្មានពួកបង (ផលិតករ និងអ្នកសម្តែង) ដែរ។ ផលិតកម្មនានា ឬក៏ការផលិតភាពយន្តក៏គ្មានការកើតឡើងដែរ អ៊ីចឹងពួកគាត់គឺជាអ្នកកំណត់ជោគវាសនាវិស័យភាពយន្តខ្មែរ និងវិស័យសិល្បៈ»។
តារាពហុសម្តែងរូបនេះ ក៏បានបន្តសំណូមពរដល់ផលិតកម្មទៀតថា៖ «សុំសំណូមពរឲ្យខាងផលិតកម្មជាតិយើង ធ្វើកុន ឬផលិតអ្វីមួយ គឺតម្រូវទៅលើអ្នកគាំទ្រ។ ចំពោះថ្នាក់ដឹកនាំបន្ថែមចំណុចលើកទឹកចិត្តក្នុងរឿងនេះ (ថតកុន) ក៏ជាការបូករួមដែរ សម្រាប់ស្ថាប័ន ដែលមានសមកិច្ចជួយជ្រោមជ្រែងជួយលើកស្ទួយពង្រីក និងពង្រឹងក្នុងវិស័យនេះឲ្យកាន់តែរឹងមាំ រីកចម្រើនទៅមុខទៀត ខ្ញុំសុំមិនបញ្ជាក់ពីស្ថាប័នណាមួយទេ តែបើសិនជាបានពាក់ព័ន្ធ សូមជួយបន្ថែម ព្រោះខ្ញុំគិតថា នេះជាការបង្ហាញផ្លូវមួយដែរ សម្រាប់ឲ្យភាពយន្តខ្មែររបស់យើង ដំណើរការទៅមុខទៀត»៕
