The Phnom Penh Post Search

Search form




Logo of Phnom Penh Post newspaper Phnom Penh Post - ផលិតករ​បារាំង ​ផលិត​ខ្សែ​ភាពយន្ត​ឯកសារ​រំឭក​អ្នក​និពន្ធ ឃុន ស្រ៊ុន




ផលិតករ​បារាំង ​ផលិត​ខ្សែ​ភាពយន្ត​ឯកសារ​រំឭក​អ្នក​និពន្ធ ឃុន ស្រ៊ុន

Content image - Phnom Penh Post
រូប​ថត​ក្រុម​គ្រួសារ​របស់​អ្នក​និពន្ធ​ឆ្នើម​ផ្នែក​ប្រលោម​​លោកបែប​​រិះគន់​សង្គម​លោក ឃុន ស្រ៊ុន កាលនៅ​រស់​។ រូបថត Eric Galmard

ផលិតករ​បារាំង ​ផលិត​ខ្សែ​ភាពយន្ត​ឯកសារ​រំឭក​អ្នក​និពន្ធ ឃុន ស្រ៊ុន

ភ្នំពេញៈ រឿង «ចេតិយ​សម្រាប់ ឃុន ស្រ៊ុន» គឺ​ជា​ខ្សែ​ភាព​យន្ត​ឯកសារ​មួយ​ដែល​មាន​រយៈពេល ៦៨ នាទី ផលិត​ឆ្នាំ ២០១៥ ជា​វណ្ឌកម្ម​ខ្សែ​ភាព​យន្តខ្នាត​វែង​ដំបូង​របស់​ផលិតករ​ជាតិ​បារាំង​លោក អេរិក ហ្គាល់ម៉ារដ៍ នឹង​ត្រូវ​ចាក់​បញ្ចាំង​ផ្សាយ​លើក​ដំបូង​នា​ចុង​សប្តាហ៍​នេះ​ នៅ​ក្នុង​កម្មវិធី​មហោស្រព​ភាព​យន្ត​អន្តរជាតិ (CIFF) នៅ​ឯ​មជ្ឈមណ្ឌល​បុប្ផា​ណា​ចំនួន​​ពីរ​ថ្ងៃ។

អេរិក ហ្គាល់ម៉ារដ៍ ក៏​បង្ហើប​ឲ្យ​ដឹង​ត្រួសៗ​នៃ​រឿង​នេះ​ដែរ​ថា៖ «ជា​បឋម ខ្សែ​ភាពយន្ត​នេះ​ចង់​​បង្ហាញ​ពី​កម្រង​ស្នាដៃ​របស់​អ្នក​និពន្ធ (ឃុន ស្រ៊ុន) រួម​មាន​​ជា​អត្ថ​បទ​ប្រលោម​លោក​ឆ្លុះ​បញ្ចាំង​ពី​ជីវភាព​រស់​នៅ​របស់​លោក និង​អត្ថបទ​អក្សរសិល្ប៍​បែប​​រិះគន់​ជា​ច្រើន​ទៀត​ ដោយ​ស្នាដៃ​ទាំង​​នោះ​ នៅតែ​បន្ត​មាន​ន័យ​ឆ្លុះ​បញ្ចាំង​ពី​តថភាព​សង្គម​ខ្មែរ​តាំង​ពី​អតីត​កាល​រហូត​ដល់​បច្ចុប្បន្ន​កាល»។

លោក​បន្ត​ថា៖ «ភាព​យន្ត​នេះ​មិន​ត្រឹម​តែ​ឆ្លុះ​បញ្ចាំង​ពី​ខ្សែ​ជីវិត​របស់​អ្នកនិពន្ធ (ឃុន ស្រ៊ុន) នា​សម័យ​អតីត​កាល​នោះ​ទេ ថែម​ទាំង​បង្ហាញ​ពី​ជីវិត​ពិត​របស់​កូន​ស្រី​លោក​បច្ចុប្បន្ន​ដែល​កំពុង​រស់​នៅ​ក្នុង​ស្ថាន​ភាព​ដ៏​លំបាក​នៅ​​ក្រុង ប៉ៃលិន ជា​អតីត​តំបន់​កាន់​កាប់​ដោយ​ខ្មែរ​​ក្រហម​​ផង​ដែរ»។

បើ​តាម​កម្រង​ជីវប្រវត្តិ​លោក ឃុន ស្រ៊ុន កើត​នៅ​ឆ្នាំ ១៩៤៥ និង​ជា​កវី​និពន្ធ​ចម្រុះ​មួយ​រូប​ក្នុង​ចំណោម​​អ្នក​និពន្ធ​​ឆ្នើមៗ​នា​ទសវត្សរ៍​ទី ៦០-៧០​ មាន​ស្នាដៃ​ចម្រុះ​ច្រើន​ ផ្នែក​កំណាព្យ ​អត្ថ​បទ​ពាក្យ​រាយ ប្រលោម​លោក និង​ផ្នែគ​គណិត​វិទ្យាដែរ។

ឆ្នាំ ១៩៧៣ លោក​ធ្លាប់​​ចូលព្រៃ​ម៉ាគី (Maquis) ដើម្បី​តស៊ូ​ក្នុង​សង្រ្គាម​ស៊ីវិល​ចន្លោះ​ឆ្នាំ​ ១៩៧០-១៩៧៥ ដោយ​លោក​ទទួល​បន្ទុក​ផ្នែក​ប្រតិ​បត្តិ​ការ​ក្នុង​កង​ទ័ព​ខ្មែរ​ក្រហម​ ហើយ​ក៏​ធ្លាប់​ជា​បុគ្គលិក​ផ្នែក​បច្ចេក​​ទេសផ្នែក​ស្ថានីយ​រថភ្លើង​ដែរ។

