.jpg)
ខេត បានសិក្សាលម្អិតលើឯកសារជាច្រើនមុននឹងគូររូបភាព។ រូបថត សហការី ហេង ជីវ័ន
ភ្នំពេញ៖ ខ្សែជីវិតរបស់អ្នកស្រី រស់ សេរីសុទ្ធា តារាចម្រៀងស្រីសំនៀងពីរោះរណ្ដំ ជាដៃគូឆ្នើមបំផុតរបស់អធិរាជសំឡេងមាស លោក ស៊ីន ស៊ីសាមុត កំពុងត្រូវបានផលិតជារឿងប្រលោមលោកបែបឌីជីថល ពីសំណាក់ផលិតករភាពយន្តល្បីនៅក្រុងឡូសអេនជឺលេស សហរដ្ឋអាមេរិក។
លោក ហ្គ្រីហ្គូរី ខាហ៊ីល (Gregory Cahill) ជាផលិតករកម្មវិធីជជែកកម្សាន្ត The Talk របស់ទូរទស្សន៍ CBS ដែលឈ្នះរង្វាន់ផលិតករកម្មវិធីទូរទស្សន៍ឆ្នើម Emmy Award បានដក់ចិត្តនឹងសំនៀងរបស់អ្នកស្រី រស់ សេរីសុទ្ធា ក្រោយពីលោកបានតាមដានភាពយន្តបែបស៊ើបអង្កេតថតនៅកម្ពុជាមានបញ្ចូលបទភ្លេង និងចម្រៀងរបស់អ្នកស្រី។
លោកបានបរិយាយប្រាប់ ភ្នំពេញ ប៉ុស្ដិ៍ ថា៖ «រឿង City of Ghosts ថតនៅប្រទេស កម្ពុជា ដឹកនាំសម្តែងដោយតារាសម្តែងហូលីវូដ ម៉ាត់ ឌីឡន (Matt Dillon) និងចាក់ផ្សាយ ដោយ United Artists របស់អាមេរិក ក្នុងឆ្នាំ ២០០៣ បានធ្វើឲ្យខ្ញុំស្គាល់កម្ពុជាហើយនោះជាភាពយន្តដំបូងដែលធ្វើឲ្យខ្ញុំបានស្តាប់សំឡេងរបស់អ្នកស្រី រស់ សេរីសុទ្ធា ហើយខ្ញុំពិតជាស្រឡាញ់ពេញចិត្តបទចម្រៀងរបស់គាត់ណាស់ ដ្បិតខ្ញុំក៏ជាអ្នកចូលចិត្តសិល្បៈចម្រៀងដែរ វាធ្វើឲ្យខ្ញុំយល់ថា សំឡេងបទភ្លេងរបស់រឿងនេះ ស្តាប់ទៅពិតជារំភើប និងអស្ចារ្យ»។
បន្ទាប់ពីបានស្តាប់ចម្រៀងដ៏ពីរោះរបស់ អ្នកស្រី រស់ សេរីសុទ្ធា មក លោកកាន់តែចង់ដឹងចង់ឮ អំពីប្រវត្តិរបស់តារាចម្រៀងរូបនេះបន្ថែម។ លោកបានចំណាយពេល ២-៣ ឆ្នាំ ដើម្បីស្រាវជ្រាវជីវប្រវត្តិរបស់អ្នកស្រី រហូតលោកប្រមូលបានព័ត៌មានលម្អិត និងបានរៀបចំគម្រោងបង្កើតភាពយន្តស្តីពីខ្សែជីវិតរបស់អ្នកស្រី។
ឈុតដកស្រង់ចេញពីប្រលោមលោកសន្ទនារូបភាព ពីខ្សែជីវិតអ្នកស្រី រស់ សេរីសុទ្ធា។ រូបថត សហការី
ក្រោយពីបានស្វែងយល់កាន់តែស៊ីជម្រៅអំពីខ្សែជីវិតអ្នកស្រី និងការស្លាប់ក្នុងវាលពិឃាតធ្វើឲ្យលោកកាន់តែយល់ថា មនុស្សទាំងឡាយគួរតែបានដឹងអំពីរឿងរ៉ាវដែលលោកបានដឹងនេះដែរ។
ផលិតករជនជាតិអាមេរិករូបនេះបានឲ្យដឹងទៀតថា៖ «គាត់ក៏ជាសិល្បការិនីម្នាក់ ដែលមានការតស៊ូយ៉ាងខ្លាំងក្នុងជីវិត។ គាត់មានប្រវត្តិចេញពីគ្រួសារកសិករតស៊ូពុះពារ ដើម្បីស្វែងរកភាពជោគជ័យក្នុងវិស័យសិល្បៈ»។
លោក ហ្គ្រីហ្គូរី បន្តថា៖ «ខ្ញុំគិតថា មនុស្សភាគច្រើនអាចមានរឿងស្រដៀងអ្នកស្រី ហើយអាចយកអ្នកស្រី ធ្វើជាគំរូនៃភាពតស៊ូ រឹងមាំ និងលើកទឹកចិត្តខ្លួនឯង ឲ្យពុះពារទៅមុខ នៅពេលជួបបញ្ហា។ អ្នកស្រី ជាមនុស្សស្រី ទន់ភ្លន់ តែរឹងមាំ ហើយមិនត្រឹមតែជាអ្នកចម្រៀង អ្នកស្រី ក៏ជាកសិករ ជាទាហាន និងជាម្តាយម្នាក់ដែរ»។
អ្នកស្រី សុទ្ធា ចាប់ផ្តើមមានឈ្មោះបោះសំឡេងពីការបកស្រាយបទចម្រៀង «ស្ទឹងខៀវ» ដែលល្បីទូទាំងប្រទេស ក្នុងអំឡុងឆ្នាំ ១៩៦៧ ក្រោយពីមិត្តភក្ដិបានជំរុញឲ្យចូលរួមការប្រឡងចម្រៀងប្រចាំខេត្ត រហូតបានទទួលពានរង្វាន់លេខ ១ នៅក្នុងឆ្នាំ ១៩៦៣។ អ្នកស្រីក៏ធ្លាប់សម្តែងខ្សែភាពយន្តនៅចុងឆ្នាំ ១៩៧០ ដែរ។
នៅលើវិថីជីវិតជាអ្នកចម្រៀង អ្នកស្រីបានក្លាយជាដៃគូចម្រៀងដ៏ស័ក្ដិសមបំផុតរបស់អធិរាជសំឡេងមាស ស៊ីន ស៊ីសាមុត ហើយចំណេរតមក អ្នកស្រីក៏ត្រូវទទួលបានកិត្តិនាមជារាជិនីសំឡេងមាស។
ទោះជាអ្នកស្រីលាចាកលោកយូរឆ្នាំមកហើយ ក៏មនុស្សជាច្រើននៅតែបន្តស្ដាប់សំនៀងដ៏ពីរោះពីចម្រៀងរាប់រយបទដែលអ្នកស្រីបានបន្សល់ទុក ដោយការសរសើរថា «ម្ចាស់ទៅសំឡេងនៅ»។
លោក ហ្គ្រីហ្គូរី មានជំនឿថា រឿងរ៉ាវរបស់អ្នកស្រី សុទ្ធា គឺជាគំរូនៃភាពសុចរិតទៀងត្រង់ និងគុណធម៌នៃការរស់នៅក្នុងភាពត្រឹមត្រូវ។
ផលិតករល្បីរូបនេះបន្តប្រាប់ថា៖ «អ្នកស្រី សុទ្ធា មានកិត្តិនាមល្បីល្បាញនៅក្នុងប្រទេស ក៏ដូចជាក្នុងសមាគមខ្មែរនៅអាមេរិក ប៉ុន្តែមនុស្សភាគច្រើនមិនបានដឹងអ្វីច្រើនអំពីប្រវត្តិ ឬចម្រៀងរបស់អ្នកស្រីទេ ខ្ញុំចង់ឲ្យមនុស្សគ្រប់រូបបានស្គាល់អ្នកស្រីកាន់តែច្បាស់ ហេតុនេះក្នុងឆ្នាំ ២០០៦ ខ្ញុំបានដឹកនាំកុនខ្នាតខ្លី ដែលចំណាយថវិកាតិចមួយ មានចំណងជើងថា សំឡេងមាស ឬ The Golden Voice»។
អស់រយៈពេលប្រមាណ ១០ ឆ្នាំ ដែលផលិតករជាច្រើននាក់បានបង្ហាញចំណាប់អារម្មណ៍លើសាច់រឿងនេះ ប៉ុន្តែគ្មាននរណាម្នាក់ហ៊ានចំណាយថវិកាក្នុងការផលិតទេ។