Content image - Phnom Penh Post
​ឈុត​មួយ​ក្នុង​ភាព​យន្ត​ឯកសាររំឭក​ទី​កន្លែង​​ធ្វើ​ការរបស់​​លោក ឃុន ស្រ៊ុន។ រូបថត Eric Galmard

ទី​បំផុត​ លោក​ត្រូវ​ខ្មែរ​ក្រហម​​សម្លាប់​នៅ​​ចុង​ឆ្នាំ ១៩៧៨ គ្មាន​ដំណឹង​​ច្បាស់​លាស់​ថាតើ​​លោក​ត្រូវ​គេ​សម្លាប់​​នៅ​ទី​ណា ខណៈ​អាយុកាល​នៃ​របប​នេះ​ក៏​ជិត​​ដួល​រំលំ​ទៅ​ហើយ​នោះ។

ផលិតករ​ជាតិ​បារាំងបាន​បន្ត​ឲ្យ​​ដឹង​ដែរ​ថា៖ «មូល​ហេតុ​ដែល​ខ្ញុំ​បាន​ដាក់​ចំណង​ជើង​រឿង​​ថា (ចេតិយ​សម្រាប់ ឃុន​ ស្រ៊ុន) នេះ​​ គឺ​ទី​មួយ​ចង់​បង្ហាញពី​ការ​ចងចាំនូវ​​ឈ្មោះ​អ្នក​និពន្ធ​រូប​នេះ​ ដែល​ជា​កវី​និពន្ធ​ឆ្នើម​ទាំង​កំណាព្យ និង​ប្រលោម​លោក​បែប​រិះគន់​សង្គម​ខែ្មរ​ ដែល​​បាន​ប្រើ​ប្រាស់​នូវ​ពាក្យ​ពេចន៍​ប្រៀប​ធៀប​មាន​ន័យ​ស៊ីជម្រៅ​តាំង​ពី​សម័យ​អតីត​កាល​ដល់​បច្ចុប្បន្ន​នេះ។ ទី ២ ពញ្ញាក់​អារម្មណ៍​ពី​ភាព​មិន​ស្រពេច​ស្រពិល​នៃ​មរណភាព​របស់​លោក ឃុន ស៊្រុន នា​ឆ្នាំ ១៩៧៨ តែ​ម្តង​មិន​ដឹងថា សព​របស់​គាត់​ស្លាប់​​នៅ​ទី​ណា​នោះ​ឡើយ»។

រឿង «ចេតិយ​សម្រាប់ ឃុន ស្រ៊ុន» នេះ​នឹង​ត្រូវ​យក​ទៅ​ចាក់​បញ្ចាំង​ផ្សាយ​នៅ​ថ្ងៃ សៅរ៍​ ទី​ ៥ ​ខែ​ ធ្នូ ​ឆ្នាំ ២០១៥ ល្ងាច​​ម៉ោង ៥ និង ១៥ នាទី​ ជូន​ទស្សនិក​ជន​នៅ​វិទ្យាស្ថាន​បារាំង និង​នៅ​ថ្ងៃ​អាទិត្យ​ទី ៦ ខែធ្នូ ល្ងាច​ម៉ោង ៦ និង​ថ្ងៃ​ចន្ទ​ទី ៧ ខែ ធ្នូ ឆ្នាំ ២០១៥ នាព្រឹក​ម៉ោង ១០ និង​ ៣០ ​នាទី នៅ​ឯ​មជ្ឈមណ្ឌល​បុប្ផាណា។

លោក អេរិក ហ្គាល់ម៉ារដ៍ ជា​និស្សិត​បាន​បញ្ចាប់​ការ​សិក្សា​នៅ​ផ្នែក​អក្សរសិល្ប៍ និង​ភាពយន្ត​នៅ​ប្រទេស​បារាំង និង​បាន​បម្រើ​ការងារ​ច្រើន​នៅ​ប្រទេស​តំបន់​អាស៊ី​អគ្នេយ៍​និង​​អាស៊ី​ប៉ាស៊ីហ្វិក​រួម​មាន ដូចជា​ប្រទេស កម្ពុជា ហ្វីលីពីន ជប៉ុន និង​ប្រទេស ហ្វីជី។

នា​បច្ចុប្បន្ន​នេះ​លោក​ជា​សាស្រ្តាចារ្យ​នៅ​សាកល​វិទ្យា​ល័យ និង​បុគ្គលិក​ផ្នែក​ផ្សព្វផ្សាយ​វប្បធម៌​បារាំង​។ ចាប់​តាំង​ពី​ឆ្នាំ ២០០៩​មកលោក អេរិក ម៉ារដ៍​ ​សាស្រ្តា​ចារ្យ​បង្រៀន​មុខ​វិជ្ជា ​ភាពយន្ត​នៅ​ឯ​មហា​វិទ្យា​ល័យ​សិល្បៈ​នៃ​សាកល​វិទ្យា​ល័យ​ទីក្រុង Strasburg៕

អត្ថបទគួរចាប់អារម្មណ៍