ឃើញបែបនេះក្នុងឆ្នាំ ២០១៩ លោក ហ្គ្រីហ្គូរី មានគំនិតមួយថ្មីក្នុងការកែច្នៃរឿងនេះ ទៅជារឿងប្រលោមលោក អមជាមួយរូបគំនូរបែបក្រាហ្វិកជំនួសវិញ។
លោកបានធ្វើការយ៉ាងសកម្មជាមួយវិចិត្រករចំណានម្នាក់ឈ្មោះ ខេត បូម៉ាន (Kat Baumann) ដោយចំណាយពេលជាច្រើនស្វែងរករូបភាព និងវីដេអូឯកសារពីអតីតកាលរបស់តួអង្គស្រីសំខាន់រូបនេះ។
លោក ហ្គ្រីហ្គូរី បានព្យាយាមទាក់ទងប្រភពដែលជិតស្និទ្ធជាមួយ សុទ្ធា កាលពេលនាងនៅរស់ ដូចជា អ្នកស្រី រស់ សាបឿន បងស្រីបង្កើតរបស់ អ្នកស្រី សុទ្ធា មិត្តសិល្បករ សិល្បការិនីរួមអាជីពក្នុងទស្សវត្សរ៍ ឆ្នាំ ៦០ និង ៧០ ដើម្បីទទួលបានព័ត៌មានពេញលេញ។ លោកក៏បានដកស្រង់រឿងរ៉ាវស្តី ពីស្ថានភាពប្រទេសចេញពីសៀវភៅនយោបាយ ប្រវត្តិសាស្ត្រ និងវប្បធម៌របស់កម្ពុជា។
វិចិត្រករ ខេត បូម៉ាន ប្រើខ្មៅដៃ មុននឹងដាក់ពណ៌គំនូរ និងបន្ថែមអក្សរ។ រូបថត សហការី
វិចិត្រករក្រាហ្វិករូបនេះបានគូរគំនូរ ដោយសិក្សាលម្អិតចាប់ពី សម្លៀកបំពាក់ សក់ រថយន្ត មេក្រូសម្រាប់ច្រៀង អាវុធ និងវត្ថុប្រើប្រាស់ផ្សេងៗ ដែលសុទ្ធតែមានរូបភាពច្បាស់ និងដូចតថភាពនាសម័យនោះអ៊ីចឹង។ គំនូរទាំងនោះ គឺត្រូវបានប្រើខ្មៅដៃគូរ ហើយបន្ទាប់ទើបយកទៅបន្ថែមទឹកថ្នាំ មុននឹង ខេត យកទៅដាក់ពណ៌ កំណត់ទ្រង់ទ្រាយ ហើយសរសេរជាតួអក្សរក្នុងកុំព្យូរទ័រ។
ផលិតកររូបនេះប្រាប់ថា៖ «ពួកយើងនឹងធ្វើការរៀបចំសៀវភៅប្រលោមលោកនេះឡើង ទាំងក្នុងទម្រង់បោះពុម្ព និងទម្រង់ឌីជីថល ហើយវាក៏មានរួមបញ្ចូលជាមួយបទភ្លេង ធ្វើឲ្យអ្នកអានអាចស្តាប់ឮសំឡេងតន្ត្រី ដើម្បីបញ្ចូលអារម្មណ៍ទៅតាមដំណើរនៃសាច់រឿង»។
លោក ហ្គ្រីហ្គូរី បានប្រាប់ ភ្នំពេញ ប៉ុស្តិ៍ ទៀតថា ក្រុមការងាររបស់លោកជិតសម្រេចផ្នែកទី ១ នៃសៀវភៅប្រលោមលោក ហើយលោកបានធ្វើការសន្មតថា សៀវភៅទាំងមូលនឹងអាចបញ្ចប់ក្នុងឆ្នាំ ២០២១។
ព័ត៌មានលម្អិតអំពី «សំឡេងមាស» ឬ «The Golden Voice” សូមចូលទៅកាន់ហេ្វសប៊ុកផេច @facebook.com/thegoldenvoicemovie ឬ Twitter: @thegoldenvoicex ឬ Instagram: @thegoldenvoicemovie ឬអាចចូលទៅកាន់ វេបសាយ www.thegoldenvoicemovie.com៕
